Update:-26
Vyom mukurate huye unhe chhod'kar badh gaya tha. 4 kadam chala hoga ki dekhte hi dekhte pub ka najara hi badal gaya... Vyom apni jagah par khada tha aur kayi sare bandook ki nali Vyom par tani hui thi...
Jaise hi ye najara aakhon ke samne aaya, har koi sakte me aa gaya. Wahan ke mahol me afra-tafri si chhane lagi.… "Sab log shant ho jaeye aur aap apni shaam ka luft uthaeye. Kisi bhi mahol me apni grand upastithi dikhane ka humare apna hi andaz hota hai."….
Secret Service head Bakshi apni jordar awaj se apna parichay dete huye, Voyom ko dekhte.… "Sir kya aap ke pass 2 minute ka samay hoga"… Vyom bilkul shant aur shalin khada muskurate huye najron se sahmati diya aur hath ka ishare uss ore hi kar diya, jahan Jivisha aur baki sabhi log khade ho'kar hairani se najara dekh rahe the.…
"Mujhe to pahle se hi shaq tha, yah koi bahut bada aatankwadi hai"… Jyoti bhabhi samne chal rahe high level drame ko dekhti hui kahne lagi…
"Koi bahut bada secret service agent bhi to ho sakta hai jise fasa diya gaya ho. Uski talash uske department wale kar rahe the. Lekin dekhna ye abhi yahan se bhag jayega aur jab ye apni begunahi sabit karega, tab achhe achhon ki band baja'kar apni begunahi sabit karega"….
Jivisha ne Jyoti bhabhi ki baat par apni jordar pratkriya kuch aise rakhi ki samne chal rahe drame ko chhod'kar sabhi Jivisha ko hi ghurne lage. "Filmi deewani"… kahte huye pichhe se uske sar par sabne tafli baja di...
Itne me Bakshi aur Vyom dono unke karib pahunch chuke the…. Bakshi aa'kar baitha aur sath me un sabko baithne ke liye bol'kar…. "Yahan lane ki khas vajah sir"…
Vyom, Jivisha ko dekhte.… "Mujhe yadi parakhna ho to mere sath chalo"…
Vyom nuskurate huye Jivisha ko dekh'kar bola. Idhar Bakshi, Vyom ko sun'ne ke baad.… "Tere dar itni dur aaye to khali haath na jayenge.…. Aaye hain to kuch le'kar jayenge. Tum apni aashiqi kuch der kinare kar lo, taki pahle humara masla sulajh jaye... Pyar se aur baat chit se.… Warna majboori me mamla suljhane ke humare pass kafi anokhe tarike hain"…
Jyoti bhabhi gusse me Vyom ko ek thappad lagati, Bakshi ko dekhti…… "Itne bade adhikari ho'kar aap itne pyar se kyon pesh aa rahe hain sir, arrest kar lijiye"….
Vyom thoda unchi awaj me kuch duri par khade ho'kar tamasha dekh rahe ek waiter se... "Dost mere liye jarra ek Atomic Champagne Cocktail lana aur bakiyon ko bhi kuch serve karo"…
Bakshi:- Mujhe aisa kyon lag raha hai ki public me aane ke baad apni ijjat kam ho rahi hai... Sahi kisi ne kaha tha, logon se jyada milo to izzat ghat jati hai. Tumhe shayad mamle ki gambhirta nahi samjh me aa rahi hai kya???
Bakshi, Vyom se kah to raha tha lekin Vyom ka sara dhyan kewal Jivisha par hi tha. Mano sun'kar bhi ansuna kar raha ho. Itne me hi Vyom ki favourite drink bhi serve ho chuki thi. Ek ore se Jyoti bhabhi, Kasak aur Nandni kuch-kuch bole ja rahi thi. To dusri ore se Bakshi apna sar par hath pit'te bus itna hi soch raha tha ki iss ladke ne hi mujhe jaan bujh'kar in ladies ke bich fasaya hai"...
In sab gahma-gahmi ke bich, Vyom muskurate huye apna drink sip-sip me pite, Jivisha ko dekh raha tha. Jivisha bhi muskura'kar Vyom ko hi dekhe ja rahi thi... Jivisha ke chahere ki bhavna kuch aisi thi mano kah rahi ho, 'le chalo jahan bhi chal rahe'...
Dono ke liye to chal rahe mahol se koi matlab hi nahi tha… tabhi fir se Jyoti bhabhi Vyom ko ek jhannatedar thappad laga dee.. wahin dusri ore se Bakshi ke sath aaye uske sabhi high trained soldier ke bich, ek baar fir se Vyom gun point par tha...
"Ab yahan koi baat nahi hogi. Mai jabatdasti to nahi karna chahta tha lekin tumne mere samne koi chara nahi chhoda"…. Bakshi shayad pahli baar chidha ho, kyonki aaj se pahle wo kabhi itne gusse me kisi se baat nahi kiya…
Bakshi apni baat samapt kiya hi tha ki wo puri jagah dhuyen ke kohre se dhaki thi. Kuch bhi dekh pana sambhav nahi tha aur jab dhuwan chhata tab wahan na to Vyom tha aur naa hi Jivisha... Bus rah gaya tha to Bakhi ke coat ki jeb me chhota sa note... Jise padh'kar wo jod-jod se hans raha tha... ..
Usse hanste dekh Jyoti bhabhi pure aawesh me aati.… "Buddhe ho gaye hain aap aur ye sare lull aadmi hain aapke sath. Sab ek sath resign kar do. 22-23 sal ka ek ladka, itne logon ke bich se humari Jivisha ko le gaya. Aur aap baith'kar bus dialogue hi maarte raho"… ..
Bakshi wo letter unke table par chhod'kar nikalte huye kahne laga.… "Bade bagairat ho'kar unki mehfil se nikle"…
Jaise hi Bakshi aage gaya, Kasak jhat se uss letter ko utha'kar sabke samne padhne lagi, jisme likha tha.……
"Kaam se kuch mahine ki chutti par hun. Mai jarra apni nayi girlfriend ke sath around the globe chakkar laga lun... Uske baad fir se Resilient group par focus hoga.…. With love... Apasyu Raghuvanshi"…
Apasyu raghuwanshi ke naam se to ye log bhi wakiff the lekin Vyom hi Apasyu hoga ye kisi ne socha nahi tha.. Iske purv jaise hi Jivisha aur Apasyu ki sahmati bani. Apasyu apne chir-parichit andaj me uss Pub ko hi pura dhuyen se bhar diya...
Apasyu aur Jivisha dono hi Lamborghini me baithe, tej raftaar ka luft utha'te Pune-Mimbai express highway se gujar rahe the… Jivisha muskura'kar Apasyu ko dekhti hui kahne lagi…. "Tum jo dikhte ho wo ho nahi Vyom"…
Apasyu:- Hahaha, itna mat socho bus jo mehsus kiya usse aage badhne do. Waise mera asli naam...
Jivisha bich me hi rokti.… "Devil group ke mukhiya, Apasyu Raghuvanshi. Tumhe mai apne aur apne pariwar ke ore se dhanywaad kahna chahungi. Bade bhaiya ko bacha'kar sach me ek ehsaan kiya hai"….
Apasyu:- Kamal ka tumhara bhi instinct hai...
Jivisha, thoda thedha ghum'kar apne gaal par hath rakh'kar Apasyu ko niharti hui.… "Tumhari to ek pyari si girlfriend bhi thi na... Tum dono me break-up ho gaya kya???"
Apasyu:- Shayad tumhe cheat kar raha hun, ek waqt me 2 ke sath rah'kar…
Jivisha:- Nahi, tum cheat kar rahe aisi koi feeling nahi aayi... Bus tum dono ke vishay me jan'ne ki ikchha thi... Avni Sinha… yahi naam hai na uska...
Apasyu:- Usse ye naam pasanad nahi... Aimee, sirf yahi naam achha lagta hai usse...
Jivisha:- Hmmm ! Abhi kahan hai wo...
Apasyu, muskurate huye ek baar Jivisha ke chehre ko dekhte.… "Tumne itna kuch pata lagaya, fir mujhe nahi lagta ki iss sawal ka javab tumhe nahi pata hoga"…
Jivisha:- Pata nahi lagaya tha. Wo to abhi jo mila tha Bakshi, ussi ne detail kahani bade bhaiya ko batayi thi. Aur abhi usse jab pub me dekhi to mujhe samjhte der na lagi ki tum hi Apasyu ho.. Jyoti bhabhi ke liye sorry… wah mujhse kafi close hain aur tum samjh sakte ho...
Apasyu:- Haan main samjh sakta hun... Vishwas karo mujhe bilkul bura nahi laga...
Jivisha:- Waise ek baat kahun, mera mann kafi vichlit hai… jab bhi tum dono (Apasyu aur Aimee) ke bare me sochti hun, to uss nirdayi bhagvan se ek hi sawal puchhti hun... Kyon tumse tunhare pyar ko chhin'kar ek duniya se dusri duniya le gaye..."
Apasyu car ki speed badhate.… "Ishvar hum sab me nihit hai, wo kabhi nirdayi nahi hote… kuch aur baten karte hain"…
Jivisha muskurati hui.… "Kya tum mere boyfriend banoge"…
Apasyu:- Boyfriend ban'ne ke kuch fayde honge, ya naam ke liye kewal...
Jiviha:- Achha ji matlab fayde bataungi tab boyfriend banoge. Suniye MR Apasyu Raghuvanshi ji, mere ek ishare par boyfriends ki line lag jayegi...
Apasyu:- Haan main dekh chuka hun station par… Galti se hui takkar par 50 ladke daud gaye... Haan lekin capable kewal tumhara wo dost Alexa hi tha...
Jivisha:- Areee Nahi, mai to Alexa ko bhul hi gayi… kahan gaya mera Alexa cuteee.. usse bhi sath liye chalte to maza aata...
Apasyu, Jivisha ke lahrate huye lahje me kahi gayi baat sun'kar bina hanse rah nahi paya.… "Tum jitni aakrashk, sexy, hotty aur pyari ho. Uss se kahin jyada pyari tumhare bolne ka andaj hai. Bilkul killer…"
Jivisha, khilkhilati hui.… "Kaun ladka ek shwans me apni girlfriend ki aisi tarif karta hai"…
Apasyu:- Yadi mai pahla hun to mera naam chhapva do... Waise tumne galat ladke ko chuna hai... Meri jindgi ka bhi koi thikana nahi...
Jivisha, Apasyu ki baat sun'kar, apni aakhen sikod'kar, Nischal ko ghurti hui.… "Apna hath do idhar"…
Apasyu, ek hath jaise hi aage badhaya, Jivisha apne dono hatheli ke bich uski hatheli rakh'kar.…
"Tunhare atit ya vartman me kya chal raha hai wo mujhe nahi pata. Kya tum meri sacchi chahat ho, yah main nahi janti. Haan lekin tumhe khone ka khyal pata nahi kyon vichlit kar raha hai. Tumhari dharkano ki awaj main bahut dur se mehsus kar sakti hun".
"Main apni bhavna shabdon se bayan na kar paun, lekin tum alag ho.. bilkul alag... Main mil nahi payi Aimee se, lekin ehsaas hota hai, tumhare ander ke ek hisse me jaroor uski bhavnayen hai... Jo main mehsus kar sakti hun..."
"Ek baat to tay hai. Yadi kahin kisi ghatna me tumhari mirtyu tay hai, to maut ko bhi tumhe marne se pahle, mujh se ho'kar gujarna hoga."…
Apasyu, Jivisha ko dekh'kar ek pal ke liye hairan hua. Yadpi Apasyu Raghuvanshi ke bare me ek baat bahut hi saaf thi ki uske chehre ke bhav kabhi badal nahi sakte the, lekin Jivisha jab puri tarah kho'kar apni bhavnayen vyakt kah rahi thi, Apasyu puri tarah se hairan tha...
Hathon me hath le'kar bolne ke dauran, Jivisha ki gahri nili aakhen itni tej chamak rahi thi, ki uski raushni sadak jitni dur tak sidhi hogi wahan tak aankhon ki chamak ja rahi hogi. Jivisha ke hath bilkul shwet rang me aise chamke mano charo ore prakasmay ho gaya ho...
Jivisha ko khud bhi ehsaas na hua ki wo kuch pal pahle kya kar gayi thi. Apni baat kah'kar jab wo Apasyu ke ore dekhi, tab payi ki Apasyu uski ore dekh'kar pyari muskaan muskura raha tha…
Jivisha apni lalaat upar karti.… "Kya hua aise kyon muskura rahe"…
Apasyu:- Soch raha tha, maut ke samne tum aa gayi to hum dono ki jaan bachegi ya dono maare jayenge...
Jivishsa:- Matlab???
Apasyu:- Iska matlab mai baad me bataunga… Abhi tum batao... Kahan ghumna pasand karogi…
Jivisha:- Kuch din sirf tumhare sath... Kewal hum dono aur koi nahi... Ab jahan le chalo...
Kuch hi der me dono Pune-Mumbai express Highway ke bich kisi jagah ruke. Wahan pahle se ek 6 seater private jet intzar kar raha tha... Dono usme sawar ho gaye...
Jivisha jisgyashavash puchhne lagi... "Kya yah plane tunhari hai"…
Apasyu:- Haan lagta to aisa hi hai. Thodi chhoti hai adjust kar lo..
Jivisha:- Thodi chhoti se kya matlab… Lamborghini car, Ducati bike. Apna privete jet.... Tum to raja ki jindgi ji rahe....
Apasyu:- Achha, meri jindgi jina pasand karogi……
Jivisha apna sar Apasyu ke sine se laga'kar, uske chehre par hath ferti…. "Ek baar ye bhi kar'ke dekh lete hain"…
Apasyu, Jinvisha ko khud me samet'kar uske balon me hath ferte... "Tum wakai bahut pyari aur masoom ho"…
Kuch der hawai yatra ke baad plane land kar chuki thi. Raat ka andhera aur kahin kuch najar nahi aa raha tha... Jivisha jaise hi plane ke bahar kadam rakhi, sikud'kar Apasyu me pura chipakte…. "Kya cold storage me plan land hui hai"…
Apasyu bina koi javab diye, Jivisha ko khud me samete barfile raston par chalne laga. Jivisha jaise-jaise kadam badha rahi thi, wo aur bhi jyada Apasyu me simti ja rahi thi. Thand itni jyada tej thi ki Jivisha ka sharir sthul par gaya. Dant bajne lage aur kab wo behosh ho gayi pata bhi nahi chala.
Apasyu usse apne gode me utha'kar, kisi mathh me le'kar pahuncha. Tibbat ke Himalayan reason me ye ek bahut purana mathh tha. 12 kamre ka ye kafi purana mathh, tatha-kathit kailsah parvat ke raste me padne wala ye aakhri mathh tha... ..
Apasyu, Jivisha ko ek kamre me lita'kar mathhadhish se milne chala aaya. Apasyu ko dekh'kar mathhadhish apne dono hath jodte.… "Aapke aane ki koi suchna nahi thi"…
Apasyu:- Aacharya ji aap mujhe guruji ki jagah na de... Main kitni baar vinti kar chuka hun...
Aacharya ji:- Gurudev ne jis varsh apne deh ka tyag kiya tha, aap hi pratham the. Mere liye to guru ji aap hi huye..…
Apasyu aur Aacharya ji ke bich kuch aupcharik baten hui. Apasyu ne fir usse apne aane ka karan bataya. Kuch hairan karne wale tathya Aacharya ji ke liye bhi the. Apasyu ki puri baat sun'ne ke baad Aacharya ji jaise hi chalne lage.…
"Aacharya ji bahut pyari hai meri nayi girlfriend, jab subah aapse milegi to uska hona hi yahan maujood sabke muskurane ka karan hoga."
Aacharya ji apne raste ko chal diye aur Apasyu, Jivisha ke liye kapde le'kar uske kamre me pahuncha.… Jivisha gahri nind me kahin gum thi, yadhpi usse thand lagi thi lekin kamre ke anukul mahol me wo sukoon ki nind le rahi thi.
Ye kya ker diye bawa... Hisab kitab hi badal diya aur kehte ho koi rahasya nahi ab ye bhi rahasya nahi to fir aur kya hoga ..aur ye amy ke sath bhala kya ker dala ... Bhut hi galat behad shashakat kirdar thi wo..
kher kahani ke raciyta ko dono kahani ek kerne ki aesi dhun hai ki ham readers ker hi kya sakte hai .. to shyaed ab vyom urf mera ceheta kirdar Apsyu ko jivisha ke bare me aur janne ka moka milega aur ho sakta hai isi bahane jivisha ki memory bhi wapus aaye us math ke aas pas aur jab wo laute to purn jivisha ban ke laute .wese
bat ki ek bat update bahut jyada surprising tha ... Jab se entry hui hai vyom ki tab se hi keh rha hu ye bandha bada hi mysterious hai ab jake pata chala yha to writer ne mystery ki dukan khol rakhi hai ...bhawar 2 ki patkatha yaha na rachiye janab iska apna maza hai aur uska apna
hai udhar. Kahani par pahunchne ke liye story title par ulgi karne ka...
wo hai.... bas abhi ke liye nahi hai.
so ab aage is bakari sorry bakshi ko secret service ka head Yar ye kitna nikmma type insan hai ye to India ka nam duba ke manega iske so called super cops ke samne se koi larki ko dhua ke aad me utha le gaya inhe pahle bolo ki jakar training kare phir story par aaye nhi to Jyoti bhabhi ke tappad khane ko taiyar mile are Jyoti bhabhi se yad aaya ki inhone ne aaj ke update ki mahfil hi loot li Kya karare tappad mare hai abhi Tak pub me aawaj gunj rhi hai
to aapne jivi ko justify Karne ke liye vyom ka history pata hone ki bat kahi phir bhi dekho na nain sir wo use bf banane ke liye mari ja rhi hai mujhe to spg sir ke story three girls of my life me likhe universal truth ki ye larkiya hamesha unhi se patati hai jinki do ya tin gf rah chuki hoti hai aur dekho na nain sir is bat par to jivi ne bhi mohar lagadi pata na kyo mujhe ye bat likhate huae rona aa rha hai