UPDATE*139
Love Story Continues………
Divya ko agyant ke sath dekh kar Pratigya kroadh me aur nafrat me jalne lagi……us samay vo apne purva janam ke vision ke ghere me thi….is drishya ne uski nafrat ko badhane me aag me ghee ka kaam kiya
Usne turant apne hath aage kiya jisse uske hath me ek trishul aa gaya…..Pratigya (Pari) ne jaise hi agyant ko maarne ke liye Trishul upar uthaya usi kshan vision ki avadhi samapt ho gayi
Avadhi samapt hote hi vo Trishul uske hatho se gayab ho gaya……pratigya apni vastavik duniya me lout aayi…apne aap ko dhikkarne lagi ki vo abhi kya anarth karne ja rahi thi…
Vo chup chap kamare se bahar nikal gayi…..thodi der baad Ratna aur baki sabhi kamre me pahuch gaye…jisse un dono ki prem krida me avrodh aa gaya aur dono prithak prithak ho gaye
Ratna—bas bas maine bate karne ke liye andar bheja tha….chipka chipki khelne ke liye nahi
Divya sharma kar turant agyant ke niche se nikal kar bistar se utar ke khadi huyi…kintu is dauran uske hatho ki taraf agyant ki nazar chali gayi
Usne turant uski baanh pakad ke khich liya aur uske dono hatho ko dekhne laga….use samajhte der na lagi ki uske komal hatho ki aisi halat kyo huyi hai
Agyant ki ankhe nam ho gayi….usne fauran bistar se niche utar divya ke samne apne ghutno ke bal baith kar sar jhuka liya
Agyant—tumne aisa kyo kiya..divya…?..mai tumhare prem aur samarpan ke aage khud ko bahut chhota mahsus karta hu….meri zindagi bachane ke liye tum kitna kashta sahti ho…mere hi karan jin hatho me mehndi honi chahiye aaj un hatho me fafole aa gaye hain
Divya (samne baith kar)—tumse kisne kah diya ki maine tumhari jaan bachane ke liye aisa kiya hai…?..ye sab to maine apni jaan bachane ke liye kiya hai…kyon ki meri jaan to tum ho agyant agar tumhe kuch ho jata to meri jaan to vaise hi chali jati
Agyant—mai aaj yaha tumhare prem ke karan hi jinda baitha hu….tumhara pyar mere liye kisi sanjivani se kam nahi hai….
Akele khwab bas tere, hame har pal satate hain
Tabhi hum haal-e-dil, aye sanam tumko sunate hain
Har insan ke sine me, chhupi kuch baate hain dekho
Magar hum raaz koi apna, na tumse chhupate hain
Yaad kar vo shama, jab hum teri baho me aa simte
Mohabbat ka vo hasin pal, kabhi hum na bhulate hain
Mahakte phool, is bagh-e-wafa me aa bikhare
Teri yadon ki daali, hum yaha jab bhi hilate hain
Jab bhi mouka mila divya, tune bas prem hi baanta
Tabhi hum pyar me tere, ye lo apna sar jhukate hain
Divya—lekin meri sanjivani to tum ho saajan….uthate baithte,sote jagte, yaha tak ki khane aur pine wali cheezo me bhi mujhe sirf tum hi tum nazar aate ho….meri to subah bhi tum ho aur shaam bhi tum
Mohabbat kisko kahte hain, Mujhe tune sikhaya hai
Chali hu jis path pe main, Bana tu mera saya hai
Chot jab bhi lagi dil pe, Safar me jindagani ke
Apni baato ke marham se, Tune mujhko hasaya hai
Khushamad vo tera karna, Aur ye tarif ke nagme
Teri in koshisho ne hi, Mujhe khud se milaya hai
Tu mere paas ho na ho, Magar tujhse main kahti hu
Meri in dhadkano me bas, Naam ek tera samaya hai
Tujhe mujhse juda karna to, Ab mumkin nahi hoga
Teri khushbu ko Saajan, Saanso me maine basaya hai
Maine ek baar phir se divya ko apni baho me bhar liya…..dil ko aisa sukun mila jise bata pana bahut mushkil hai
Ratna—ye lo ye to phir chipak gayi…..rajkumari ji hum bhi intazar me kab se khade hain…ab hamari bhi bari aane do
Ratna ki baate sunkar divya agyant se alag ho gayi aur sharam se apna sar jhuka liya…uske baad sabhi ne agyant se milkar uski kushal kshem puchi
Vaishali aur minakshi ne bhi apne apne prem ka izhar dabi juban se kar diya…agyant ne neel mani ki power se divya ke hatho ko theek kar diya
Magar in sab se alag halat pratigya ki thi…..use apne mann me ye darr baith gaya ki agyant in rajkumariyo ke hote huye uske prem ko is baar phir se thukra dega
Maharani ne bhi agyant se mulaqat karke uska abhar vyakt kiya….guruji bhi usse milne aaye unhone bhi agyant ki bahut prashansa ki
Mela ka karyakram nirvighna roop se akhir kar sampann ho gaya…..jaha ek oor is ghatna se poori praja ne agyant ko apne dilo me basa liya…to vahi rajkumar sushant irshya aur nafrat ki aag me jalne laga
Uski is nafrat ki aag ko bhadkane me kuch chaploos lalchi mantri barabar uski aag me ghee dalte rahte the
Vahi dusri oor Trikal ko jab hosh aaya to vo dard se tadapne laga……Prachandasur ne jab trikal ki aisi halat dekhi aur sath me neel mani hath se nikal jane se vo gusse aur badle ki aag me jalne laga
Usne apni sena sahit akraman kar diya …is yuddh me sushant ne khul kar p’asur ka sath diya magar agyant ke hatho use buri tarah parajit hokar jaan bacha ke bhagna pada
Idhar agyant aur divya ka prem dino din parwan chadhne laga…..dur dur tak dono ke prem ke charche hone lage….premi yugal jodo ne to saajan aur divya ke prem ki kasme tak khani shuru kar di thi
Ratna hamesha agyant ke samne har musibat me uski dhal banke khadi ho jati thi…na use lok laaj ki chinta thi…na kisi maan maryada ki……usne apni jindagi ka ek hi lakshya chun liya tha…kewal saajan ko pyar karna..uski yado me khoyi rahna aur har musibat se use mahfooj rakhna
Ratna ki agyant (saajan) ke prati ye deewangi dino din is kadar badhi ki log use prem deewani, pagal ..jane kya kya naam se pukarne lage
Vaishali aur minakshi ne bhi apna izhar-e-ishq kar diya tha aur agyant ne use swikar bhi kar liya tha..
Dusri taraf apni haar aur apmaan ki aag me jalte huye Trikal ne phir se ghor sadhna karni shuru kar di…
Is dauran agyant kayi anoothe aur tilismi adventures par gaya aur kayi adbhut shaktiya arjit ki jaha use Parilok, Patal lok, Naag lok, jinn lok etc..ka maharaj bana..vaha ke dushmano ko hara kar…logo ke dil jeet kar
In loko ki rajkumariya bhi agyant ko apna dil de baithi….agyant ki mulaqat vidhi se uske baad nahi ho payi…uska kahi pata nahi chala ki uske sath kya hua…?
Aise hi din mahine me aur mahine saal me gujarne lage....pratigya ne kayi baar agyant ko maarne ki koshish ki lekin kabhi divya ka payar samne aa jata to kabhi ratna dhal ban jati ab to isme vaishali aur minakshi ke pyar ke sath sath kayi aur logo ka pyar shamil ho chuka tha
Idhar din par din pari ki nafrat pratigya ke sar chadh ke bolne lagi to dusri oor Trikal ki ghor sadhna chalti rahi….isi dauran agyant ke sharirik sambandh ratna se ban gaye….neel mani ke prabhav se ratna ko is sambandh ke phalswaroop chiryouvana hone ka prasad mil gaya
Agyant ke jeevan me tabhi ek toofan aaya jisne sab kuch ulat palat kar diya….aur vo thi uske janam se judi sachchayi ….
Jab use malum hua ki vo jise prem karta hai vo divya aur ratna uski sagi bahne hain..to is sachchayi ke samne aate hi raj pariwar uske khilaf ho gaya…aur jise vo apna putra samajhte the vo sushant unke anuj putra ki aulad hai
Jise ek kshadyantra ke jariye agyant ki jagah par pratisthapit kar diya gaya tha…sanyog se pratigya sushant ki bahan nikli
Kintu yah sachchayi mahal ki char deewari me hi dafan hokar rah gayi….lekin saajan aur divya ke prem par iska koi asar nahi hua….vo usi tarah anvarat apni prem abha chahu oor bikherta raha
Udhar Trikal ki sadhna poori hote hi usne apna purva roop phir se pa liya aur sath me pahle se bhi adhik shaktishali bhi ho gaya
Trikal ne aisi mayavi maya rachi ki sab ki jeevan dor usme uljh kar rah gayi….kya sach hai aur kya jhuth farak karna dushkar ho gaya
Is mouke ka fayda utha kar sushant ne P’asur ke sath milkar maharaj aur maharani ki hatya kar di……isse agyant behad akroshit ho gaya aur usne gusse me sushant aur uske pita ko maar diya
Ussi samay pratigya vaha aa gayi aur usne agyant ko apne mata pita ke kaksh se gusse me nikalte dekha sath me uske hath me rakt ranjit talwar bhi
Vo bhagkar andar kamre me gayi to vaha apne mata pita aur bhai ki lash dekh kar apna aapa kho baithi….aur yahi pari ki nafrat apni parakashtha ki had paar kar gayi
Uss din amavas ki kali raat thi...charo oor ghan ghor andhakar pasra hua tha…agyant aur divya us samay mahal se bahar the..ratna mahal me hi thi
Kisi kaam se dono bahar gaye the..aane me vilamb ho gaya tha…achanak marg me kisi adrishya shakti ne unka rasta rok diya…..
Agyant ne bahut prayatna kiye kintu ek pag bhi aage badhne me nakam raha…tabhi kisi ne uske sine me talwar ghused di….is andhere ka fayda utha kar
Agyant ki dard bhari karah sun kar divya ghabra gayi….usne turant use thaam liya apni baho me magar vo shakhs itne me hi nahi ruka usne apni talwar ka vo vaar phir se agyant par kar diya aur jor jor se hasne laga
Divya (rote ghabrate huye)—saajannnnnnnn……kya hua tumhe…..koun hai…..kyo ye duniya hame jine nahi deti,…akhir kya kasoor hai hamara…?…mai tumhe..k..u..ch nahi hone dungi…saajann
Shakhs—hahahaha…..saajannnnnnnnn…….hahaha……..
Divya ne is awaz ko pahchanne me koi galti nahi ki…
Divya (dukh aur shock me)—tummmmmmmm
Shakhs—hahaha….ha..mai….kuch…yaad aaya….divya…..maine kya kaha tha..tujhse….hahaha
Divya ne rote huye vo talwar agyant ke sine se nikal kar gusse me us shakhs ki gardan ek jhatke mu alag kar di…aur phir se agyant se lipat kar rone lagi
Divya (rote huye)—utho saajan…utho….tum is baar mujhe chhod kar nahi ja sakte….mai tumhe kuch nahi hone dungi….koi to bachaooooo….koi haiiiiii…….bhagwan mere saajannn ko bacha lo
Agyant (nam ankho se)—di..v…yaa…..mu…jh…e….maa..f……karnaa….mai….tumharaa……sath…nahi…. nibha..paya….
Divya (rote huye)—nahi..tumhe kuch nahi hoga…..mai tumhe kuch nahi hone dungi….koi meri pukar kyo nahi sun raha….koi to bacha lo mere saajan ko…..uske alawa mera koi nahi hai…
Agyant—divyaaa…..di…v..y……..
Aur iske sath hi agyant ne dum tod tod diya......agyant ke dum todte hi divya ne ek baar jor se saajan kah ke pukara aur phir vo bhi apne saajan ke upar nispran hokar gir gayi
Udhar divya aur agyant ki mout ne ratna ko buri tarah se tod diya.....P’asur ne raj mahal me aag laga di.....Minakshi aur vaishali us aag ki bhent chadh gayi jabki ratna ko bandi bana liya gaya
Agyant ne neel mani ka raaz us din subah hi ratna ko bata kar use ek jimmedari de gaya tha shayad agyant ko aaj hone wali ghatna ka abhas ho chuka tha pahle se hi
Do pyar karne wale ek baar phir se is jalim duniya ki bhet chadh gaye...lekin markar bhi unka prem amar ho gaya hamesha ke liye
Vahi dur baitha sadhu maharaj aaj bahut shant aur udas tha...
Sadhu—tum dhanya ho saajan aur dhanya hai divya ka saajan prem......tum dono ke is nishchal prem ko mera pranam hai....... koi kitna bhi shaktishali kyo na ho jaye..........parantu asli satya to yahi hai.....
‘’Mout Se Bhi Bhala Koi Bacha Hai Aaj Tak’’
End of 6th Janam Love Story