- 28,992
- 64,506
- 173
SAAJAN
UPDATE- 206
5th Janam Ki Amar Prem Kahani....
UPDATE- 206
5th Janam Ki Amar Prem Kahani....
Hazaro pyaliyo ke nashe se madhosh unn ratnari ankho me na jane koun sa aisa akarsan tha, koun sa aisa sammohan tha ki dekhte hi jisne mujhe ek bar me hi awaak, stabdh aur patthar jaisa jadwat bana diya tha uss samay. Behad adbhut tha uska soundarya jisne meri antar aatma tak ko apni sundarta ki chamak se udbhasit kar diya tha uss bhayanak barsati raat me.
Tabhi vajra swar se aas maan phat pada aur jor jor se musladhar barish hone lagi aur pishachini jaisi kali raat aur bhi bhayanak ho uthi.
Tabhi achanak phir jor ki bijli chamki…door akash tak ek chamkili rekha khich gayi aur ussi ke sath hi mera sammohan bhi bhang ho gaya.
Ab aage......
Jitu (mann me)—iss bhayanak andheri kali raat me koun hai yeh ladki.... ?
Bhay, vishmay aur sanshay se bhar gaya tha mera mann…uss ghani kali, barish bhari raat me uss roopangana ka iss tarah aise samay me yaha aana bada hi vichitra lag raha tha mujhe.
Jitu—aap..! koun hain aap…?
Main aage kuch samajh pata ki isse pahle hi vah ashcharya janak dhang se vaha se aise gayab ho gayi jaise ki uss jagah kabhi thi hi nahi....mere liye ye badi hi hairat ki ghatna thi....maine uth kar mashal ki roshni me bahar nikal kar dekha kintu ab vaha koi nahi tha....agar tha to bas door door tak phaila ghanghor andhkar.
Main vapis lout kar bistar par let gaya kintu meri ankho se uss ladki ka vah youvan soundarya ojhal hi nahi ho raha tha...uske vishay me sochte sochte na jane kab main nidra devi ki agosh me sama gaya..
Subah kuch kolahal ke swar se meri neend bhang huyi to main uth kar baith gaya....mujhe jagte dekh vaha bahar baithe kuch sainik idhar udhar jane lage to maine ek ko apne paas bulaya.
Sainik—pranam yuvraj
Jitu—ye kaisa swar sunayi de raha tha abhi... ?
Sainik—vo asal me yuvraj...raat me gaon ke ek hi ghar ke teen bachche achanak gayab ho gaye hain...kuch sainik uske baare me hi baate kar rahe the.
Jitu (hairan)—kyaaaaa….? Raat me…..? kisne gayab kiya unhe…aur sainiko ko kaise pata chali ye baat….?
Sainik—ji yuvraj….kisne gayab kiya iss baat ke vishay me to koi jankari nahi malum huyi kintu subah subah kuch sainik gaon ka pahra laga rahe the tab ek ghar me rona peetna macha hua tha…vaha ja kar puchne par ye baat malum huyi.
Jitu—ohhhh…..ek aur ghatna…! Akhir ho kya raha hai yaha…? Koun si sazish rachi ja rahi hai aur kyo….?
Sainik chupchap apna sir jhukaye mere samne khada raha...maine jane ko kah diya aur khud bhi dainik kriya se nivratt ho kar pooja aradhna me lipt ho gaya...tatpashchat kuch jalpan karne ke uparant main gaon me ussi ghar ki taraf nikal gaya jaha raat me ye ghatna huyi thi....halanki mousam abhi bhi saaf nahi hua tha...aas maan me kale badal apna dera jamaye huye the abhi bhi.....gaon me puchne par asani se uss ghar ka pata chal gaya.
Vaha ghar me abhi bhi logo ki bheed jama thi sath me uss maa ka karun krandan bhi sunayi de raha tha jiske jigar ke tukdo ko uski mamta se vanchit kar diya gaya tha raat me....uska rona dekh kar mera bhi hriday bhar aaya kintu maine bhavnao me bahne ki bajaye khud ko sanyamit rakhne ka prayas kiya.
Jitu (ek admi se)—bhai ye sab kaise ho gaya.... ?
Admi—kya bataye bhai...ye to ab roj ka hi rona ho gaya hai....na jane kis manhoos ki nazar lag gayi hai hamare iss gaon ko.... ?
Jitu—bachche bade bade rahe honge na.... ? kya vo bahar ghum rahe the.... ?
Admi—teen hi to bachche the bechari ke...do ladki aur ek ladka....teeno ki umra abhi dus saal ki bhi nahi huyi thi....pichhle saal pati bimari se khatam ho gaya aur ab uske teeno bachche bhi nahi rahe...bachcho ke sahare hi to bechari jee rahi thi....bhagwan bhi kitna nirdayi hai.
Jitu—kitne samay ki baat hai ye.... ?
Admi—Yahi koi aadhi raat ke karib ki ghatna hai…maa aur teeno bachche ek hi kamre me so rahe the…aadhi raat ke baad achanak tez hawa ka jhonka aaya jisse chimni bujh gayi….thodi der me jab hawa band huyi to bechari ne uth kar phir se chimni jalayi…aur ujala hote hi uski cheekh nikal gayi…uske teeno bachche bistar se gayab the…vo hawa ka jhonka apne sath unn masum bachcho ko bhi le gaya…shayad vo aaya hi isiliye tha.
Jitu—yeh to bahut hi bura hua bhai…
Dusra admi—kisi buri aatma ka saya hai gaon me jo sab ko ek ek kar ke nigale ja raha hai….ab to ye gaon rahne layak hi nahi rah gaya hai.
Pahla admi—baat to tum sahi kah rahe ho kaka…kintu apna ghar aur jamin chhod kar hum jayenge bhi to kaha jayenge…?
Teesra admi—Hamne suna hai ki Yuvraj yaha aane wale hain…..unke aane tak to hame yaha rukna hi chahiye..akhir unko bhi to pata chale ki unke rajya ki praja ke sath kya kya ho raha hai….?
Pahla admi—arey bhai, yuvraj ke aane se bhi kya ho jayega…aur mujhe to nahi lagta ki yuvraj yaha ayenge…? Unko avashya beech me kisi ne yaha ki ghatnao ke vishay me bata diya hoga aur vo bhi maharaj ki tarah vahi se lout gaye honge apne raj mahal…
Dusra admi—nahi bhai….hamare yuvraj aise nahi hain…..vo janta ki baat sunte hain….mujhe vishwash hai ki vo jarur ayenge….hame unki pratiksha karni chahiye.
Pahla admi—unke yaha aane tak jab koi iss gaon me jivit hi nahi bachega to unke aane ya na aane ka kya matlab..?
Unn sab ki baate sun kar mera mann kafi vichlit aur dukh se bhar gaya……uss maa ka rona mujhse dekha nahi ja raha tha…main uske dukh ko door karna chahta tha kintu vivash tha uss samay…mujhe to inn sab ghatnao ke piche ke sutradhar ke vishay me koi sutra nahi mila tha ab tak.
Parantu phir bhi uss maa ko santwana dena to avashyak tha hi….kyon ki ye insaniyat ka farz bhi tha aur uss rajya ka yuvraj hone ke naate mera naitik kartavya bhi tha…ki main apni praja ke har har dukh me unke sath khada ho kar unki sahayta hetu sadaiv tatpar rahu….main uss aurat ke paas ja kar usko santwana dene laga.
Jitu—bahan jo bhi hua, vo atyant dukhdayi hai….main tumhare mrit pati ko to jivit nahi la sakta kintu agar tumhare bachcho ko avashya launga vo jis haal me bhi honge….ye ek bhai ka vachan hai apni iss bahan ko….
Ek admi—kaha se le aaoge tum…? Jhuthi dilasa mat do bechari ko....hum sab jante hain ki unko ab koi nahi la sakta.
Jitu—ye aap kaise kah sakte hain ki ab unhe lana asambhav hai... ? parishram karne se hi kisi karya me safalta milti hai....yaha ek jagah baith kar kisi baat ka anuman laga ke uska parinam soch lene se kabhi koi karya siddh nahi hota bhai.
Vo maa (rote huye)—mere bachcho ko koi dhoond lao...unke siwa mera ab koi nahi hai....
Jitu—upar wale par bharosa rakho bahan…sab theek ho jayega….
Ek aurat—kaha se theek hoga sab…? Koun jayega uss kali pahadi ki taraf marne ke liye…?
Jitu—main jaunga….haan, main jaunga.
Main vaha se nikal kar uss aurat aur uske bachcho ke baare me sochte huye gaon se bahar ki oor nikal gaya… vaise ye jyada bada gaon to nahi tha lagbhag chalis pachas ghar the….charo taraf door tak phaile huye hare bhare khet… kheto ke bagal se lambi kataro me lage nariyal ke kafi oonche oonche ped, gaon ko lagbhag charo oor se ghere huye dhumil akash ko chhute se aur ek dusre se gunthe huye baans ke jhurmut…matmaile pani se bhare teen char adhkachche pokhar, aur gaon ki seema se thoda door hatkar vakrakar ghum kar bahti huyi ek patli si nadi..uska naam tha rupakshi.
Gaon ke bahar unn door tak phaile kheto se laga hua jungle, aur uss jungle se lagi huyi kali pahadi…aur kali pahadi ke uss paar bana hua ek behad prachin rahasyamayi qila…main apne hi dhyan me khoya hua gaon ke bahar nadi ki oor nikal aaya tha..tabhi kisi ki awaz sun kar mera dhyan toota to samne kal wala admi mujhse kuch kah raha tha.
“Arey bhai kaha khoye huye chale ja rahe ho…main kab se awaz de raha hu tumko…?” usne shikayat bhare shabdo me ulahna dete huye kaha.
Jitu—kuch nahi bhai..bas kuch soch me dooba hua tha..isliye shayad mera dhyan nahi gaya hoga apki taraf…?
“Maine tumhe udhar gaon se bahar jungle ki taraf ke raste par chalte dekha to awaz de raha tha, udhar jane se rokne ke liye.” Uss admi ne aage kaha.
Tabhi meri nazar nadi ke kinare bani ek choti si kutiya par chali gayi to mujhe kafi ashcharya hua ki jab gaon me aisi vichitra ghanaye ghatit ho rahi hain tab aise me yaha gaon se bahar kutiya banane ka kya prayojan ho sakta hai.. ?
Jitu—dhanyawad bhai mujhe dhyan dilane ke liye...vaise vo kutiya kis ki hai... ? kya koi rahta hai vaha... ?
"Haan, usme ek mahatma rahte hain...bechare bahut buddhe ho chuke hain...lagbhag ek sau bees saal ki umra hogi unki...din bhar kutiya me rah kar bhajan karte rahte hain aur shaam ko gaon me bhiksha maangne ke liye nikalte hain.. yahi unka roj ka niyam hai." Uss admi ne jankari dete huye kaha.
Jitu—achcha to ye baat hai.
"Theek hai bhai..apna dhyan rakhna aur jitna ho sake uss jungle se door hi rahna…ab main chalta hu." Usne mujhe samjhate huye kaha aur phir gaon ki taraf chal diya.
Uske jane ke baad main kuch der tak uss mahatma ke bare me sochta raha aur mann me vichar kiya ki aaj dophar me unki jhopdi me milne jaunga….ye mann hi mann abhi soch hi raha tha ki achanak tabhi mere sine me ek bechaini si hone lagi…kuch hi samay me ye bechaini had se jyada badh gayi to maine vaha se jana hi behtar samjha aur gaon jane ke jaise hi palta vaise hi kisi se takra gaya.
Takrane wali koi ladki thi…mujhse takrate hi vo dhadam se niche gir gayi….uske bade bade kesh hawa me lahra uthe girne se…uska chehra niche ki taraf tha jisse mujhe dikhayi nahi diya…girte hi uske mukh se koyl si masumiyat bhari awaz nikli…
"Aaahhhh….Maar Dalungiii." Apni naak ke neeche ungli ghumate huye usne badi hi masumiyat se kaha.
Kahne ke sath hi vo palat gayi aur phir uske chehre par nazar padte hi main jaise apni sab sudh budh bhul baitha..
