SAAJAN
UPDATE- 208
5th Janam Ki Prem Kahani Continues....
Divya—(naak ke niche ungli ghumate huye) Maar Dalungiii....chalo yaha se...jaldi...ye bhanwra to mera picha hi nahi chhod raha hai...chalo...
Jitu (mann me)—abhi mat jao divya...abhi to maine jee bhar ke tumko dekha bhi nahi hai...
Ai Meri Zindagi Yu Mujhse, Daga Na Kar,
Use Bhula Kar Jinda Rahu, Dua Na Kar,
Koi Use Dekhta Hai To, Hoti Hai Taklif,
Ai Hawa Tu Bhi Use, Chhuwa Na Kar…
Ab aage…..
Jitu (mann me)—Yahi sahi avsar hai inke samne aane ka…
Teeno jaise hi jane ke liye mudi hi thi ki main ped ke piche se nikal kar unke samne aa kar khada ho gaya.. mujhe dekhe hi vo teeno ghabra gayi...aur darr kar vaha se bhagne ki koshish karne lagi.
Jitu—Dekho, daro nahi...daro nahi...(apne mann me sochte huye)..par isse to inhe pata chal jayega ki main hi yuvraj jitu hu...nahi, mujhe ek samanya atithi ki tarah hi aacharan karna chahiye..
Divya—Ye dust to samne se hatne ka naam hi nahi le raha hai....to main hi dusri oar chali jati hu...haaye, yeh to idhar bhi piche piche chala aa raha hai....tum dono bachao mujhe...
Jitu (jaldi se aage aa kar)—Dusto ke vinashak yuvraj jitu ke shasan me aisa koun hai bhala jo itni bholi bhali kanyayo ko pareshan kar raha hai... ?
Divya (mann me)—ye to vahi kal wala admi lagta hai…lagta hai ki mera picha karte huye yaha tak aa gaya…? Kintu yaha tak pahuchna to iss ashram vasiyo ko chhod kar anya kisi ke liye to asambhav hai phir ye kaise yaha aaya.. ?
Anusuiya—koi pareshan nahi kar raha hai...bas ek bhanwra hai, jiske paas aa kar mandrane se hamari sakhi darr gayi hai.
Jitu—kaho, kaha hai vah bhanwra... ?
Priyamvada—lagta hai ki aap yuvraj jitu ke koi pahchan wale hain...jao, divya ja kar ashram se inn vishesh atithi ke liye kuch phal le aao khane ke liye...pair dhone ka pani yahi se mil jayega.
Jitu—nahi..nahi...aap teeno ki madhur vani se hi hamara swagat satkar ho gaya.
Anusuiya—aap iss patthar me baith kar apni thakaan mita le....yaha thandi chhaya bhi hai.
Jitu—aap bhi to inn poudho ko pani dene ke punya karya se thak gayi hongi…aap log bhi kuch der baith jaye.
Priyamvada—aa ja divya, kuch der baith jate hain…atithi ka aadar karna hamara kartavya hai.
Divya (mann me)—koun hai yeh…? Kyo iss admi ko dekh kar mera mann khushi se vichlit ho raha hai…? Kyo mann me aisi bhavnaye uth rahi hain jo iss ashram ki maryada ke anukul nahi hain…?
Jitu—aap teeno ki ek si umra aur ek se roop ki mitrata kitni achchi lag rahi hai..
Priyamvada (kaan me)—Yah koun vyakti ho sakta hai anusuiya…? Shakal aur surat me itni gambhirta hai ki jiski koi thaah nahi, aur baat karne ke dhang me mithas bhi hai aur sath me prabhav aur udarta bhi hai.
Anusuiya (dhire se)—Yahi utsukta mere mann me bhi hai…kyo na isse hi puch liya jaye…?
Priyamvada—haan, ye theek rahega..
Anusuiya—kya main aap se kuch puch sakti hu…?
Jitu—avashya puchiye…
Anusuiya—apki madhur vani se prabhavit ho kar main ye jaane ke liye utsuk ho gayi hu ki aap kis rajvansh se hain..jiski shobha apke chehre par hai…? Apka koun sa desh hai jisko ki aap virah se usko chhod aaye hain…? Koun sa karan hai jisse aapne apne komal sharir ko yaha tapovan me aane ka kasht diya hai…?
Divya (mann me)—Vyakul mat ho hriday..! Jo tu soch aur janna chah raha tha, vah anusuiya ne puch liya hai..
Jitu (apne mann me)—Ab inhe apna parichay kaise du....kaise bataau ki main to yaha uss kali pahadi ke piche chhipe rahasya ka pata lagane aaya hu... ? aur jiske karan maine sabse apna asli bhesh chhupaya hua hai...kya inse bhi apna asli parichay chhupaau... ? haan, yahi theek rahega...
Jitu—Dekhiye main ek ved vid brahman hu...yuvraj jitu ne mujhe apne nagar ke dharmadhikar ke karya me niyukt kar rakha hai…mann me iss pavitra ashram ko dekhne ki lalsa thi, isliye iss dharmvan ki oar chala aaya hu.
Anusuiya—Yaha rah kar dharmacharan karne walo ke liye ye gaurav ka vishay hai...
Priyamvada—Divya, aaj agar rishi kanva yaha hote to......
Divya—to kya hota…?
Anusuiya (mushkura kar)—to apna sab kuch dekar bhi iss vishesh atithi ka satkar karte…
Divya (banawati gussa dikhate huye)—maar dalungiii….chalo hato..tum log kuch aur hi mann me rakh kar baat kar rahi ho…main tumhari baat nahi sunti..
Jitu—hum bhi aap ki sakhi ke vishay me kuch puchna chahte hain…
Priyamvada—Yeh apka anuggrah hai….isme yachna kaisi…?
Jitu—maharshi kanva to janm se hi bramhachari hain to ye apki sakhi unki beti kaise hai….?
Anusuiya—Iske mata pita ke vishay me to sirf kanva rishi hi jante hain…lekin ye jarur hame pata hai ki kanva rishi ko hamari sakhi kali pahadi ke jungle me mili thi jab vah kewal mushkil se kuch maah ki hi thi…rishi usko utha kar ashram le aaye aur uska paalan posan karne lage..tab se iss naate se vahi iske pita hain…
Jitu—apki sakhi ka adbhut roop dekh kar lagta hai jaise ki vo kisi rajya ki rajkumari ho…
Priyamvada—haan, hame bhi aisa hi lagta hai…
Jitu—aisa roop soundarya, apki sakhi ko ek asadharan kanya hone ki oar ingit karta hai...kampti vidhyut kya kabhi sadharan stri ke garbh se bhi janam le sakti hai... ?
Divya laja kar apna sir niche kar leti hai...vahi priyamvada aur anusuiya, divya ke mann ke bhavo ko samajhte huye mand mand mushkurane lagti hain.
Priyamvada (mushkurate huye)—Lagta hai ki aap abhi aur bhi kuch kahna chahte hain.... ?
Divya—(apni tarjani ungli se dhamkate huye dhire se)....Maar Dalungiiii.
Jitu—apka kahna bilkul sahi hai....yeh sundar roop dekh kar apki sakhi ke baare me aur bhi kuch puchne ka mann kar raha hai...
Priyamvada—aap sankoch na kare....tapasviyo se kuch bhi puchne se kisi bhi tarah ke dharm ka ullanghan nahi hota hai..
Jitu—hame puchna yeh hai ki kya kewal kanyadan hone tak hi apki sakhi kaamnao se pare rah kar ashram dharm ka paalan karegi ya phir ajivan apne jaisi ankho wali sundar hirniyo ke sath yaha vichran karti rahegi... ?
Priyamvada—Iss samay to dharmacharan ka ankush iske sir par hai...par kanva rishi ka nishchay yahi hai anukool var milne par iska kanyadan kar denge.
Jitu (mann me)—ai mere dil, ab tu apni abhilasa par niyantran na rakh...tera sandeh door ho gaya.. ! yeh aag nahi jaisi ki tujhe ashanka thi balki yeh to ek sheetal ratna hai jise tu chhu sakta hai.
Divya (jaise kroadh se)—dekh anusuiya main ab yaha se ja rahi hu..
Anusuiya—lekin kyo... ?
Divya—main ja kar iss priyamvada ki maa ko batati hu ki yeh yaha kya kya ulta sidha bak rahi hai..
Anusuiya—na..na..hum ashram vasiyo ke liye yeh uchit nahi ki ek vishesh atithi aaya ho aur hum uska koi satkar kiye bina hi uske paas se uth kar chal de...
Divya, anusuiya ki baat ka bina koi jawab diye hi vaha se uth kar chal deti hai...mera dil usko pakad kar rokna chahta tha kintu phir bhi maine apni mann ki bhavnao par niyantran rakhna hi uchit samjha.
Jitu (mann me)—Yeh to sach much hi jane lagi....sach, ek kamatur vyakti ki cheshthaye bhi uske manobhavo jaisi hi hone lagti hain.
Priyamvada (divya ke paas aa kar)—sun chandi, tu iss tarah se yaha se nahi ja sakti hai…
Divya (ghum kar ankhe dikhate huye)—maar dalungiii.....kyo nahi ja sakti.... ?
Priyamvada (pakad kar rokti huyi)—tere upar mera karz hai, do ped seenchne ka...pahle vo karz utar le...tab jana yaha se...
Jitu—Vah bechari to pahle hi pedo me pani seench seench kar itna thak gayi hai ki ghada uthaye rahne se kandhe jhuke jhuke se aur hatheliya abhi tak lal hain...saanse itni tez hain ki bechari ke stan kaamp kaamp jate hain..muh par pasine ki itni itni jaliya hain ki kano ke phool kundal bhi kumbhala kar jhuk jate hain...aur bandhan khul jane se ek hath me sambhale kesh ..aisi vivashta hai ki sambhal nahi pa rahe hain...isliye uska ye karz main utar deta hu.
Anusuiya—divya ka karz apke in shabdo se hi utar gaya....dekh divya, inhone tujhe karz mukt kar diya hai...ab tu yaha se ja sakti hai.
Divya (mann me)—apne aap par mera vash hota to kya main kabhi yaha se jati... ?
Priyamvada—to ab yaha se ja kyo nahi rahi hai tu... ?
Divya—main teri gulam hu kya... ? jab mera mann hoga tab jaungi…..Maar dalungiii
Jitu (divya ko dekh kar mann me)—kya jaisa main apne dil me jaisa iske liye soch raha hu, kya vaisa hi yeh bhi apne mann me mere liye soch rahi hogi….? Lagta hai ki meri kamna niradhar nahi hai kyon ki…chahe meri baat se haan me haan mila kar baat nahi karti phir bhi mere baat karne par iske kaan issi oar rahte hain…chahe adhik der apna chehra meri oar nahi rakhti, phir bhi dusri kisi taraf bhi jyada der tak yeh nahi dekh pati.
Anusuiya—chal divya, ab ashram me chalte hain…nahi to koi hame dhoondta hua yaha aa jayega…aur aap hame ek bar phir se darshan jarur dijiyega…
Divya—(meri taraf dekh kar theek se nahi chal pane ka abhinay karti huyi)…ohhh maaaa…aaaaa…haaye…kya ho gaya hai…lagta hai ki mere pair me moch aa gayi hai….? Mujhse bilkul bhi chalte nahi ban raha hai…
Jitu—aap log aram se jaye…
Priyamvada—chal divya...mere kandhe par hath rakh le aur chal yaha se...
Divya (natak)—ohh maaa....dekh na anusuiya..lagta hai ki mere pair me koi kaanta ghus gaya hai...thodi der ruk na.. pahle ye kaanta to nikal lu pair se...tab to chalungi na….meri chunri bhi kahi phans gayi hai..
Anusuiya (pair dekhti huyi)—pair me to koi kaanta nahi laga hai..
Priyamvada (mushkura kar)—aur teri chunri to tere gale me hi hai…kahi bhi to nahi phansi hai….
Divya—achcha..! tum dono kahti ho to maan leti hu…theek hai chalo phir…
Phir divya kisi na kisi bahane se baar baar ruk ruk kar meri taraf dekhti huyi anusuiya aur priyamvada ke sath vaha se chali jati hai.
Jitu (lambi saans chhod kar)—to ye chali gayi.. ! ab mujhe bhi chalna chahiye…jab se divya ko dekha hai, yaha se lout kar jane ka mann hi nahi kar raha hai...lekin jana to padega ki, vaha sainik bhi meri chinta me pareshan honge..mann me itni shakti nahi ki divya ko phir se dekhe bina yaha se ja saku…
Jitu—sharir aage ja raha hai kintu mann ki disha piche ki oar hai…maheen resham ki dhwaja jaisa hai yeh mann jisko ki main hawa ki prati kool disha me liye ja raha hu.
