- 4,125
- 57,641
- 173
Update 186
Pratyaksh-Apratyaksh
Rupali ghar ke bahar he khadi jaise Arjun ki pratiksha he kar rahi thi. Ghar ke sabhi log apne apne karyo me vyast the aur aisa hona laajmi bhi tha kyonki ghar me 2-2 shaadiyan thi wo bhi agle he din. Dhero mehmaan aaye the aur unki aav-bhagat karne ke sath he sabhi ko apni apni tayaariyan bhi dekhni thi. Arjun jaise he gali me pahucha toh car lagane tak ki jagah na dikhi. Malhotra ji ke ghar ke saamne he car rok kar wo abhi samaan nikaal he raha tha ki Rupali uski bagal me aa khadi hui.
"Tumhe andar baithak me bula rahe hai. Kitni he der se intjaar kar rahi hu tumhara lekin lagta hai tumhari shopping kal bhi khatam nahi hogi.", Rupali ne gor nahi kiya tha ke car ki pichli seat par bhi 2 log hai aur dono taraf se darwaje khulne par usko apni galti ka ehsaas hua. Zubeidaa ne hanste hue ek bag uski taraf badhaya aur Arjun car ki chabi Romela ko deta hua ghar ki taraf badh gaya.
"Aunty, aap he rakh lijiyega ye chabi. Main baad me le lunga. Rupali didi thodi help kar dena aunty aur didi ki.", Aur itna bol kar he wo chalta hua apne ghar me chala aaya. Abhi tak mehmano ki atchi khaasi chehal pehal thi. Uske nanihal se bhi log aaye hue the aur Walia aunty ji bhi Annu ke sath uske saamne se he andar ki taraf gayi thi. Arjun ek sarsari najar har taraf daalne ke baad jaise he baithak me pahucha, kadam wahi thithak gaye. Din me aksar aise samay par khule rehne wale darwaje band the aur unhe kholne ke sath he sabse pehle uski najar mili us beinteha khoobsurat lekin is samay udaas se chehre par. Sakshaat Bindu urf Bindiya waha baithi thi aur uske bagal me sar dhake Shabnam lekin unki nigaah Arjun par padne se pehle he Muskaan ne apne naam swaroop ek dilkash muskaan ke sath jaise uska swagat kiya.
"Namastey Chachi.", Arjun ne aage badh kar apni daadi ki bagal me baithi Bindiya ke saamne jhuk kar jis sammaan ke sath mulakaat ki thi usko dekh kar jaha Bindiya thoda seham sa gayi wahi saamne ki taraf baithe Rameshwar ji ke chehre par khushi thi. Yaha abhi kuch aur log bhi the jine Arjun ke chacha Narinder ji, Col sahab aur IG Kapoor the. Alka yahan sabhi ke liye chai-nashta rakhne ke baad Muskaan ko apne sath he le gayi.
"Namastey Arjun. Shayad abhi bhi mujhe aisi bhent ki kalpana nahi thi.", Ruke hue se lafjo me Bindiya itna kehte kehte thoda sharminda mehsoos kar rahi thi aur Arjun ne ye bhaamp kar Shabnam ko ek taraf karte hue un dono ke beech he jagah bana li.
"Aap jo bhi kalpana kare lekin sach toh yahi hai na ke aapke liye main koyi anjaan nahi. Aur agar aapko abhi bhi aisa lagta hai ki sabkuch thik nahi hua toh main aapki madad ko ehsaan maan leta hu.", Yaha Arjun ne ye baat waha England me Annu Walia ki madad ke sandarbh me kaha tha. Aur uski baat Bindiya ke alawa bahot aur bhi log sunn rahe the. Is baar Bindiya ne apna chehra bagal me baithe is yuvak par karne ke sath kuch pal usko dekha aur fir bade sneh se ek hath Arjun ke gaal se firate hue sar pe le aayi.
"Tumse behtar aur kaun samajh sakta hai meri haalat. Maaf karna itne saal baad bhi kuch jakhm bharne me samay lagta he hai. Aur ehsaanmand toh main aur meri dono betiyan tumhare hai ki tumne na sirf wo sab rok diya balki Shabnam ke sath sath mujhe bhi jiwan ka sahi drishtikon dikhaya. Uncle (Pandit ji) ji se toh maafi maang li hai lekin tumhe kya kahu?", Bindiya ki aankhon se aansu ludhak kar niche girne lage. Lekin chehre par ab dard na tha bas kuch tha jisko sirf Arjun he samajh raha tha ya fir Kaushalya ji.
"Isko toh tu beta he keh Bindu aur ye tere uncle ji na hamesha ek he baat kehte the ki agar inhe fir kabhi bhagwan ne mauka diya toh wo tujhse maafi maang kar tere har dard ko door karne ki poori koshish karenge. Anjaane he tera aur teri maa jiwan barbaad hua aur ye bhi sach hai ki iske baare me mujhe ya mere bacho ko koyi jaankari nahi thi. Tere uncle ki majboori thi jo mujhe abhi pata chali hai aur baaki main ab jaan he lungi. Bahot aansu baha liye ab inhe bacha ke rakh. 2-2 betiyan hain aur unki baari me inki jarurat padegi.", Kaushalya ji ne paani ka gilas aage badhaya tabtak Arjun us chehre se aansu saaf kar chuka tha.
"Ye aapki aur Shabnam ki baaki files hai Mrs Bindiya aur aapke upar lage sabhi charges tatkaal roop se khatam kar diye gaye, pratyaksh ya apratyaksh. Lekin baaki jo log shamil the un par system apni kaarwahi jari rakhega. Us se aapko koyi pareshani nahi aayegi iska eitbaar rakhiye. Ab main chalta hu Pandit ji, kal vivaah par he milte hai. Atcha bhabhi ji, aur koyi sewa ho toh jarur kahiyega.", IG Kapoor ne wo hare aur neele rang ki 2 file wahi Shabnam ke saamne karne ke baad ijajat chaahi aur Pandit ji se hath mila kar nikal gaye. Un file ko Shabnam ne he Rameshwar ji ko thama diya aur yahi wo pal tha jab Narinder ji ki najre Shabnam se mili.
"Ab agar tum chaho toh Shabnam ka dakhila bhi idhar he karwa sakti ho lekin mujhe lagta hai ki tumhe bhi iska sath chahiye hoga waha. Tumhari maa ke sanskaar me toh shamil nahi ho saka lekin Pintu ke sath Haridwar jarur jaunga. Tumhe rukna chahiye kal tak ke liye.", Rameshwar ji ne diwan par dono file rakhne ke baad Bindiya se aage ki charcha shuru ki toh Bindiya ka dhyaan abhi bhi Arjun par he the.
"Le ja isko apne sath agar tujhe ye itna pasand aaya ho. Lekin tere uncle ki bhi sunn le.", Kaushalya ji ne hilate hue kaha tha aur Bindiya sharmina hoti hunh he keh paayi.
"Ji sath le jaane wali toh baat he nahi hai. Dil me sabse badi chahat yahi thi ki bas ek baar main us insaan se jarur milu jiska dil sirf dena jaanta hai chahe badle me dukh mile ho. Waise bhi niswarth dil kisi ek ka naho hota aunty ji toh le jana bekaar he hai. Bas is se itni gujarish hai ki Muskaan se milta rahe chahe mahine me ek baar he mumkin ho. Wo bahot maanti hai isko aur Arjun me usne he sabse pehle wo insaan dekha tha jo badle me yakeen nahi rakhta. Haan badlaav me jarur rakhta hai aur aaj main yaha baithi hu is se bada udaharan kya hoga?"
"Rehne do chachi maine itna bhi kuch nahi kiya. Aur Muskaan ki chinta aap na he kijiye. Khud dada ji ne ye jimmewari le rakhi hai ab toh. Haan aapne shaadi wala jawab nahi diya.", Arjun ne ab apne aaspas dhyaan diya aur Shabnam ko apni taraf dekhta paa wo muskura diya.
"Nahi beta abhi mumkin nahi hai lekin vaada karti hu bahot jald milne aaungi. Uncle raat ki he flight hai wapsi ki aur sabkuch ekdum se hua tha isliye abhi thoda samay chahiye. Aapka kabhi bhi England aane ka vichar bane ya waha kaisa bhi kaam ho, sabse pehle aap mujhse he baat kijiyega.", Bindiya ki baat khatam hote he Kaushalya ji ne apne pati ke sath haami bharte hue chai ka cup pakdaya. Shabnam ne bhi chai le li thi aur wo gor kar rahi thi ki beech beech me Narinder ji usko he dekh rahe the. Itni der se waha baithe hone ke bawjood wo abhi tak kuch nahi bole the lekin ab unka bhi mooh khula.
"Mera ek sawaal hai agar papa aapko koyi problem na ho? Bindiya tum chaho toh jawaab de sakti ho aur na chaho to ateet se wapis toh kuch aane wala nahi.", Narinder ji ki baat sunn kar Kaushalya ji ko toh thoda jhatka laga lekin jis se jawab chahiye tha usne haan me sar hila diya aur khud Pandit ji ne jaise aagya de di thi. Arjun abhi bhi wahi tha aur shayad yahi wajah thi Kaushalya ji ke chaunkne ki.
"18 saal pehle ek ghatna hui thi jisko anjaam dene wali nurse aaj tak nahi mili. Tumhare pas koyi jawaab hai?", Bindiya is sawaal par feeki muskaan deti hui badi gehraai se sawaal karne wale ko dekh rahi thi jaise usko ye Narinder duniya ka sabse bewkoof insaan najar aa raha ho.
"Sabse pehle toh bata dena chahungi aapko ki mujhe bhi dukh hua tha us haadse ka jaan kar. Dusri baat wo jagah shayad mujhse behtar aapke jaankar ki thi aur waha jo bhi log the unme se he koyi shamil hoga. Aur jitna mujhe pata hai Shankar ji ki najro se fir bhi koyi ek baar bach nikle lekin aapki, aapki se mumkin nahi. Fir se talaash kijiye Mr Narinder, jab kabhi chot se hamare dil ko peeda hoti hai hum anjaane he baaki shehar jala dete hai lekin choti choti baatein najarandaaj karne wale bhi hum he hote hai. Ab toh kaafi samay gujar chuka hai, dil me tapish bhi nahi hogi. Fir se jaanch kijiye, Inderjeet jo hain.", Bindiya ne apne kehne ke andaaj par turant he Kaushalya ji se maafi maang li aur khade ho kar jaane ki aagya bhi.
"Tum yaha tak taxi se aayi ho bitiya?", Rameshwar ji ke sawaal par Shabnam ne sar hilaya.
"Pushpak Rajgarh tak chhod gaya tha aur aage wahi se taxi karwa di thi uncle ji. Waise ye behtar hai kisi ko pareshan karne se."
"Satish, bhai inka samaan apni kisi bhi gaadi me rakhwao. Ye Arjun khud he rakh dega aur Mukesh ko bolo ki wo inhe na sirf Airport chhod kar balki vida karke bhi aaye.", Rameshwar ji jabtak hidayat dete tab tak Muskaan bhi idhar aa chuki thi jiske hath me Lalita ji ki taraf se diya gaya ek bada sa bag bhi tha. Kapde, mithaai ityaadi ka. Bindiya mana karti rahi lekin Kaushalya ji ke pyaar se mana karne se maan bhi gayi. Taxi driver ka hisaab karne ke paise bhi khud unhone he Arjun ko diye.
"Bhai sahab main Amreek ko bhej deta hu, ghar ki duty ke liye bulwaya tha aur Arjun beta sierra me samaan rakhwa do Bindiya ka.", Col sahab ne bhi utni he jaldi kamaan apne hath le li. Arjun abhi Shabnam ke sath bahar ja he raha tha ki Bindiya mooh dhone Alka ke sath bathroom ki taraf gayi toh Narinder ji thoda aage chal kar wahi ruk gaye.
"Tumse toh baat bhi nahi kar saki aur ab wapis bhi jana hai.", Shabnam Arjun ko gaadi se bag nikaal kar Col sahab wali car me rakhte hue dekh rahi thi. Dono ke beech abhi baat shuru hui thi itne samay me.
"Main bhi chahta tha ki aapke sath atchi mulakaat ho. Khair abhi mahol nahi hai toh iska matlab ye toh nahi ki fir baat nahi hogi. Waise Vikas bhaiya ne bataya tha ke aap log aayenge lekin time unhe bhi nahi pata tha.", Pichli seat ke niche ek bag rakhne ke baad dusra bag seat ke upar sahi se rakh kar Arjun ne darwaja band kiya toh Shabnam uske gale he lag gayi. Wo dono gali me he toh khade the aur aise ekdum se Shabnam ke gale lagne par kuch pal toh Arjun ko samajh he na aaya ke kya ho raha hai. Lekin wo fir samajh gaya tha ke insaan aakhir bhaavnao ko aise he toh prakat karta hai. Shabnam ki peeth thapak kar wo alag hua toh wo najre jhukaye uska shukriya adaa kar rahi thi.
"Naani ki tehravi par papa bhi aayenge Arjun. Fir tumse jarur milungi."
"Main shayad Punjab hounga tabtak lekin aap bata dena jab wapis aa jao. Mil toh sakte he hai.", Aur idhar Col sahab bhi Amreek ko liye aa chuke the.
"Bitiya apni maa ko bhi bula lo. Fir 4 ghante toh jaane me bhi lagenge.", Col sahab ki awaaj sunn kar Shabnam apni maa ko bulane chal di aur Col sahab Arjun se baatchit me lag gaye. Aksar aisa he karte the wo.
"Wo main kya keh raha tha Bindu?", Idhar Narinder ji najre jhukaye hue jaise kuch badi baat kehna chahte the aur unke hatho toliya le kar chehra saaf karti hui Bindiya bhi idhar udhar dekh rahi thi jaise usko bhi anhoni baat ki shanka ho.
"Bolo Inder jo bhi kehna hai."
"Wo.. Main keh raha tha.. wo.."
"Bol do Inder jo bhi kehna chahte ho. Fir baat ho na ho pata nahi."
"Shabnam ka khayaal rakhna. Meri wajah se tumne shayad usko he wo sab karne ke liye chuna tha. Maaf kar dena lekin sach tumhe bhi pata hai. Agar tumhe wahi chahat thi toh kam se kam usko sambhalna chahiye tha. Shankar bhi maafi maang lega tumse jab sach pata chalega bas tum ye dhyaan rakhna ki zindagi me raqeeb-gunehgaar jo bhi ho bas bache beech nahi aane chahiye. Mera dil karta hai ki usko apne seene se laga lu aur batau ki wo kaun hai. Bas darta hu ki uske baad hajaro sawaalo ka saamna kaise karunga. Maaf kar dena.. "
"Haan inhe maaf kar dena Bindiya lekin isme aap dono ki galti nahi hai. Aapki toh bilkul bhi nahi aur mere pati ne jiwan me kabhi koyi galat kaam nahi kiya. Inhe mujhse pyaar tha aur aaj bhi karte hai. Lekin aajtak wo ek kaagaj inhone hajaro baar padha aur maine har baar inke chehre par alag alag he bhaav dekhe. Kuch eksaar tha toh ye ki inki ek beti aur bhi hai jisko ye apne seene se laga nahi sakte.", Krishna ji ne toh Bindiya ke jawaab dene se pehle he apne pati ka hath thaam kar wo baat keh di thi jo shayad he koyi patni kehne ki himmat rakhti. Lekin dono pati patni ek dusre ko utne he sneh se dekh rahe the jaise unme kabhi koyi raaj tha he nahi.
"Tumhe bura nahi laga tha Krishna?"
"kis baat se? Inki beti ki jaankari hone par? Aapka inke prati aisa prem jaan kar jisme paane ki chahat he nahi? Ya fir khud ko pratadit mehsoos karke? Teeno he baaton ne mujhe jhakjhor ke rakh diya tha aur naubat ye thi ki mujhe jeene ki itcha tak na rahi lekin ye Inderjeet jo hai inhone fir se apni tapasya dikha kar mujhe hansil kar liya. Pyaar karna galat nahi hai Bindiya ji toh aapko kaise galat kahu. Baaki main toh Inder se itna he kahungi ki aapko Shabnam se gale milne me parhej nahi karna chahiye. Haan ab sabki duniya apni apni grahasthi me nirdharit hai toh iska samman jarur kijiyega patidev.",Krishna ji itna kehti hui hath jodd kar wapis andar chali gayi lekin inse kuch he duri par khadi Shabnam ki aankhon me itna paani tha jiska hisaab in dono ke paas na tha.
"Toh aapko kya kahu main?"
"Filhal toh uncle he thik hai aur baaki tumhari marji. Haan apni maa ke saamne toh papa matt keh dena aur waise kisi ke bhi saamne matt kehna. Tumhe nahi pata Shabnam, jab tumhari maa ne mujhe bataya tha.. Chhodo wo sab aur bas khush rehna. Main aaunga tumse milne aur tumhare papa se bhi. Bindiya, ye shayad tumhe bulane he aayi thi.", Narinder ji bina Bindiya ki taraf dekhe Shabnam ke kandhe par hath rakhe hue usko liye aise bahar chale aaye jaise wo uske koyi kareebi dost ya barso se jaankar rahe ho. Andar he andar Shabnam bhi is sparsh ko waisa he mehsoos kar pa rahi thi jaisa usko aajtak kabhi mila he na ho lekin chahat har waqt.
"Bye P.. Aur yaha koyi nahi hai.", Shabnam ne geeli aankhon ke sath he ek baar Narinder ji ko dekha aur turant aage chal kar gaadi me baith gayi. Bindiya ke sath bahar Kaushalya ji bhi aayi thi toh Narinder ji turant Asgar ke tambu ki taraf ja khade hue. Aaj jaise wo chain ki neend so sakte the jo barso se naseeb na hui thi. Bindiya ne toh ek baar bhi unki taraf na dekha lekin Arjun ke maathe ko choomna wo nahi bhoooli.
"Apna khayaal rakhna chachi. Is Muskaan ko waise bhi England pasand nahi.", Arjun ne mahol ko thoda majaak ka rukh dete hue pehli baar Muskaan se shararat karte hue uske baal bikherte hue aisa kaha jis par turant daadi ki halki daant bhi padi. Muskaan khush thi aur maa ke sath apni badi behan se gale mil kar wo tab tak yaha khadi rahi jab tak car aankhon se aujhal na ho gayi.
"Ab tum yahi rehne wali ho kuch din. Mere sath aur is shaitaan ke kaan kheench diya karo nahi toh sar chadh jayega tumhare.", Muskaan ko liye Kaushalya ji wahi khadi thi aur jaane kyun unhone is bachi ke sath kuch alag sa ehsaas paaya tha.
"Waise mujhe toh Vikas bhaiya ke sath yaha raat me aana he tha. Lekin kal bhi aapke pas he ruk jaungi shaadi jaane tak."
"uske baad bhi jab tak main na kahu. Parso ghar khaali ho jayega toh main tere se dhero baat karungi.", Kaushalya ji ne apne sath lagate hue kaha tha aur unhe bada atcha lag raha tha Muskaan ko jaan kar.
"Thik hai lekin fir aap mere sath waha haveli chalengi mujhe chhodne."
"Haan kyun nahi chalungi. Aa ab tujhe main kuch deti hu, tere liye liya tha maine. Suna hai tumhe sabse jyada pyaare tumhare pita hai? Main bhi apne pita ji ki laadli thi."
"Aapko ye sab Arjun ne bataya na daadi?"
"Nahi. Teri diary ne jo tu pichli baar bag ke sath he bhool gayi thi baithak me. Maaf karna tumhari ijajat ke bina padh li. English padhne me utna maja toh nahi aata lekin tum atcha likhti ho.", Diary wali baat sunn kar Muskaan ek pal jaha hairaan hui wahi khush bhi.
"Koyi baat nahi aap padh sakti ho. Maine socha tha ke motorcycle se gaanv jaate hue he kahi bag gir gaya hoga. Waise kapdo se jyada jaruri toh diary he thi aur ab aapke paas hai toh matlab ab tension nahi. Waise aapne poori padh li?"
"Nahi 2 kavitaye he padhi thi aur beech beech me tere dada ji se arth poochne pade mujhe. Fir ek kavita toh unhone he poori padh kar sunaai mujhe aur unhe bhi shayad thoda dukh hua lekin fir atcha bhi laga ke aisi samajhdar betiyan bhi hoti hai. Chal thodi der yaha mere kamre me he araam kar le fir shaam ko samay nahi milne wala.", Kaushalya ji jis adhikaar se Muskaan ko apne sath liye ja rahi thi ye jaise swatah he in dono ko ek majboot adrishya taar se jodta tha. Pyaar ka aur ek dusre ke liye aadar ka aur usme umar koyi badha na thi.
"Matlab aap bhi apne papa ki duniya he thi, hain na?"
"Bilkul."
.
.
Shaam aksar thoda deri se he hoti hai grishma hritu me lekin dinbhar ki bhaag-daud aur mehmaan rishteydaro ke beech jaise samay pankh laga kar udd raha tha. Filhaal toh Pandit ji ke ghar me sirf pariwarik sadasya aur kareebi rishteydar he the kyonki baaki sabhi apne apne thikane ja chuke the raat ko sangeet karyakram me shamil hone se pehle tayaar hone ke liye.
Yaha bhi har kamre me ghar ki bahuen, betiyan aur unke bache sajne sanwarne me he vyast the. Lalita ji ki taraf jahan unki bhabhi unke sath thi wahi Krishna ji ke kamre me Renuka, Madhu aur Shalini tyaar ho rahi thi. Parlour se bulwayi gayi ladkiyan filhal Madhuri ko tayaar karne me lagi thi lekin unki sewa Priyanka, Vinita ke sath Richa bhi leti dikhi. Har rang jaise aaj is ghar ki khoobsurti par fabb raha tha aur aisa he drishya tha kuch Rekha ke kamre me jaha Rajeshwari ne wahi saree badan par lapeti thi jo Umed khaastaur pe Delhi se leke aaya tha apni ardhangini ke liye. Rajeshwari ko tayaar hone me madad karne ke sath sath Komal apni maa ki saree bhi saleeke se set karke jaane he lagi thi.
"Komal beta, meri bhi help tumhe he karni hai. Mujhe saree ke baare me sirf utna he pata hai jitna tumhari maa ne sikhaya aur pehnaya. Upar se itne lambe kapde ko bandhna toh mere bas ka kaam nahi.", Romela andar aate ke sath he kursi par ja baithi. Komal ne mooh me baksua rakhe he muskura kar ishara diya ke wo tayaar hai.
"Maa, ye aapki saree ho gayi aur ab aap apne baal thik karo tabtak main Romela aunty ko tayar karti hu.", Komal ne saree aur blouse ko kandhe ke pas baksue se jodd kar pallu ghuma kar apni maa ke dusre kandhe par kiya aur alag ho gayi. Ab tak Romela ne bhi aadatan jism se top aur skirt hata kar bag khol liya tha. Skirt nikalne se pehle wo badan par kapda lapet chuki thi aur peticot utha kar store ki taraf badh gayi. Rajeshwari gor se dekh rahi thi us adhbhut gorvarn jism ko jis par kaali bra pal bhar me he uske dimaag me chhap chuki thi.
"Ye Romela sachmuch apne desh ke hisaab se 10 saal aage he hai Rekha. Waise utni he khoobsurat jitni bindaas hai."
"Haann.. Wo thoda bahar ka asar barkarar rahega he lekin aadat dhire dhire badal rahi hai. Pehli baar toh jaisa upar dekha waisa he niche tha.", Rekha ne badi dhimi awaaj me jawaab diya tha kyonki kamre me Komal bhi thi jo is waqt almari se Romela ke kapde nikal rahi thi. Kaali saree, blouse aur uske anusar he baaki sabhi cheeje.
"Hahaha.. dekhna kahi tere behkave..
"Shhh.. aisa bilkul nahi hai. Aur ye us maamle me bahot jyada he paramparik soch wali hai. Baat karke dekhna is se toh jaan jaogi ki andar se bilkul waisi he hai jaisi tum ya main. Komal, teri aunty ko main tayaar karti hu beta. Tu khud bhi tayaar ho ja apne kamre me ja kar. Alka, Rupali ko bhi keh dena nahi toh sabse aakhir me wahi reh jayengi. Aur ye Ritu kaha hai?", Rekha ne apni beti se kapde lene ke sath he usko tayaar hone ka nirdesh diya.
"Maa, Alka toh tabhi ready hogi jab Ritu hogi. Aur Rupali pichle ghar he hai Tara, Gurdeep ke sath. Swati bhi wahi gayi thi Zubeidaa aur Jasleen ko le kar. Haan Ritu aur Preeti nahi dikhaai di. Shayad Babita didi ke sath ho. Aap kar dengi Romela aunty ko ready?"
"Haan main kar dungi meri bachi. Tu ab jaa aur tere papa ke aane se pehle tayaar ho ja. Ritu shayad Babita ko he tayar kar rahi hogi Preeti ke ghar. Aaisha bol kar gayi thi ki Preeti ki taraf ja rahi hai matlab wo sab udhar he honge. Haan, ek baar Anamika chachi se pooch lena usko kuch chahiye ho toh. Bache ke sath mushkil na ho kahi. Waise toh Damini didi hai unke sath.", Idhar Romela bhi petikot baandh kar bahar aa chuki thi aur Komal ne haami bharne ke baad bahar aa kar darwaja fir se laga diya. Aangan me he mulakaat Aanchal se hui jo thodi pareshan si dikhi.
"Aapko kuch chahiye kya Aanchal?"
"Komal, wo mera bag bagal wale kamre me tha lekin abhi toh waha tala laga hua hai. Maa aur maami (Anamika) tayaar ho bhi gayi hai lekin mere kapde kaise nikalu.?", Aanchal ka matlab tha Arjun ke kamre se.
"Aaru ke kamre me idhar se tala? Waha toh Shalini bua thehri hui hai. Main abhi pata karti hu wo bagal wale kamre me he hai.", Komal ne Krishna chachi ke kamre me jaate he kaam ki baat kari. Shalini bua ne bhi taale ki baat se inkaar kiya toh Komal kuch soch kar Aanchal ko liye bahar ki taraf se upar wali manjil ki aur badh gayi. Yaha sirf darwje aapas me sate the aur jaise he darwaja dhakela toh bister pe PP Sharma, Raman Sharma, Vinod ke sath unke he agyaat dost ko baithe paya. Komal ko waha saamne dekh ek baar toh Vinod ke chehre par hawaaiyan udne lagi thi aur bagal me Aanchal bhi sath hai ye PP Sharma ne bhi dekh liya tha. Paani jaisi rangheen bottle ko turant bister ke niche rakhta Vinod uth khada hua. Beech me 4 gilas abhi bhi jyon ke tyon the.
"Andar aane se pehle darwaja khatkana toh chahiye tha beti."
"Chacha ji, kamre me us taraf se tala aapne lagaya tha? Aur aapko maloom hai yaha Shalini bua ke sath Renuka bua bhi ruki hui hai?"
"Mama thodi der pehle aap bagal wale kamre me isliye he aaye the? Aur Papa aapko bhi yahi kamra mila baithne ke liye?", Ye swar Aanchal ka tha jis par teen logo ke pas toh koyi jawaab na tha par wo agyaat sa shaksh khud ko bolne se rok na paya.
"Kya pahaad toot pada koyi agar shaanti se kamra band karke baith gaye? Bacho ko jubaan nahi ladani chahiye."
"Naveen, tu mat bol bhai. Beta, hum toh bas isliye yaha baithe the ki baaki har taraf log aa jaa rahe the. Pata hota ki Shalini idhar ruki hai toh apni baithak kahi aur lagate. Vinod, samaan pack kar apna aur wahi palace me chal kar baithte hai.", PP Sharma ne aanan faanan me he sabhi namkeen, bhujiya ityaadi ek plastic ki panni me bhari aur Vinod ne bhi gilaas gatte ke bakse me rakhne ke baad wo bottle apne pajame ke andar chhupa li. Ye charon bahar nikalne lage thi ki Komal ne hath saamne kar diya.
"Taale ki chabi chacha ji.", Sharminda sa hote Vinod ne jeb se chabi nikaal kar Komal ke hath me rakhte hue kaha.
"beti is baat ko yahi tak rakhna. Tau ji khamkhwaah shaadi byaah me bhi sunane se nahi hatenge.", Vinod ke chehre par aayi sharmindgi dekh Komal ne bas haami bhari aur andar aate he bister saaf karne lagi. Aanchal bhi apne pita aur mama ki harkat se aahat thi lekin filhaal wo almaari se apna bag nikalne lagi. Is dauraan Komal ki najar bister se farsh par gire us chote se kagaj par padi.
'Ye kya likha hai? S, U, N... aur gole me A ke niche Tau ji.. Ye log aakhir kuch toh aisa kar rahe the jo thik nahi hai lekin Arjun ke kamre me he kyun?", Komal ne wo parchi mutthi me qaid karne ke sath he ab bade dhyaan se har jagah ko dekhna shuru kar diya. Uska dil keh raha tha ke yaha jo bhi log the wo kuch toh aisa kar rahe the jo thik nahi tha. Aur paani se bhari katori jisme ek cigratte ka tukda bhi pada tha kagaj ke sath wo Komal ke hath aa gaya.
'Swati, XXXX college..", Aur baaki kagaj jaise jalne ki wajah se paani me ghul he chuka tha. Komal ka dimaag ghoom chuka tha aur usne Aanchal ke nikalte he wo pehle wali parchi dhyaan se dekhi.
"Shankar, Umed, Narinder.. A matlab Arjun jo in teeno ke sath he juda hai. Vinod chacha ke tau ji matlab dada ji.. Suna tha ke wo thik insaan nahi hai lekin yaha jaise bahot kuch ho raha hai aur tala lagane ke matlab bhi yahi hoga. Papa se baat karna.. nahi nahi Ritu he baat karegi.", Apne aap se he sabhi atkale lagati hui Komal ab ek pal aur na ruki is kamre me lekin jaise kismat kharaab thi ki seedhiyon se niche aate he saamne Ritu ko apne pita se he baat karte paya.
"Lo papa didi bhi aa gayi. Didi, papa ke kapde la do na maa ke kamre se. Maine tayaar hone pichle ghar jana hai aur Alka meri he wait kar rahi hai. Waise aap Aaru ke kamre me gayi thi.?", Ritu is waqt bas ek dheele se pajame aur lambi tshirt me he the kaam karne ki wajah se. Shankar ji bhi abhi abhi laute the jo bade gor se apni badi beti ka chehra padhne ki koshish karte lage.
"Koyi baat hai kya Komal?"
"Main aapke kapde leke aayi papa. Aapse main palace me he baat karti hu.", Komal ne iske aage kuch na kaha lekin Shankar ji jaan gaye the ki kuch toh baat jarur hai aur Komal ke aane se pehle udhar se he Aanchal nikli thi kapdo ka bag liye.
"Ye bhi ajeeb ladki hai. Atcha tu chal tayaar ho ja meri chashmish, main bhi naha ke kapde badal lu. Jaane ka dekh lena tum log. Arjun ki car aur safari tumhare he hawale hai. Bas tum ladkiyan dekh lena apna baaki sabhi ko main aur tumhare chacha log le jaayenge.", Taar ke upar se toliya utha kar Shankar ji bathroom ki taraf badh liye lekin Ritu jaise ab kuch kuch asehaj mehsoos kar rahi thi.
"Ae Alka, ye Komal didi ki baat kuch samajh nahi aayi."
"Chal na pehle tayaar ho jaaye fir idhar aa kar kar lenge unse baat.", Alka hath khinchti hui Ritu ko liye pichle ghar ki aur chal di. Dono paidal he ja rahi thi aur is baar Alka ki najar ne wahi log dekhe jo Arjun ke kamre me Komal ko dikhe the lekin is badi jeepnuma gaadi me un charo ke sath 3 aur log the.
"Ye Vinod chacha ke dost dekh kaise kaise hai Ritu? Ajeeb se aur ye ghar me aaye bhi nahi the."
"Alka wo aadmi jo sabse aakhir me baitha hai wahi toh hamari ghar se nikla tha thodi der pehle Vinod chacha aur dono fufa ke sath. Ye log ghar me kaha tha?", Ritu ki shanka kuch badh si gayi thi aur Alka se behtar usko kaun jaan sakta tha.
"Tension matt le jaan. Is tharki chacha par meri najar bahot pehle se hai aur agar ye kuch bhi aisa waisa soch raha hai na toh bas sochta he reh jaayega. Arjun ke saamne jikar mat karna filhaal.", Alka jaise bahot kuch jaan chuki thi Vinod ke baare me aur in dino Ritu ke sath uski gehri charcha ho na saki thi ghar ke aise vyast mahol me. Lekin jaise ab hone he wali thi kuch samay me.
"Tharki se yaad aaya, aaj toh waha sangeet me bahot se log aane wale hai. Thoda dhyaan rakhna kahi aisa na ho ki koyi unch neech ho jaaye kisi mehmaan ladki ke sath. Tujhe toh pata he hai ke maine khud he bhugta hua hai kuch mahine pehle Malhotra uncle ki beti wali shaadi me.", Ritu thoda sanjida ho gayi thi aur Alka uska kandha thapkati hui barabar kadam milate hue boli.
"Wo Ritu bas us din tak he thi meri jaan. Is Ritu ke saamne agar aisa waisa kuch hua toh main jaanti hu ye atche atche ko naani yaad dila sakti hai. Waise ek pate ki baat batau?", Alka ki baat sunn kar Ritu ke masoom se chehre par parichit muskurahat aa chuki thi.
"Haan toh agar main naa bhi kahungi toh kya tu batane se hategi? Bol aur thoda tej chal. Waha mahabharat chal rahi hogi aur jaane aaj ye ladkiyan kya bijliyan girane wali hai.", Ritu ki baat Alka ke palle padd chuki thi jis par woh hansti hui thoda tej chalne lagi. Charhari aur lambe kad ki ye dono apsara sareekhi ladkiyan zindadil hone ke sath he har pehlu par aise he vichar rakhti thi ek dusre ke sath.
"Manju wale maamle me apradhi aur koyi nahi ye Vinod chacha he tha. Isne he Manju ko kidnap karwane ki koshish ki thi aur lagbhag kar he liya tha. Arjun ne waisa hone na diya aur sabse pehle wahi jaan gaya tha ki Vinod chacha ki asliyat kya hai. Bas kisi wajah se wo unhe saja nahi dena chahta. Aur ek baat jo maine mehsoos ki hai wo ye hai ki Anamika chachi ki life bhi bahot hadd tak ghutan se bhari hai aur wo Arjun ko ek devar ya bhai ki tarah jyada dekhti hai. Apna Arjun toh hai he sabke dil ko samajhne wala par wo kar kya raha hai ye samajh se bahar hai mere. Tera kya kehna hai?"
"Wo gaanv ja raha hai jabki usko ye baat atche se pata hai ki uske peeche yaha kisi ka dil nahi lagne wala, khaaskar ke dada ji ka. Hum toh chal aapas me he rehnte hai lekin dada ji aur maa-chachi ka din nahi poora hota Arjun ke bina. Aur pehle toh dada ji kabhi chahte he nahi the ki wo udhar jaaye par ab wo kuch bole tak nahi. Arjun aur Vinod chacha kal raat bhi eksath he is taraf aaye the aur uske baad Vinni didi ko chhod kar kuch der tak wo akele he kahi gaye bhi the. Agar Arjun is tharki chacha ko pehchaan chuka hai toh fir wo kuch bada karne ki soch raha hai jiske liye wo jadde khodni gaanv se he shuru karega. Dada ji ko dukh na pahuche isliye wo jarur ye sab waise he karega jaisa hum me se koyi nahi karta.", Ritu ne dhyaan diya toh ghar ke andar sabhi ladkiyon ki awaaje aa rahi thi jiska matlab tha ke wo thoda aur baat kar sakti hai.
"Hum kaise karte hai aur wo alag kaise karega? Tu is jagah mujhse thodi jyada better hai kyonki chahe hum dono pyaar us se barabar karti hai lekin usko samajhna tere bas ki he baat hai. Wo jaanboojh kar mujhe aise dikhata hai ki jaise sabkuch chori chipe kar raha ho lekin uska maksad hota hai meri najro me jaan boojh kar aana. Toh teri baat thodi samajh me toh aayi hai ke wo pehle he soft warning de deta hai lekin samajhna na samajhna ye saamne wale ke hath hai. Toh ab tujhe kya lagta hai ki wo kya karne wala hai?", Alka ki baat se ittefaaq rakhte hue Ritu ne aage batana jaari kiya.
"Darling, aisa hai ki munna pyaare ab pehle wale nahi rahe jo apna gussa ya pyaar ekdum dikha deta tha. Anamika chachi aur unke bete ke sath reh kar he Arjun kuch aisa karna chahta hai jis se Vinod chacha ko ehsaas ho wo galat hai. Nahi toh Manju wala kissa toh dur ki baat, jab is tharki chacha ne mere motorcycle wala taar chheda tha Aaru unko tabhi lapet leta par usne aisa nahi kiya. Ab wo gaanv jaayega aur uske baad baaki chuttiyaan wahi rehne wala hai. Matlab Aaru dada ji ka he kaam kar raha hai. Ek sanyukt pariwar jisme koyi bhi galat na ho. Daadi ne ek baar kaha bhi tha ke dada ji hamesha waha khush rehte the jaha unke pita ji aur maa rehte the. Unhe aaj bhi is ghar se jyada apnapan waha mehsoos hota hai lekin ab dada ji ki zindagi hum log hai. Aaru shayad ... nahi yakeenan wahi karne ki koshish karega. Chal ab bahot baatein ho gayi. Andar chalte hai aur dekhe in sabne kya gul khilaye hai. Aadhe ghante me pahuchna bhi hai, 7:30 ho gaye."
"Haan Sanjiv bhaiya toh tayaar bhi ho chuke the jab hum ghar se nikle. Aaj jara mehmano ko he thumke lagane denge, hum kal mehnat karenge. Hehehe.", Alka ne chalte hue Ritu ke kulho par chataak se thappad jamaya toh wo bhi ouch karti hui fir hansne lagi. Itna toh saaf ho gaya tha inki charcha se ki Arjun is pariwar me mahabharat ko hone se rokne wala veer tha na ki har galat soch wale vyakti ka sanhaar karne wala. Ab sangeet karyakram shuru hone wala tha kuch he antraal baad aur kahi na kahi mel-jol ke alawa waha bahot kuch hone wala tha. Bijliyan girna bhi nischit tha jab itni khoobsurati waha jhilmilane wali ho lekin dekhna tha ke Pandit Rameshwar Sharma ke pauta-pauti ke sangeet samaroh me koyi gustakhi karega ya mahol hamesha ki tarah garimapurn aur pariwarik rehne wala hai.
Pratyaksh-Apratyaksh
Rupali ghar ke bahar he khadi jaise Arjun ki pratiksha he kar rahi thi. Ghar ke sabhi log apne apne karyo me vyast the aur aisa hona laajmi bhi tha kyonki ghar me 2-2 shaadiyan thi wo bhi agle he din. Dhero mehmaan aaye the aur unki aav-bhagat karne ke sath he sabhi ko apni apni tayaariyan bhi dekhni thi. Arjun jaise he gali me pahucha toh car lagane tak ki jagah na dikhi. Malhotra ji ke ghar ke saamne he car rok kar wo abhi samaan nikaal he raha tha ki Rupali uski bagal me aa khadi hui.
"Tumhe andar baithak me bula rahe hai. Kitni he der se intjaar kar rahi hu tumhara lekin lagta hai tumhari shopping kal bhi khatam nahi hogi.", Rupali ne gor nahi kiya tha ke car ki pichli seat par bhi 2 log hai aur dono taraf se darwaje khulne par usko apni galti ka ehsaas hua. Zubeidaa ne hanste hue ek bag uski taraf badhaya aur Arjun car ki chabi Romela ko deta hua ghar ki taraf badh gaya.
"Aunty, aap he rakh lijiyega ye chabi. Main baad me le lunga. Rupali didi thodi help kar dena aunty aur didi ki.", Aur itna bol kar he wo chalta hua apne ghar me chala aaya. Abhi tak mehmano ki atchi khaasi chehal pehal thi. Uske nanihal se bhi log aaye hue the aur Walia aunty ji bhi Annu ke sath uske saamne se he andar ki taraf gayi thi. Arjun ek sarsari najar har taraf daalne ke baad jaise he baithak me pahucha, kadam wahi thithak gaye. Din me aksar aise samay par khule rehne wale darwaje band the aur unhe kholne ke sath he sabse pehle uski najar mili us beinteha khoobsurat lekin is samay udaas se chehre par. Sakshaat Bindu urf Bindiya waha baithi thi aur uske bagal me sar dhake Shabnam lekin unki nigaah Arjun par padne se pehle he Muskaan ne apne naam swaroop ek dilkash muskaan ke sath jaise uska swagat kiya.
"Namastey Chachi.", Arjun ne aage badh kar apni daadi ki bagal me baithi Bindiya ke saamne jhuk kar jis sammaan ke sath mulakaat ki thi usko dekh kar jaha Bindiya thoda seham sa gayi wahi saamne ki taraf baithe Rameshwar ji ke chehre par khushi thi. Yaha abhi kuch aur log bhi the jine Arjun ke chacha Narinder ji, Col sahab aur IG Kapoor the. Alka yahan sabhi ke liye chai-nashta rakhne ke baad Muskaan ko apne sath he le gayi.
"Namastey Arjun. Shayad abhi bhi mujhe aisi bhent ki kalpana nahi thi.", Ruke hue se lafjo me Bindiya itna kehte kehte thoda sharminda mehsoos kar rahi thi aur Arjun ne ye bhaamp kar Shabnam ko ek taraf karte hue un dono ke beech he jagah bana li.
"Aap jo bhi kalpana kare lekin sach toh yahi hai na ke aapke liye main koyi anjaan nahi. Aur agar aapko abhi bhi aisa lagta hai ki sabkuch thik nahi hua toh main aapki madad ko ehsaan maan leta hu.", Yaha Arjun ne ye baat waha England me Annu Walia ki madad ke sandarbh me kaha tha. Aur uski baat Bindiya ke alawa bahot aur bhi log sunn rahe the. Is baar Bindiya ne apna chehra bagal me baithe is yuvak par karne ke sath kuch pal usko dekha aur fir bade sneh se ek hath Arjun ke gaal se firate hue sar pe le aayi.
"Tumse behtar aur kaun samajh sakta hai meri haalat. Maaf karna itne saal baad bhi kuch jakhm bharne me samay lagta he hai. Aur ehsaanmand toh main aur meri dono betiyan tumhare hai ki tumne na sirf wo sab rok diya balki Shabnam ke sath sath mujhe bhi jiwan ka sahi drishtikon dikhaya. Uncle (Pandit ji) ji se toh maafi maang li hai lekin tumhe kya kahu?", Bindiya ki aankhon se aansu ludhak kar niche girne lage. Lekin chehre par ab dard na tha bas kuch tha jisko sirf Arjun he samajh raha tha ya fir Kaushalya ji.
"Isko toh tu beta he keh Bindu aur ye tere uncle ji na hamesha ek he baat kehte the ki agar inhe fir kabhi bhagwan ne mauka diya toh wo tujhse maafi maang kar tere har dard ko door karne ki poori koshish karenge. Anjaane he tera aur teri maa jiwan barbaad hua aur ye bhi sach hai ki iske baare me mujhe ya mere bacho ko koyi jaankari nahi thi. Tere uncle ki majboori thi jo mujhe abhi pata chali hai aur baaki main ab jaan he lungi. Bahot aansu baha liye ab inhe bacha ke rakh. 2-2 betiyan hain aur unki baari me inki jarurat padegi.", Kaushalya ji ne paani ka gilas aage badhaya tabtak Arjun us chehre se aansu saaf kar chuka tha.
"Ye aapki aur Shabnam ki baaki files hai Mrs Bindiya aur aapke upar lage sabhi charges tatkaal roop se khatam kar diye gaye, pratyaksh ya apratyaksh. Lekin baaki jo log shamil the un par system apni kaarwahi jari rakhega. Us se aapko koyi pareshani nahi aayegi iska eitbaar rakhiye. Ab main chalta hu Pandit ji, kal vivaah par he milte hai. Atcha bhabhi ji, aur koyi sewa ho toh jarur kahiyega.", IG Kapoor ne wo hare aur neele rang ki 2 file wahi Shabnam ke saamne karne ke baad ijajat chaahi aur Pandit ji se hath mila kar nikal gaye. Un file ko Shabnam ne he Rameshwar ji ko thama diya aur yahi wo pal tha jab Narinder ji ki najre Shabnam se mili.
"Ab agar tum chaho toh Shabnam ka dakhila bhi idhar he karwa sakti ho lekin mujhe lagta hai ki tumhe bhi iska sath chahiye hoga waha. Tumhari maa ke sanskaar me toh shamil nahi ho saka lekin Pintu ke sath Haridwar jarur jaunga. Tumhe rukna chahiye kal tak ke liye.", Rameshwar ji ne diwan par dono file rakhne ke baad Bindiya se aage ki charcha shuru ki toh Bindiya ka dhyaan abhi bhi Arjun par he the.
"Le ja isko apne sath agar tujhe ye itna pasand aaya ho. Lekin tere uncle ki bhi sunn le.", Kaushalya ji ne hilate hue kaha tha aur Bindiya sharmina hoti hunh he keh paayi.
"Ji sath le jaane wali toh baat he nahi hai. Dil me sabse badi chahat yahi thi ki bas ek baar main us insaan se jarur milu jiska dil sirf dena jaanta hai chahe badle me dukh mile ho. Waise bhi niswarth dil kisi ek ka naho hota aunty ji toh le jana bekaar he hai. Bas is se itni gujarish hai ki Muskaan se milta rahe chahe mahine me ek baar he mumkin ho. Wo bahot maanti hai isko aur Arjun me usne he sabse pehle wo insaan dekha tha jo badle me yakeen nahi rakhta. Haan badlaav me jarur rakhta hai aur aaj main yaha baithi hu is se bada udaharan kya hoga?"
"Rehne do chachi maine itna bhi kuch nahi kiya. Aur Muskaan ki chinta aap na he kijiye. Khud dada ji ne ye jimmewari le rakhi hai ab toh. Haan aapne shaadi wala jawab nahi diya.", Arjun ne ab apne aaspas dhyaan diya aur Shabnam ko apni taraf dekhta paa wo muskura diya.
"Nahi beta abhi mumkin nahi hai lekin vaada karti hu bahot jald milne aaungi. Uncle raat ki he flight hai wapsi ki aur sabkuch ekdum se hua tha isliye abhi thoda samay chahiye. Aapka kabhi bhi England aane ka vichar bane ya waha kaisa bhi kaam ho, sabse pehle aap mujhse he baat kijiyega.", Bindiya ki baat khatam hote he Kaushalya ji ne apne pati ke sath haami bharte hue chai ka cup pakdaya. Shabnam ne bhi chai le li thi aur wo gor kar rahi thi ki beech beech me Narinder ji usko he dekh rahe the. Itni der se waha baithe hone ke bawjood wo abhi tak kuch nahi bole the lekin ab unka bhi mooh khula.
"Mera ek sawaal hai agar papa aapko koyi problem na ho? Bindiya tum chaho toh jawaab de sakti ho aur na chaho to ateet se wapis toh kuch aane wala nahi.", Narinder ji ki baat sunn kar Kaushalya ji ko toh thoda jhatka laga lekin jis se jawab chahiye tha usne haan me sar hila diya aur khud Pandit ji ne jaise aagya de di thi. Arjun abhi bhi wahi tha aur shayad yahi wajah thi Kaushalya ji ke chaunkne ki.
"18 saal pehle ek ghatna hui thi jisko anjaam dene wali nurse aaj tak nahi mili. Tumhare pas koyi jawaab hai?", Bindiya is sawaal par feeki muskaan deti hui badi gehraai se sawaal karne wale ko dekh rahi thi jaise usko ye Narinder duniya ka sabse bewkoof insaan najar aa raha ho.
"Sabse pehle toh bata dena chahungi aapko ki mujhe bhi dukh hua tha us haadse ka jaan kar. Dusri baat wo jagah shayad mujhse behtar aapke jaankar ki thi aur waha jo bhi log the unme se he koyi shamil hoga. Aur jitna mujhe pata hai Shankar ji ki najro se fir bhi koyi ek baar bach nikle lekin aapki, aapki se mumkin nahi. Fir se talaash kijiye Mr Narinder, jab kabhi chot se hamare dil ko peeda hoti hai hum anjaane he baaki shehar jala dete hai lekin choti choti baatein najarandaaj karne wale bhi hum he hote hai. Ab toh kaafi samay gujar chuka hai, dil me tapish bhi nahi hogi. Fir se jaanch kijiye, Inderjeet jo hain.", Bindiya ne apne kehne ke andaaj par turant he Kaushalya ji se maafi maang li aur khade ho kar jaane ki aagya bhi.
"Tum yaha tak taxi se aayi ho bitiya?", Rameshwar ji ke sawaal par Shabnam ne sar hilaya.
"Pushpak Rajgarh tak chhod gaya tha aur aage wahi se taxi karwa di thi uncle ji. Waise ye behtar hai kisi ko pareshan karne se."
"Satish, bhai inka samaan apni kisi bhi gaadi me rakhwao. Ye Arjun khud he rakh dega aur Mukesh ko bolo ki wo inhe na sirf Airport chhod kar balki vida karke bhi aaye.", Rameshwar ji jabtak hidayat dete tab tak Muskaan bhi idhar aa chuki thi jiske hath me Lalita ji ki taraf se diya gaya ek bada sa bag bhi tha. Kapde, mithaai ityaadi ka. Bindiya mana karti rahi lekin Kaushalya ji ke pyaar se mana karne se maan bhi gayi. Taxi driver ka hisaab karne ke paise bhi khud unhone he Arjun ko diye.
"Bhai sahab main Amreek ko bhej deta hu, ghar ki duty ke liye bulwaya tha aur Arjun beta sierra me samaan rakhwa do Bindiya ka.", Col sahab ne bhi utni he jaldi kamaan apne hath le li. Arjun abhi Shabnam ke sath bahar ja he raha tha ki Bindiya mooh dhone Alka ke sath bathroom ki taraf gayi toh Narinder ji thoda aage chal kar wahi ruk gaye.
"Tumse toh baat bhi nahi kar saki aur ab wapis bhi jana hai.", Shabnam Arjun ko gaadi se bag nikaal kar Col sahab wali car me rakhte hue dekh rahi thi. Dono ke beech abhi baat shuru hui thi itne samay me.
"Main bhi chahta tha ki aapke sath atchi mulakaat ho. Khair abhi mahol nahi hai toh iska matlab ye toh nahi ki fir baat nahi hogi. Waise Vikas bhaiya ne bataya tha ke aap log aayenge lekin time unhe bhi nahi pata tha.", Pichli seat ke niche ek bag rakhne ke baad dusra bag seat ke upar sahi se rakh kar Arjun ne darwaja band kiya toh Shabnam uske gale he lag gayi. Wo dono gali me he toh khade the aur aise ekdum se Shabnam ke gale lagne par kuch pal toh Arjun ko samajh he na aaya ke kya ho raha hai. Lekin wo fir samajh gaya tha ke insaan aakhir bhaavnao ko aise he toh prakat karta hai. Shabnam ki peeth thapak kar wo alag hua toh wo najre jhukaye uska shukriya adaa kar rahi thi.
"Naani ki tehravi par papa bhi aayenge Arjun. Fir tumse jarur milungi."
"Main shayad Punjab hounga tabtak lekin aap bata dena jab wapis aa jao. Mil toh sakte he hai.", Aur idhar Col sahab bhi Amreek ko liye aa chuke the.
"Bitiya apni maa ko bhi bula lo. Fir 4 ghante toh jaane me bhi lagenge.", Col sahab ki awaaj sunn kar Shabnam apni maa ko bulane chal di aur Col sahab Arjun se baatchit me lag gaye. Aksar aisa he karte the wo.
"Wo main kya keh raha tha Bindu?", Idhar Narinder ji najre jhukaye hue jaise kuch badi baat kehna chahte the aur unke hatho toliya le kar chehra saaf karti hui Bindiya bhi idhar udhar dekh rahi thi jaise usko bhi anhoni baat ki shanka ho.
"Bolo Inder jo bhi kehna hai."
"Wo.. Main keh raha tha.. wo.."
"Bol do Inder jo bhi kehna chahte ho. Fir baat ho na ho pata nahi."
"Shabnam ka khayaal rakhna. Meri wajah se tumne shayad usko he wo sab karne ke liye chuna tha. Maaf kar dena lekin sach tumhe bhi pata hai. Agar tumhe wahi chahat thi toh kam se kam usko sambhalna chahiye tha. Shankar bhi maafi maang lega tumse jab sach pata chalega bas tum ye dhyaan rakhna ki zindagi me raqeeb-gunehgaar jo bhi ho bas bache beech nahi aane chahiye. Mera dil karta hai ki usko apne seene se laga lu aur batau ki wo kaun hai. Bas darta hu ki uske baad hajaro sawaalo ka saamna kaise karunga. Maaf kar dena.. "
"Haan inhe maaf kar dena Bindiya lekin isme aap dono ki galti nahi hai. Aapki toh bilkul bhi nahi aur mere pati ne jiwan me kabhi koyi galat kaam nahi kiya. Inhe mujhse pyaar tha aur aaj bhi karte hai. Lekin aajtak wo ek kaagaj inhone hajaro baar padha aur maine har baar inke chehre par alag alag he bhaav dekhe. Kuch eksaar tha toh ye ki inki ek beti aur bhi hai jisko ye apne seene se laga nahi sakte.", Krishna ji ne toh Bindiya ke jawaab dene se pehle he apne pati ka hath thaam kar wo baat keh di thi jo shayad he koyi patni kehne ki himmat rakhti. Lekin dono pati patni ek dusre ko utne he sneh se dekh rahe the jaise unme kabhi koyi raaj tha he nahi.
"Tumhe bura nahi laga tha Krishna?"
"kis baat se? Inki beti ki jaankari hone par? Aapka inke prati aisa prem jaan kar jisme paane ki chahat he nahi? Ya fir khud ko pratadit mehsoos karke? Teeno he baaton ne mujhe jhakjhor ke rakh diya tha aur naubat ye thi ki mujhe jeene ki itcha tak na rahi lekin ye Inderjeet jo hai inhone fir se apni tapasya dikha kar mujhe hansil kar liya. Pyaar karna galat nahi hai Bindiya ji toh aapko kaise galat kahu. Baaki main toh Inder se itna he kahungi ki aapko Shabnam se gale milne me parhej nahi karna chahiye. Haan ab sabki duniya apni apni grahasthi me nirdharit hai toh iska samman jarur kijiyega patidev.",Krishna ji itna kehti hui hath jodd kar wapis andar chali gayi lekin inse kuch he duri par khadi Shabnam ki aankhon me itna paani tha jiska hisaab in dono ke paas na tha.
"Toh aapko kya kahu main?"
"Filhal toh uncle he thik hai aur baaki tumhari marji. Haan apni maa ke saamne toh papa matt keh dena aur waise kisi ke bhi saamne matt kehna. Tumhe nahi pata Shabnam, jab tumhari maa ne mujhe bataya tha.. Chhodo wo sab aur bas khush rehna. Main aaunga tumse milne aur tumhare papa se bhi. Bindiya, ye shayad tumhe bulane he aayi thi.", Narinder ji bina Bindiya ki taraf dekhe Shabnam ke kandhe par hath rakhe hue usko liye aise bahar chale aaye jaise wo uske koyi kareebi dost ya barso se jaankar rahe ho. Andar he andar Shabnam bhi is sparsh ko waisa he mehsoos kar pa rahi thi jaisa usko aajtak kabhi mila he na ho lekin chahat har waqt.
"Bye P.. Aur yaha koyi nahi hai.", Shabnam ne geeli aankhon ke sath he ek baar Narinder ji ko dekha aur turant aage chal kar gaadi me baith gayi. Bindiya ke sath bahar Kaushalya ji bhi aayi thi toh Narinder ji turant Asgar ke tambu ki taraf ja khade hue. Aaj jaise wo chain ki neend so sakte the jo barso se naseeb na hui thi. Bindiya ne toh ek baar bhi unki taraf na dekha lekin Arjun ke maathe ko choomna wo nahi bhoooli.
"Apna khayaal rakhna chachi. Is Muskaan ko waise bhi England pasand nahi.", Arjun ne mahol ko thoda majaak ka rukh dete hue pehli baar Muskaan se shararat karte hue uske baal bikherte hue aisa kaha jis par turant daadi ki halki daant bhi padi. Muskaan khush thi aur maa ke sath apni badi behan se gale mil kar wo tab tak yaha khadi rahi jab tak car aankhon se aujhal na ho gayi.
"Ab tum yahi rehne wali ho kuch din. Mere sath aur is shaitaan ke kaan kheench diya karo nahi toh sar chadh jayega tumhare.", Muskaan ko liye Kaushalya ji wahi khadi thi aur jaane kyun unhone is bachi ke sath kuch alag sa ehsaas paaya tha.
"Waise mujhe toh Vikas bhaiya ke sath yaha raat me aana he tha. Lekin kal bhi aapke pas he ruk jaungi shaadi jaane tak."
"uske baad bhi jab tak main na kahu. Parso ghar khaali ho jayega toh main tere se dhero baat karungi.", Kaushalya ji ne apne sath lagate hue kaha tha aur unhe bada atcha lag raha tha Muskaan ko jaan kar.
"Thik hai lekin fir aap mere sath waha haveli chalengi mujhe chhodne."
"Haan kyun nahi chalungi. Aa ab tujhe main kuch deti hu, tere liye liya tha maine. Suna hai tumhe sabse jyada pyaare tumhare pita hai? Main bhi apne pita ji ki laadli thi."
"Aapko ye sab Arjun ne bataya na daadi?"
"Nahi. Teri diary ne jo tu pichli baar bag ke sath he bhool gayi thi baithak me. Maaf karna tumhari ijajat ke bina padh li. English padhne me utna maja toh nahi aata lekin tum atcha likhti ho.", Diary wali baat sunn kar Muskaan ek pal jaha hairaan hui wahi khush bhi.
"Koyi baat nahi aap padh sakti ho. Maine socha tha ke motorcycle se gaanv jaate hue he kahi bag gir gaya hoga. Waise kapdo se jyada jaruri toh diary he thi aur ab aapke paas hai toh matlab ab tension nahi. Waise aapne poori padh li?"
"Nahi 2 kavitaye he padhi thi aur beech beech me tere dada ji se arth poochne pade mujhe. Fir ek kavita toh unhone he poori padh kar sunaai mujhe aur unhe bhi shayad thoda dukh hua lekin fir atcha bhi laga ke aisi samajhdar betiyan bhi hoti hai. Chal thodi der yaha mere kamre me he araam kar le fir shaam ko samay nahi milne wala.", Kaushalya ji jis adhikaar se Muskaan ko apne sath liye ja rahi thi ye jaise swatah he in dono ko ek majboot adrishya taar se jodta tha. Pyaar ka aur ek dusre ke liye aadar ka aur usme umar koyi badha na thi.
"Matlab aap bhi apne papa ki duniya he thi, hain na?"
"Bilkul."
.
.
Shaam aksar thoda deri se he hoti hai grishma hritu me lekin dinbhar ki bhaag-daud aur mehmaan rishteydaro ke beech jaise samay pankh laga kar udd raha tha. Filhaal toh Pandit ji ke ghar me sirf pariwarik sadasya aur kareebi rishteydar he the kyonki baaki sabhi apne apne thikane ja chuke the raat ko sangeet karyakram me shamil hone se pehle tayaar hone ke liye.
Yaha bhi har kamre me ghar ki bahuen, betiyan aur unke bache sajne sanwarne me he vyast the. Lalita ji ki taraf jahan unki bhabhi unke sath thi wahi Krishna ji ke kamre me Renuka, Madhu aur Shalini tyaar ho rahi thi. Parlour se bulwayi gayi ladkiyan filhal Madhuri ko tayaar karne me lagi thi lekin unki sewa Priyanka, Vinita ke sath Richa bhi leti dikhi. Har rang jaise aaj is ghar ki khoobsurti par fabb raha tha aur aisa he drishya tha kuch Rekha ke kamre me jaha Rajeshwari ne wahi saree badan par lapeti thi jo Umed khaastaur pe Delhi se leke aaya tha apni ardhangini ke liye. Rajeshwari ko tayaar hone me madad karne ke sath sath Komal apni maa ki saree bhi saleeke se set karke jaane he lagi thi.
"Komal beta, meri bhi help tumhe he karni hai. Mujhe saree ke baare me sirf utna he pata hai jitna tumhari maa ne sikhaya aur pehnaya. Upar se itne lambe kapde ko bandhna toh mere bas ka kaam nahi.", Romela andar aate ke sath he kursi par ja baithi. Komal ne mooh me baksua rakhe he muskura kar ishara diya ke wo tayaar hai.
"Maa, ye aapki saree ho gayi aur ab aap apne baal thik karo tabtak main Romela aunty ko tayar karti hu.", Komal ne saree aur blouse ko kandhe ke pas baksue se jodd kar pallu ghuma kar apni maa ke dusre kandhe par kiya aur alag ho gayi. Ab tak Romela ne bhi aadatan jism se top aur skirt hata kar bag khol liya tha. Skirt nikalne se pehle wo badan par kapda lapet chuki thi aur peticot utha kar store ki taraf badh gayi. Rajeshwari gor se dekh rahi thi us adhbhut gorvarn jism ko jis par kaali bra pal bhar me he uske dimaag me chhap chuki thi.
"Ye Romela sachmuch apne desh ke hisaab se 10 saal aage he hai Rekha. Waise utni he khoobsurat jitni bindaas hai."
"Haann.. Wo thoda bahar ka asar barkarar rahega he lekin aadat dhire dhire badal rahi hai. Pehli baar toh jaisa upar dekha waisa he niche tha.", Rekha ne badi dhimi awaaj me jawaab diya tha kyonki kamre me Komal bhi thi jo is waqt almari se Romela ke kapde nikal rahi thi. Kaali saree, blouse aur uske anusar he baaki sabhi cheeje.
"Hahaha.. dekhna kahi tere behkave..
"Shhh.. aisa bilkul nahi hai. Aur ye us maamle me bahot jyada he paramparik soch wali hai. Baat karke dekhna is se toh jaan jaogi ki andar se bilkul waisi he hai jaisi tum ya main. Komal, teri aunty ko main tayaar karti hu beta. Tu khud bhi tayaar ho ja apne kamre me ja kar. Alka, Rupali ko bhi keh dena nahi toh sabse aakhir me wahi reh jayengi. Aur ye Ritu kaha hai?", Rekha ne apni beti se kapde lene ke sath he usko tayaar hone ka nirdesh diya.
"Maa, Alka toh tabhi ready hogi jab Ritu hogi. Aur Rupali pichle ghar he hai Tara, Gurdeep ke sath. Swati bhi wahi gayi thi Zubeidaa aur Jasleen ko le kar. Haan Ritu aur Preeti nahi dikhaai di. Shayad Babita didi ke sath ho. Aap kar dengi Romela aunty ko ready?"
"Haan main kar dungi meri bachi. Tu ab jaa aur tere papa ke aane se pehle tayaar ho ja. Ritu shayad Babita ko he tayar kar rahi hogi Preeti ke ghar. Aaisha bol kar gayi thi ki Preeti ki taraf ja rahi hai matlab wo sab udhar he honge. Haan, ek baar Anamika chachi se pooch lena usko kuch chahiye ho toh. Bache ke sath mushkil na ho kahi. Waise toh Damini didi hai unke sath.", Idhar Romela bhi petikot baandh kar bahar aa chuki thi aur Komal ne haami bharne ke baad bahar aa kar darwaja fir se laga diya. Aangan me he mulakaat Aanchal se hui jo thodi pareshan si dikhi.
"Aapko kuch chahiye kya Aanchal?"
"Komal, wo mera bag bagal wale kamre me tha lekin abhi toh waha tala laga hua hai. Maa aur maami (Anamika) tayaar ho bhi gayi hai lekin mere kapde kaise nikalu.?", Aanchal ka matlab tha Arjun ke kamre se.
"Aaru ke kamre me idhar se tala? Waha toh Shalini bua thehri hui hai. Main abhi pata karti hu wo bagal wale kamre me he hai.", Komal ne Krishna chachi ke kamre me jaate he kaam ki baat kari. Shalini bua ne bhi taale ki baat se inkaar kiya toh Komal kuch soch kar Aanchal ko liye bahar ki taraf se upar wali manjil ki aur badh gayi. Yaha sirf darwje aapas me sate the aur jaise he darwaja dhakela toh bister pe PP Sharma, Raman Sharma, Vinod ke sath unke he agyaat dost ko baithe paya. Komal ko waha saamne dekh ek baar toh Vinod ke chehre par hawaaiyan udne lagi thi aur bagal me Aanchal bhi sath hai ye PP Sharma ne bhi dekh liya tha. Paani jaisi rangheen bottle ko turant bister ke niche rakhta Vinod uth khada hua. Beech me 4 gilas abhi bhi jyon ke tyon the.
"Andar aane se pehle darwaja khatkana toh chahiye tha beti."
"Chacha ji, kamre me us taraf se tala aapne lagaya tha? Aur aapko maloom hai yaha Shalini bua ke sath Renuka bua bhi ruki hui hai?"
"Mama thodi der pehle aap bagal wale kamre me isliye he aaye the? Aur Papa aapko bhi yahi kamra mila baithne ke liye?", Ye swar Aanchal ka tha jis par teen logo ke pas toh koyi jawaab na tha par wo agyaat sa shaksh khud ko bolne se rok na paya.
"Kya pahaad toot pada koyi agar shaanti se kamra band karke baith gaye? Bacho ko jubaan nahi ladani chahiye."
"Naveen, tu mat bol bhai. Beta, hum toh bas isliye yaha baithe the ki baaki har taraf log aa jaa rahe the. Pata hota ki Shalini idhar ruki hai toh apni baithak kahi aur lagate. Vinod, samaan pack kar apna aur wahi palace me chal kar baithte hai.", PP Sharma ne aanan faanan me he sabhi namkeen, bhujiya ityaadi ek plastic ki panni me bhari aur Vinod ne bhi gilaas gatte ke bakse me rakhne ke baad wo bottle apne pajame ke andar chhupa li. Ye charon bahar nikalne lage thi ki Komal ne hath saamne kar diya.
"Taale ki chabi chacha ji.", Sharminda sa hote Vinod ne jeb se chabi nikaal kar Komal ke hath me rakhte hue kaha.
"beti is baat ko yahi tak rakhna. Tau ji khamkhwaah shaadi byaah me bhi sunane se nahi hatenge.", Vinod ke chehre par aayi sharmindgi dekh Komal ne bas haami bhari aur andar aate he bister saaf karne lagi. Aanchal bhi apne pita aur mama ki harkat se aahat thi lekin filhaal wo almaari se apna bag nikalne lagi. Is dauraan Komal ki najar bister se farsh par gire us chote se kagaj par padi.
'Ye kya likha hai? S, U, N... aur gole me A ke niche Tau ji.. Ye log aakhir kuch toh aisa kar rahe the jo thik nahi hai lekin Arjun ke kamre me he kyun?", Komal ne wo parchi mutthi me qaid karne ke sath he ab bade dhyaan se har jagah ko dekhna shuru kar diya. Uska dil keh raha tha ke yaha jo bhi log the wo kuch toh aisa kar rahe the jo thik nahi tha. Aur paani se bhari katori jisme ek cigratte ka tukda bhi pada tha kagaj ke sath wo Komal ke hath aa gaya.
'Swati, XXXX college..", Aur baaki kagaj jaise jalne ki wajah se paani me ghul he chuka tha. Komal ka dimaag ghoom chuka tha aur usne Aanchal ke nikalte he wo pehle wali parchi dhyaan se dekhi.
"Shankar, Umed, Narinder.. A matlab Arjun jo in teeno ke sath he juda hai. Vinod chacha ke tau ji matlab dada ji.. Suna tha ke wo thik insaan nahi hai lekin yaha jaise bahot kuch ho raha hai aur tala lagane ke matlab bhi yahi hoga. Papa se baat karna.. nahi nahi Ritu he baat karegi.", Apne aap se he sabhi atkale lagati hui Komal ab ek pal aur na ruki is kamre me lekin jaise kismat kharaab thi ki seedhiyon se niche aate he saamne Ritu ko apne pita se he baat karte paya.
"Lo papa didi bhi aa gayi. Didi, papa ke kapde la do na maa ke kamre se. Maine tayaar hone pichle ghar jana hai aur Alka meri he wait kar rahi hai. Waise aap Aaru ke kamre me gayi thi.?", Ritu is waqt bas ek dheele se pajame aur lambi tshirt me he the kaam karne ki wajah se. Shankar ji bhi abhi abhi laute the jo bade gor se apni badi beti ka chehra padhne ki koshish karte lage.
"Koyi baat hai kya Komal?"
"Main aapke kapde leke aayi papa. Aapse main palace me he baat karti hu.", Komal ne iske aage kuch na kaha lekin Shankar ji jaan gaye the ki kuch toh baat jarur hai aur Komal ke aane se pehle udhar se he Aanchal nikli thi kapdo ka bag liye.
"Ye bhi ajeeb ladki hai. Atcha tu chal tayaar ho ja meri chashmish, main bhi naha ke kapde badal lu. Jaane ka dekh lena tum log. Arjun ki car aur safari tumhare he hawale hai. Bas tum ladkiyan dekh lena apna baaki sabhi ko main aur tumhare chacha log le jaayenge.", Taar ke upar se toliya utha kar Shankar ji bathroom ki taraf badh liye lekin Ritu jaise ab kuch kuch asehaj mehsoos kar rahi thi.
"Ae Alka, ye Komal didi ki baat kuch samajh nahi aayi."
"Chal na pehle tayaar ho jaaye fir idhar aa kar kar lenge unse baat.", Alka hath khinchti hui Ritu ko liye pichle ghar ki aur chal di. Dono paidal he ja rahi thi aur is baar Alka ki najar ne wahi log dekhe jo Arjun ke kamre me Komal ko dikhe the lekin is badi jeepnuma gaadi me un charo ke sath 3 aur log the.
"Ye Vinod chacha ke dost dekh kaise kaise hai Ritu? Ajeeb se aur ye ghar me aaye bhi nahi the."
"Alka wo aadmi jo sabse aakhir me baitha hai wahi toh hamari ghar se nikla tha thodi der pehle Vinod chacha aur dono fufa ke sath. Ye log ghar me kaha tha?", Ritu ki shanka kuch badh si gayi thi aur Alka se behtar usko kaun jaan sakta tha.
"Tension matt le jaan. Is tharki chacha par meri najar bahot pehle se hai aur agar ye kuch bhi aisa waisa soch raha hai na toh bas sochta he reh jaayega. Arjun ke saamne jikar mat karna filhaal.", Alka jaise bahot kuch jaan chuki thi Vinod ke baare me aur in dino Ritu ke sath uski gehri charcha ho na saki thi ghar ke aise vyast mahol me. Lekin jaise ab hone he wali thi kuch samay me.
"Tharki se yaad aaya, aaj toh waha sangeet me bahot se log aane wale hai. Thoda dhyaan rakhna kahi aisa na ho ki koyi unch neech ho jaaye kisi mehmaan ladki ke sath. Tujhe toh pata he hai ke maine khud he bhugta hua hai kuch mahine pehle Malhotra uncle ki beti wali shaadi me.", Ritu thoda sanjida ho gayi thi aur Alka uska kandha thapkati hui barabar kadam milate hue boli.
"Wo Ritu bas us din tak he thi meri jaan. Is Ritu ke saamne agar aisa waisa kuch hua toh main jaanti hu ye atche atche ko naani yaad dila sakti hai. Waise ek pate ki baat batau?", Alka ki baat sunn kar Ritu ke masoom se chehre par parichit muskurahat aa chuki thi.
"Haan toh agar main naa bhi kahungi toh kya tu batane se hategi? Bol aur thoda tej chal. Waha mahabharat chal rahi hogi aur jaane aaj ye ladkiyan kya bijliyan girane wali hai.", Ritu ki baat Alka ke palle padd chuki thi jis par woh hansti hui thoda tej chalne lagi. Charhari aur lambe kad ki ye dono apsara sareekhi ladkiyan zindadil hone ke sath he har pehlu par aise he vichar rakhti thi ek dusre ke sath.
"Manju wale maamle me apradhi aur koyi nahi ye Vinod chacha he tha. Isne he Manju ko kidnap karwane ki koshish ki thi aur lagbhag kar he liya tha. Arjun ne waisa hone na diya aur sabse pehle wahi jaan gaya tha ki Vinod chacha ki asliyat kya hai. Bas kisi wajah se wo unhe saja nahi dena chahta. Aur ek baat jo maine mehsoos ki hai wo ye hai ki Anamika chachi ki life bhi bahot hadd tak ghutan se bhari hai aur wo Arjun ko ek devar ya bhai ki tarah jyada dekhti hai. Apna Arjun toh hai he sabke dil ko samajhne wala par wo kar kya raha hai ye samajh se bahar hai mere. Tera kya kehna hai?"
"Wo gaanv ja raha hai jabki usko ye baat atche se pata hai ki uske peeche yaha kisi ka dil nahi lagne wala, khaaskar ke dada ji ka. Hum toh chal aapas me he rehnte hai lekin dada ji aur maa-chachi ka din nahi poora hota Arjun ke bina. Aur pehle toh dada ji kabhi chahte he nahi the ki wo udhar jaaye par ab wo kuch bole tak nahi. Arjun aur Vinod chacha kal raat bhi eksath he is taraf aaye the aur uske baad Vinni didi ko chhod kar kuch der tak wo akele he kahi gaye bhi the. Agar Arjun is tharki chacha ko pehchaan chuka hai toh fir wo kuch bada karne ki soch raha hai jiske liye wo jadde khodni gaanv se he shuru karega. Dada ji ko dukh na pahuche isliye wo jarur ye sab waise he karega jaisa hum me se koyi nahi karta.", Ritu ne dhyaan diya toh ghar ke andar sabhi ladkiyon ki awaaje aa rahi thi jiska matlab tha ke wo thoda aur baat kar sakti hai.
"Hum kaise karte hai aur wo alag kaise karega? Tu is jagah mujhse thodi jyada better hai kyonki chahe hum dono pyaar us se barabar karti hai lekin usko samajhna tere bas ki he baat hai. Wo jaanboojh kar mujhe aise dikhata hai ki jaise sabkuch chori chipe kar raha ho lekin uska maksad hota hai meri najro me jaan boojh kar aana. Toh teri baat thodi samajh me toh aayi hai ke wo pehle he soft warning de deta hai lekin samajhna na samajhna ye saamne wale ke hath hai. Toh ab tujhe kya lagta hai ki wo kya karne wala hai?", Alka ki baat se ittefaaq rakhte hue Ritu ne aage batana jaari kiya.
"Darling, aisa hai ki munna pyaare ab pehle wale nahi rahe jo apna gussa ya pyaar ekdum dikha deta tha. Anamika chachi aur unke bete ke sath reh kar he Arjun kuch aisa karna chahta hai jis se Vinod chacha ko ehsaas ho wo galat hai. Nahi toh Manju wala kissa toh dur ki baat, jab is tharki chacha ne mere motorcycle wala taar chheda tha Aaru unko tabhi lapet leta par usne aisa nahi kiya. Ab wo gaanv jaayega aur uske baad baaki chuttiyaan wahi rehne wala hai. Matlab Aaru dada ji ka he kaam kar raha hai. Ek sanyukt pariwar jisme koyi bhi galat na ho. Daadi ne ek baar kaha bhi tha ke dada ji hamesha waha khush rehte the jaha unke pita ji aur maa rehte the. Unhe aaj bhi is ghar se jyada apnapan waha mehsoos hota hai lekin ab dada ji ki zindagi hum log hai. Aaru shayad ... nahi yakeenan wahi karne ki koshish karega. Chal ab bahot baatein ho gayi. Andar chalte hai aur dekhe in sabne kya gul khilaye hai. Aadhe ghante me pahuchna bhi hai, 7:30 ho gaye."
"Haan Sanjiv bhaiya toh tayaar bhi ho chuke the jab hum ghar se nikle. Aaj jara mehmano ko he thumke lagane denge, hum kal mehnat karenge. Hehehe.", Alka ne chalte hue Ritu ke kulho par chataak se thappad jamaya toh wo bhi ouch karti hui fir hansne lagi. Itna toh saaf ho gaya tha inki charcha se ki Arjun is pariwar me mahabharat ko hone se rokne wala veer tha na ki har galat soch wale vyakti ka sanhaar karne wala. Ab sangeet karyakram shuru hone wala tha kuch he antraal baad aur kahi na kahi mel-jol ke alawa waha bahot kuch hone wala tha. Bijliyan girna bhi nischit tha jab itni khoobsurati waha jhilmilane wali ho lekin dekhna tha ke Pandit Rameshwar Sharma ke pauta-pauti ke sangeet samaroh me koyi gustakhi karega ya mahol hamesha ki tarah garimapurn aur pariwarik rehne wala hai.
awesome update hai