- 28,992
- 64,235
- 173
Ye Kahani hai Ek aise Painting karne wale Ladke ki jiske hatho har roj pahli tasveer ek ladki ki ban jati hai..jise usne kabhi dekha nahi, suna nahi...jiske bare me vo kuch janta tak nahi.....Lekin phir bhi uske hatho pahli painting ussi ladki ki banti hai.....jise vo chahe ya na chahe.. kya hai us tasveer ki haqiqat...?..koun hai vo Ladki...?..kya Rishta hai uska is Ladke se...?.. Janne ke liye padhte rahe
NAAG MANI
Update*1
Batti ke charo taraf Peetal ki chhalni jaisa khol chadha hua tha……Kumar jab bhi is batti ko jalata, batti ki roshni peetal ki surakho me se doodh ki dharao ki tarah bahne lagti jisse kamre ki deeware aur kamre ka fursh roshni se chhitka hua dikhta..
Yah batti kamre ki chhat me lagi huyi thi…dusri batti kumar ki mez par lagi huyi thi….batti ke mathe par peetal ka ek dhakkan laga hua tha jisse chhitra kar is batti roshni mez par rakhe huye shishe ke pyale me bhar jati thi aur pyala har samay chhalakta hua dikhayi deta..
Kumar jab kuch soch raha hota to uski mez ki batti bujhi huyi hoti aur chhat ki batti jal rahi hoti thi…..Peetal ki saikado surakho me se chhitrati huyi batti ki roshni jis tarah saikdo alag alag dharao me bati huyi hoti thi…..kumar ke khyal bhi saikado alag alag lakiro me chalte the..
Par jab kabhi uske mann me ye lakire jud jati to vah chhat ki batti bujha kar mez ki batti jala leta tha... Roshni ek hi jagah jama hokar sheeshe ke pyale ko bharne lagti aur kumar ke mann me judi huyi tasveer uske samne pade huye kagazo par utarne lagti…..
Aaj kumar pichhle teen ghanto se apni mez par sar jhukaye kaam me juta hua tha…Alka ne mez ke paas rakhe huye stool par coffee ka pyala rakhte huye dhire se chammach ko khan khanaya taki kumar ko malum ho jaye ki usne coffee ka pyala rakh diya tha…
Par kuch minto baad alka ne dekha ki coffee ka pyala vaise hi rakha hua tha aur kumar ussi tarah mez par sar jhuka kar kaam me juta hua tha…
Alka ne muh se kuch kahe bagair cup ko thoda sa sarka diya…kumar ne cup ki oor is tarah dekha jaise ki khidki me aati huyi hawa se khidki ki saankal hilne ki awaz aayi ho…Saankal phir jaise sthir ho gayi ho aur kumar ka dhyan jaise apni mez par kendrit ho gaya ho…
Alka ko kumar ke studio me akar kaam seekhte huye six months hone aaye the aur alka ko six mahine me nahi, pahle mahine me hi malum ho gaya tha ki jis samay kumar kaam karta ho, alka ki kahi huyi kisi baat me ya pyale ke chammach me …athva khidki ki saankal me koi antar nahi rahta…isliye alka muh se kuch na boli..
Karib adhe ghante baad kumar ne mez se sir uthaya...Jab vah bahut thak jata to uske mathe par ek nas ubhar aati..is nas ka kasaav uski ankhe bhi mahsus karti..
Usne ek minute ankhe band ki aur phir mathe ki nas ko apne hatho se sahlate huye usne alka ki or dekha
Kumar—ek cup coffee milegi kya…?
Alka ne stool par rakhe huye pyale ko uthaya aur kamre se sate huye chhote baramde me chali gayi… Rasoyi kuch dur padti thi, isliye kumar ne tea banane ka saman baramde me rakh chhoda tha..chulhe par pani rakh kar alka ne thandi coffee ko gira diya aur cup dhone lagi...
Garam coffee ka pyala lekar alka jab loutkar kamre me aayi to kumar mez par rakhe kagaz ko dhyan se dekh raha tha...
"Aaj itni khushbu kaha se aa rahi hai "...kumar ne is tarah puchha jaise vah khushbu ko nazar gada kar dhudh raha ho
Alka ne bhi tasveer ki oor gardan ghumayi aur phir tasveer ki ladki ke baalo me lage huye phoolo ki oor dekhti huyi kahne lagi..
Alka—in phoolo se aa rahi hogi khushbu..
Alka ke hath se coffee ka pyala pakadte huye kumar khil khilakar hasne laga..
Kumar—abhi maine apna hosh itna nahi khoya hai ki kagaz par banaye huye phoolo me se khushbu aane lage
Alka chup sadhe rahi....usne palang ke paaye ke paas padi huyi chouki ki oor dekha, jaise kah rahi ho ki itna hosh jarur jata raha hai ki kamre me pade huye taaze phool abhi tak dikhayi nahi diye the..ye phool alka ne subah aate hi kamre me laga diye the..
"Ohh...." kumar ne hosh me hone ka daava vapis le liya aur coffee la garam ghoont bharte huye kahne laga..
Kumar—Par ye aadat nahi dalni chahiye thi..
Alka—kaisi aadat... ?
Kumar—coffee ki aadat.....Phoolo ki aadat
Alka—aur... ?
Kumar—Paise ki aadat....Shoharat ki aadat....Aurat ki aadat..
Alka—aur apne aap ki aadat….?
Kumar—kya matlab.... ?
Alka—apne aap ki aadat bhi nahi dalni chahiye...kabhi kisi Michael Angelo ko Michael An Jelo rahna chahiye aur kabhi use bazar ke ek kone me baitha hua halwayi bhi ban jana chahiye...kabhi namak bechne wala baniya aur kabhi paan bidi bechne wala...
Kumar (haste huye)—tum samajh nahi payi ho alka....ek apne aap ki aadat bhar ke liye baki koi aadat nahi dalni chahiye...main sochta hu ki apne aap ki poori aadat kewal tabhi pad sakti hai jab admi baki aadato se mukt ho jaye...
Alka—yeh mai manti hu...Par mere vichar me shoharat aur aurat me bahut farak hota hai...
Kumar—kisi aadat aur aadat me antar nahi hota....mai ek baar....
Alka—chup kyo ho rahe... ?
Kumar—tumhari jagah agar koi dusri ladki hoti to mai shayad chup rahta…kisi ko bhi kuch batane ki mujhe kabhi jarurat nahi padi…..Jarurat ab bhi koi nahi par shayad batane me kuch harz nahi…tum mujhe galat nahi samjhogi..
Alka—mujhe bhi khud par bharosha hai..
Kumar—mai yeh batane chala tha ki ek baar mujh me aisi bhookh jagi ki mai kayi din so na saka.....vah sirf jism ki bhookh thi…ek aurat ke jism ki bhookh….par mai kisi bhi aurat ke sath apni jindgi ke saal baandhne ke liye taiyar na tha…isliye kuch din mai aisi aurat ke paas jata raha jo roj ke bees rupaye leti thi aur meri swatantrata ko kabhi nahi mangti thi..
Alka ne kuch nahi kaha…sirf nazar gadakar kumar ke chehre ki oor dekhti rahi…
Last edited:
for new thread bro. ..