Update 22
Jaane -Anjaane
Yaha Malhotra ji ghar atchi khasi bheed lagi thi. Har taraf chahal pehal thi aur shor ho raha tha. Arjun aur Preeti andar aaye toh idhar udhar dekhne
lage. Aangan me ghar ki aurate geet ga rahi thi aur lakdi ke fatte par baithi Palak didi ke haldi rasam kar rahi thi. Ek photographer waha photo kheench
raha tha. Ghar Malhotra ji ka bhi atcha khasa tha aur unka pariwar bhi kaafi bada tha, jaisa aamtaur par Punjabi pariwar hote hai.
"Aao beta khade kyo ho waha? Chalo idhar aakar kuch chai nashta karo pehle."Ye Malhotra ji ki Shrimati Kaamini ji thi. Khoob ban-than kar ye bas yaha
waha sab kaam dekh rahi thi toh aangan ke pas chupchap khade Arjun aur Preeti ko dekha toh unhone pyaar se unhe apni taraf bulaya.
"Nahi Aunty ji pehle he bahut time ho gaya hai. Bas ye samaan dena tha aapko. Waise bhi raat ko toh fir milna he hai.", Preeti ne lehnge ke packet ko
unhe dete hue kaha. Sath he Arjun ne woh makeup ke samaan wala thaila aur paise unke aur badha diye.
"Shukriya beta jo tumne mera kaam aasaan kar dia. Ghar me koi bhi aadmi free nahi tha toh tumhe kasht dia." Unhone samaan lete hue apne sath khadi ek
ladki ko thamaya aur paise apne purse me rakh liye. "Kaisi baat karti ho Aunty ji aap. Kya hamara koi haq nahi itna sa kaam karne ka bhi?" Preeti he
bol rahi thi. "Chalo Arjun ab mujhe ghar chodd do. Waha bhi kaafi kaam hai abhi." Usne Arjun ko bolte hue he ishara kia bahar chalne ka. Ek baar fir
aunty ke pair choo kar Arjun wahi se bahar ki taraf chal dia.
"Ye sab kya tha? Wo sab ladies didi ke wo rang aur tel kyo laga rahe the?" Arjun ne kauthool vash pooch he lia aur scooter par uske peeche baithti
Preeti ne bhi muskurate hue kaha, "Tumhe lage gi jab pata kar lena. Rasme hoti hai ghar me bahot saari lekin tumne kabhi ghar me samay bitaya ho toh na"
Dono ab Col uncle ke gate ke bahar the. "Atcha ek baar apna wala bag dena jara." Preeti ne Arjun se apna shopping bag lia aur Arjun ne scooter ke box
ko khol kar baaki samaan bhi uski taraf badhaya.
"Mere bag me ab kya reh gaya dekhna? Usme toh mera he samaan hai na?" Ye baat thodi hanste hue kahi toh Preeti ko bhi samajh aa gaya ke Arjun ab us se
masti kar raha hai. "Ab nahi dena toh thik hai. Log shayad tohfa khareed kar apne pas he rakh lete hai." Itna keh kar wo Scooter ke saamne se hokar jaane
toh Arjun ne samjha ke gussa ho gai. Jaldbaaji me usne Preeti ka haath pakad lia. "Mera matlab ye nahi tha. Wo toh bas mai majaak kar raha tha." Thoda
seious ho kar usne ye kaha aur Preeti palat kar hansne lagi.. "Shakal dekho jara tumhari kaise ekdum 12 baj gaye hai. Majaak sirf tum kar sakte ho."
Aur fir uske haath se bag lekar sabse upar wale packet ko nikal andar chal di bina fir wapis mude.
"Aa gaya beta?" Rameshwar ji Kaushalya devi ke sath aangan me kursi daal kar baithe the. Wahi par 3 aur log the lekin Arjun unko nahi jaanta tha. Usne
bas shishtachar se unko namaskar kar dia.
"Ji dada ji. Aur sab samaan maine unke ghar de dia hai. Thoda thak gaya hu toh upar araam karne jaa raha hu." Saamne waali seedhiyo se woh upar chal
dia. Sara samaan apni almaari me atche se rakha aur fir kapde badal kar bister par late gaya. "Malhotra uncle ke ghar aaj sangeet hai toh fir toh ghar
ke sabhi log bhi jaa rahe honge." Usne yahi socha toh apne aap wapis uske kadam pichle aangan ki taraf badh gaye. Niche utar kar dekha toh sirf Lalita
ji he rasoighar me thi aur unhone usko bas pyaar se dekha. Unki aankhon aur chehre par chamak thi lekin Arjun is sab badlav ko kaha samajhta. "Wo taiji
sab log kaha hai.?" usne itna he poocha ki Komal didi ke kamre se hansne ki awaaj aai. Taaiji ne bhi ishara wahi kar dia aur fir wapis kaam me lag gai.
Wo shayad bahar aaye hue mehmaano ke liye chai paani ka intjaam kar rahi thi.
"Darwaja toh kholo. Band kyo kia hai?" Arjun ne darwaja thapthapaya toh andar se awaaj aai, "Kuch jaruri kaam hai kya tujhe?" Ye toh Maadhuri didi hai
Ye bhi andar hai?" Usne man me socha aur kahak, 'Ha jara darwaja toh kholiye ek baar."
Kuch der me Ritu didi ne darwaja khola. Unhone apne baal bandhe hue the aur ek bina baah ki purani tshirt aur ek dheela pajama pehna tha. "Ha bol kya
kaam hai tujhe?" Apni kamar par hath rakh unhone ye baat kahi. Dono haath unki kamar par the jaise wo darwaje ke andar ka koi raaj chupa rahi ho.
"Ye sab log andar kya kar rahe hai? Aur maa bhi andar hai shayad." Usne andar ki jhalak dekhi toh usko poor bister 4-5 logo se bhara dikha lekin itna
bhi kuch saaf na tha. Fir Ritu didi ke peeche kamre ki jameen par kuch kapde ki katran si padi thi jinpar kuch laga tha, Ritu ne uski najaro ka peecha
kia toh hanste hue darwaja band kia aur boli, "Chal bhaag yaha se bada aaya Vyomukesh Bakshi. Koi kaam vaam nahi hai bas ye dekhna hai ki kamre me ho
kya raha hai. " Didi ki baat sunkar kuch sochta hua woh chalne laga toh ab Taaiji ne awaaj di, "Beta ye jara bahar pakda de toh." Ab Arjun rasoighar me
dakhil ho kar tray lene laga toh dekha ki Taaiji ke haath par halki si laali chaai thi aur wo jagah bilul bedag si thi, lekin dusra haath par abhi kuch
halke baal se the. "Aapke haath par kuch garam gira hai kya?" Arjun ki baat ka aashay samajh lalita ji ne uske sar par chapat lagai aur usko hairaan chod
kar woh bhi didi wale kamre me chali gai. Bechara samajh kuch na paya tha toh tray lekar bahar chal dia.
Idhar Col Puri ke ghar bhi kuch shanti si thi. Col sahab apne kamre me thoda araam kar rahe the kyonki unko pata tha ke raat ko aaj dosto ke sath jaam
takrayenge. Aur apne kamre ke andar baithi Preeti khareede hue kapdo ko nihar rahi thi. Kabhi wo chudiyon ko dekhti toh kabhi payal ki jodi ko. Fir kuch
sochkar woh bathroom ke andar chali gai bahr nikli toh ek short nikkar aur bina baah ki tshirt me thi. Kamre me almaari par lage aadamkad sheeshe me khud
ko dhyaan se dekha. Bilkul pas khadi woh apni baah aur taango ko dekh rahi thi. Fir apni kapdo ke sath wali almaari kholi aur usme se kuch alag alag tube
aur dibbiya bister par rakhi aur ek packet sa bhi nikala. "Paravti didi.. Idhar aana jara." Uski awaaj rasoighar me safaai karti Parvati ne suni aur fir
Preeti ke kamre me chali aai. "Ji didi kahiye."
"Yaha aao toh aur darwaja band kar dijiye." Usne pyaar se Parvati ko samjhaya.
"Ek paani ka mug bathroom se le aaiye aur soft towel bhi." Parvati bhi turant he samaan le aai.
"Pehle bas halke geele toliye se meri baah aur gardan saaf kijiye aur fir ye cream halke haatho se laga dijiye." Preeti ne ek tube Parvati ki taraf badha di.
Agle 10 minute me Parvati ne utna kar dia. "Didi aur bhi kahi?"
"Ha yaha pairo par bhi kar do." Parvati pehle wala he sab dohra rahi thi aur Preeti ab us packet se kuch geele tissue nikaal kar apni baah aur gardan saaf karne
lagi. "Didi ek baat kahu?" Parvati ne thodi sharam se kahi ye baat toh Preeti ne muskurate hue gardan ha me hilai.
"Didi aapke pair na bahut khoobsurat hai aur maansal hone ke sath kitne lambe bhi hai. Kahi bhi kuch halka sa jyada ya kam nahi hai. Aur waise he aapki
baahen aur gardan bhi hai."
"Chal kuch bhi bolti hai.Itna kuch khas nahi bas ye jarur hai ke tennis khelne se thodi majboot ho gai hai." Aur fir usne apni tshirt bhi utaar di.
Bedaag sudol jism aur har ang jaise tarasha hua tha. Pait bhi aisa tha ke uspar kahi koi charbi na thi. Halki maaspeshiyo ki jhalak mil rahi thi jo
uske ubhre yovan ko aur badha rahi thi. Lace wali safed aadhe cup ki bra me uske ubhar sar uthaye khade the. Preeti ka sharir aur ango ko dekh kar ladki
hote hue bhi Parvati ko jaise uske sharir ki taraf khinchav sa hone laga tha. "Parvati yaha peeth aur pait par bhi kar dena." Itna bolkar Preeti pait ke
bal naram bister par pasar gai. Parvati ke haath jaise apne aap he uske sharir par reng rahe the. Sakht jaanghe lekin uspar baalrahit mulayam khaal kisi
makhan se lag rahi thi Parvati ko. Dono hatho se atche se jaise woh cream se maalish karne lagi thi. Jangho ke jod ke pas jaise he haath pahuche Preeti
ki awaaj ne usko chetaya. "Bas didi ab usko saaf kar dijiye aur yaha meri peeth par saaf karke cream laga dijiye."
Paarvati bhaai sanson se pairo kaa kaam nipta kar Preeti ki kamar ke paa aa gai. "Didi ye aapki angiya ki patti maili ho jayegi." Preeti baat sunkar halke
se muskurai aur ek tauliya seene se laga lia aur fir khud apni bra ke huk khol diye. Ladki kitni bhi modern ho, wo ekdum se kisi ke saamne nangi nahi ho sakti.
Yahi Preeti ne kia tha. Poori tarah se apne gore ubhar usne safed tauliye se chupaye aur fir Parvati ne poori peeth ko saaf kia aur wapis kaam karne lagi.
"Didi aapke toh jism par ek bhi nishaan nahi hai.Aur ye dekhiye yaha se aapki peeth thodi jyada chaudi aur majboot si hai." Parvati ne gor se dekha tha
aise jism ko. Pehli ladki hogi jo kahi se motti toh dur ki baat charbi rahit thi. "Wo kya hai na tu bhi roj daud lagayegi, kasrat karegi ya koi mehnat ka
khel khelegi toh tera sharir bhi aisa he ho jayega." Thodi gardan uchka kar Preeti ne baat kahi toh Parvati ki jubaan fisal gai, "didi khel toh mehnat ka
roj he khel leti hu lekin hua toh kuch nahi." Aur fir apni baat ko samajh kar khud he shama maangne lagi..
"Tera toh bas wahi dhyaan rehta hai. Shayad 5 saal hue na teri shaadi ko, fir bhi parinaam nahi dikh raha koi." Preeti ne chutki lete hue kaha toh Parvati
sharma kar boli, "Ji mehnat toh lagbhag roj hoti hai lekin woh kehte hai ke shayad bhagwan ki abhi marji nahi hai toh bas fir nahi kuch ho raha."
Kuch der sochne ke baad Preeti ne kaha. "Chalo bas ho gaya sara kaam. Thank you ab main nahane jaa rahi hu."
.
.
Shaam ghir aai thi lagbhag 7:30 ke aaspas samay tha. Ghar me thodi chahal pehal thi aur sabhi kamro me roshni ho rakhi thi. Rekha ji ko Komal didi tayar
kar rahi thi. Ek reshmi sunehari saree aur surkh laal blouse me woh bahut aakarshak lag rahi thi. Maang me sindhoor, chehre pe sirf ek bindi aur halka
kajal lagya hua tha. Komal didi ne unki saree ko set kia aur boli, "Lijiye maa ho gaya aapka toh. Ab aap aur Taaiji chaliye Kaamini Aunty ki taraf mai
bhi apne kamre me tayaar hoti hu." "shukriya beti." Kisi gulab se dikhti Rekha ji toh Komal se kahi jyada sundar lag rahi thi. Shayad unke chehre ka tej
unko sabse alag he dikhata tha. Apni jethani Lalita ji ke pas gai toh woh bhi atche se tayaar thi. Ek reshmi gehre neele rang ki saree aur waisa he bluse
unke gore sharir ko atche se samete tha. "Chale didi. Maaji bhi tayaar hai." Lalita ji ne unki baat sunkar apna purse aur rumaal uthaya aur apni Saas ki
taraf ho li.
Ritu didi aur Alka didi toh shayad ek ghante se he tayaar ho rahi thi. Jaha Ritu didi ne jhilmil sa surkh laal suit pehna tha jiske niche punjabi salwar thi
aur badi badi aankhen kajal se aur bhi badi lag rahi thi. Baalo ki ek gunth kar ki hui choti unhe bilkul he kisi sardarni jaisa dikha rahi thi. Rang bhi fakk
safed tha. Poora sharir damak raha tha. Waisa he kuch Alka didi lag rahi thi. Lamba kad aur aasmani rang ka frock wala kurta jiske niche safed choodidar
pajami aur khule hue baal. Ek kaali lambi bindi se chehra kisi apsara se kam na lag raha tha unka bhi. Dono aise he kitni der tak niharti rahi khud ko.
Daadi ji ke kehne par Maadhuri didi ne aaj ek cream color ki shifaun ki saree aur halke hare-neele rang ka bina baju ka blouse pehna tha. Wo toh aaj jaise
dulhan ko he takkar dene ja rahi thi. Itne saadgi wale pehnave me unka sharir aur unke ubhaar janleva lag rahe the. Komal didi ne bhi apni badi behan ka
anusaran karte hue ek chamakdar kaali saree aur kaala he matching bina baah ka blouse pehan lia. Maadhuri didi he unko saja rahi thi. Dono ne pehle bhi
kai baar saree pehni hui thi toh woh sehaj thi is pehnawe me. Samay 8 ke upar hone ko aaya tha toh charo behne bhi chal di apne pados ke function me. Kisi
ne ek baar bhi Arjun ko yaad nahi kia is dauran. Sab shayad ye soch rahi thi ki dusri ne utha dia hoga.
Malhotra ji ka ghar jaise poora roshni me nahaya hua tha. Galiyare aur bahar ke aangan me khane ka karykram tha toh stalls saje the waha. Bade drawing room
jo bahar ki taraf he tha waha par sabhi bade purush ektrit the apni mehfil sajaaye. Koi 20-22 log sofe diwan par golaai se baithe the aur unke saamne aise
he table lage the. Gappo ka daur chal raha tha. Col Sahab toh sharaab peene wale vyakti the toh unko bhi atchi sohbat mil gai thi. Malhotra ji ke sambandhi
bhi unka sath de rahe the. Pandit ji bhi juice/Sharbat ka gilas haath me thaam kar unke kisse sun rahe the aur apne suna rahe the. Pichle aangan me bade bade
speaker baj rahe the. Ye aangan kuch jyada he khula tha kyonki yaha jyada kamre nahi banaye gaye the jaisa ki Rameshwar ji ke ghar me the. Kuch choti umar
ki ladkiya aise he naach rahi thi. Adhiktar log toh pados ke he the ya fir sage sambandhi Malhotra ji ke. Dusri manjil par bhi 2 kamre aur niche ki tarah
ek bada drawing room tha. Yaha jawan logo ka peene pilane ka daur chal raha tha. Malhotra ji ke bade bete ne ye program savdhani aur ehtiyaat se kia hua
tha. Apne dosto ko yahi se sewa ke baad unhone bahar bhejna tha kyonki ghar me is baat ki sakhti thi ki bahar ke log sharab peekar toh andar aa nahi sakte.
Kuch 15-16 log the jo beer aur whisky ka lutf le rahe the aur 3-4 waiter unko khaane peene ka samaan upldabdh karwa rahe the. Yu toh wo sabhi sabhya gharo
se the aur kuch pariwaar se he the. Fir bhi koi vyakti aisa nahi tha jo jyada ya jaldbaaji me sharab pee raha tha. Adhiktar toh wo log kal hone wali shaadi
aur apne kam dhandhe ki baat kar rahe the. Atchi khaasi mehfil teen taraf saji thi is bade ghar me.
Takriban 8 baje he Arjun bathroom se naha kar bahar aaya. Sanjeev bhaiya bilkul tayaar sofa par baithe the. Unhone ek atchi si formal shirt aur pant pehani
thi aur bhoore chamde ke polish kiye hue joote. Sanjeev bhaiye aise he tayaar hote the jab bhi kaha jana hota tha. Unka vyaktitva bhi is tarah atch lagta tha.
"Tayaar ho ja chote nahi toh fir Taanedar sahab ne waha nahi paya toh dono ki class pakka lag jayegi."
"Bas 10 minute bhaiya." Bolkar woh kamre me ghusa aur tauliaya nikal kar almaari se naye kapdo se ek jodi nikal kar pehan ne laga. Kuch der baad wo bahar nikla
to ab hairaan hone ke baari Sanjeev bhaiya ki thi. Kaala ghutno tak ka pathani Kurta jo uski chaudi chaati par kasa hua tha aur kandhe par bhi. Niche ek tang
pajami thi gol silvat wali aur pairo me khundi wali chamde ke bhoori rajasthani jooti. Uske baalo ke kundal bhi kaano se niche aate uske chehre ko bharpoor
raunak de rahe the. 6 feet lambe chaude sharir wala ladka kisi kalpanik kahani ke shoorveer sa lag raha tha.
"Tera toh kayakalp he ho gaya chote. Ye sab kaise aur kab hua.?" Table par se ek purusho wala itra uthakar apne chote bhai ke kurte par chidakte hue bhaiya
bas usko he dekh rahe the. Arjun bas muskura raha tha. "Ye sab tujhse toh hone wala nahi hai aur na he mai is ghar me kisi ko janta hu jo tera aisa parivartan
kar de. Kaun he ab bhai ko bhi nahi batayega.?" Bhaiya ki baat sunte usne kaha. "Chalo raaste me batata hu."
Markeet me jab Arjun ne apne kapde kharidte hue ek shirt pehan kar Preeti ko dikhai thi tabhi usne ye kurta usko thama dia tha. "Mere kehne se bas ek baar
pehan kar dekh lo fir jitne yaha log khade hai unko dekh kar khud fainsla karna." Preeti ki kahi baat sahi saabit hui thi aur us dukaan par khade logo ne
bhi Arjun ko prashansha bhari nigaho se dekha tha. Ek ladki jo waha apni saheli ke sath thi usne toh apni saheli ko chutki kaat te hue Arjun dikhaya tha.
Aur yaha bhaiya ki paarkhi najre bhi kamaal kar gai thi.
"Wo kya hua bhaiya aaj jab market gaya tha Malhotra uncle ke kaam se toh dada ji ne kuch paise diye the 2 dress lene ke liye. Wahi ek dukan par ye poshak
bhi ek murat par sajaai thi. Maine pehan kar dekhi toh atchi lagi aur fir leli. Ek aur bhi li hai wo kal shaadi ke liye rakhi hai." Niche aate hue usne
baat apni taraf se banane ki koshish kari thi. WO nahi chahta tha ki Preeti ka naam le.
"Mai mere bhai ko kahi jyada jaanta hu. Ha lekin teri ijjat bhi karta hu toh mai itna samajh sakta hu ke kuch baat hai jo tu abhi nahi batana chahta. Jab
thik lage toh bata dena. Aur har tarah se tera ye bada bhai tere sath hai. Ghabrana nahi." Sanjeev bhaiya bhi samajh chuke the unka chota bhai ab bada ho
raha hai aur baat pakka ladki ki hai.
"Aapko bina bataye chain nahi aayega bhaiya. Lekin abhi aisa kuch nahi hai." aur dono baatein karte Malhotra ji ke ghar ke bahar aa gaye. Koi 8-9 car aur
itne he dopahiya vahan gali me khade the. Atchi raunak lagi thi. Chatt se niche tak aati light ki ladiyon se poora ghar gali me jagmag ho raha tha. Kapil,
Malhotra ji ka bada beta koi 34-35 saal ka pehli manjil par bahar khada tha. Usne wahi se Sanjeev bhaiya ko awaaj lagaai toh Bhaiya Arjun ko sath lekar
upar chal diye. "Aao Pandit ji. Pados me rehte ho lekin dekho aaj mahine baad darshan diye hai." Kapil ne Arjun se hath milaya fir Arjun ki taraf dekh kar
bole, "Bhai ye gabru kon hai? Bada tagda dost hai tera"
Sanjeev bhaiya hanste hue bole, "Kya bhaiya ye Munna hai. Aap hamare yaha nahi aate aur ye ghar se bahar nahi nikalta. Jab tak aap ghar aate ho ye to so
chuka hota hai." Baat bhi sahi thi. Kapil ki dhaga factory thi shehar se bahar aur woh 10 baje jata tha aur 10-11 baje raat me he aata tha.
"Arre Munna itna bada ho gaya. Suna tha bauji se ki hostel se tu wapis aa gaya lekin jaakar toh tu taad sa lamba ho gaya re." Arjun ko apne sath pyaar
se liye wo andar chal diye. Sajeev bhaiya bhi sath ho liye. Yaha par hawa me sharab ki halki mehak thi aur sab kha pee rahe the. Kapil ne sabse dono ko
milwaya. Sanjeev bhaiya toh adhiktar ko jaante he the. Arjun aaj pehli baar sabse mil raha tha.
"Ye mere Delhi wale chacha ji ke sabse chota beta hai Rajan, abhi college me hai 2nd year me." Unhone beer pee rahe ek ladke se Arjun ko milwaya jo waha
khade abhi yuvako me shayad sabse chota tha lekin Arjun se bada. Lambe baal, thoda bhaari sharir, ghutno se fati jeans ki pant aur kuch adhik he style
wala tha woh.
"Hello dude. How are you?" Usne haath badhaya, dusre hath me beer ki bottle thi.
"Thank you. I am absolutely fine. Hope you are too." Arjun se aise pratiuttar ki shayad us ladke ko ummed nahi thi. Lekin fir bhi dono baat karte rahe
jab tak Rajan ki saari english khatam nahi ho gai.
"Bhai thodi tum bhi pee kar dekho. Jannat sa maja hai is bottle me. Thandi aur garam dono." Ye baat aankh maarte hue kahi jaise beer peena koi mahan
kaam ho.
"Nahi bhai. Mai aisa kuch nahi peeta. Mere liye yahi sahi hai." Usne apne sharbat ke gilas ko dikhaya.
"Kya Sanjeev bhai akele pee rahe ho thoda apne chote bhai ko bhi sikha do." Usne pass me khade bhaiya ka dhyaan apni aur kiya. Bhaiya unke he kisi
rishtedar se baatein karte hue cola me milakar whiskey ko dhire dhire pee rahe the.
"Jab iska time aayega toh mai khud apne bhai ko pilaunga. Rajan, ye abhi utna bhi bada nahi hai toh abhi isko is sab ki jarurat nahi." Unhone itni baat
kahi aur fir pyaar se apne bhaai ki taraf muskura kar wapis saamne wale se baaton me lag gaye.
Arjun ka waha dil nahi lag raha tha. Tabhi Kapil bhaiya ne kaha, "Munna tujhe niche aunty bula rahe hai. Peeche ke darwaje se he niche chala ja."
"Ha shayad wahi thik jagah hai iske liye." Rajan ne halke nashe me ye baat kahi toh Kapil ne thode gusse aankh dikhai.Sanjeev bhaiya ne kuch nahi kaha
aur na he Arjun ne. Wo bas bahar nikal gaya aur bhaiya ne wapis darwaja laga lia.
Niche toh mahol jabardast tha. Sangeet baj raha tha aur kuch mahilaye aur ladkia naach rahi thi. Aangan ki kinaare koi 20 kursiya lagi thi jinpar
log baithe the. Har koi khoob saj sanwar kar aaya hua tha. Apni maa, daadi aur taaiji ko wahi Malhotra Aunty ke sath baitha dekh wo seedhiya utarta
unki taraf chal raha tha aur aangan me khadi sab ladkiyo ki najar bas udhar he thi jidhar se Arjun aa raha tha.
"Ye kon hai re?" Ek ladki ne ye baat kahi toh Maadhuri didi ne naachte hue peeche ki taraf dekha aur unke paav bhi ruk gaye. Unke sath he Komal didi
ke bhi. "Mera chota bhai hai. Lekin pehchaan me toh nahi aa raha." Maadhuri didi mantramugdh se boli yahi haal Komal ka bhi tha.
"Toh tere bhai se baat karwa na Maadhuri?" Ye ladki Malhotra ji ke pariwar se he thi jisko dono behne jaanti thi.
"Wo abhi chota hai. Usko bakash de." Mann maarkar unhone ye baat kahi. Beech aangan me sabhi khade the toh sharam se dono behne wapis halke kadmo se
sangeet par paav thirkane lagi. Hum aapke hai kaun film ka gana chal raha tha.
Arjun aakar apni daadiji ke paas khada ho gaya. Wo sabhi bhi bas usko he dekh rahe the. Rekha ji toh pehli baar Arjun ko aise dekh kar yahi soch rahi
thi ki ye toh pura jawaan ho gaya hai. Wahi haal Lalita ji ka bhi tha lekin unko uski jawaani ka pata pehle chal chuka tha.
"Ye hai mera pyara beta Arjun." Kaushlaya devi ne ye baat Kaamini ji ki ek rishtedar se kahi toh Arjun ne unko namaskar kia.
"Kaushalya ji, ladka toh aapka bada atcha hai. Maine toh dekhte he isko apni poti ke liye pasand kar lia tha." Unhone ye baat kahi toh wo ladki jo
Maadhuri didi se uske baare me pooch rahi thi kisi adrishya dor se kheenchi wahi aa khadi hui.
"Hahaha. Kaisi baat karti ho Sumitra ji. Bacha hai ye abhi. Iski shaadi ko abhi 10 saal pade hai."
"Kuch bhi kaho behan mere pote toh is se umar me bade hai lekin iske aaspas bhi nahi dikhte." Aur apni aankhon se kaajal utaar kar unhone Arjun ke
kaan ke piche lagaya aur aashirwad dia.
"Beta tu kuch kha le. Teri behne bhi yahi hai aaspas." Taaiji ko laga ke Arjun ko yaha se thoda dur he rakhna chahiye. "Ji taaiji." bolkar woh waha
se kuch kadam galiyare ki taraf badha he tha ke fir takra gaya kisi se. Peeche se khilkhilane ki awaaj sunkar hosh aaya toh saamne khadi apsara ko
dekh kar sunn ho gaya. Preeti kaale suit me aur khule baalo me aankhen band kiye khadi thi. Uska haath apne baaye kandhe par tha. Niche uska purse gira
pada tha aur sath he chaat-paapdi ki plate.
"Jyada jor se lagi? Sorry dhyan nahi tha aur ekdum se muda toh saamne tum aa gai." Arjun ki awaaj sunkar Preeti ne najre upar ki toh fir wahi hua jo
har baar uske sath hota tha. Kho gaya un aankhon me jinme halka kaajal laga tha. Aur woh bheeni khusboo jo uski saanso me sama rahi thi.
"Nahi mai thik hu." Usne itna kaha toh Arjun ne niche jhuk kar purse uthaya aur aage badhaya. Preeti apne rumaal se Arjun ke kurte par lage dahi ke
chote se nishaan ko saaf karne lagi.
"Preeti ye mera bhai hai Arjun. Aur Arjun ye hai Preeti, Col uncle ki granddaughter." Alka didi ne ye kaha jo peeche se ab unke pass he khadi thi.
"Hum mil chuke hai." Preeti ne ek baar jhuki najro se kaha aur fir bagal se nikal kar aangan ki taraf aa gai.
"Tu kab mila re is se? Aur aaj toh lagta hai tu kisi showroom se tayaa ho kar seedha idhar aa gaya." Ritu didi ne apne chote bhai ko bade pyaar se dekha.
Wo toh jaise unki najro me bas gaya tha. Alka didi bhi bas Arjun ko he dekh rahi thi. "Ye imtihaan meri jaan na le le." Mann me socha unhone.
"Wo Col uncle ne aaj market me Preeti ko bhi mere sath bheja tha. Usko bhi samaan lena tha toh mai le gaya tha. " Usne stadium ka jikar nahi kia.
"Oh atcha. Waise toh wo hamari purani saheli hai lekin bahar padh rahi thi aur bas is mahine he aai hai wapis." Chal ri Alka fir tera gana lagwate hai
ye auntiya aise he hilti rahengi. Dono hirani si waha se nikal gai. Arjun ne ek baar palatkar dekha toh Preeti ab uski maa ke sath wali kursi bar thi.
Kaamini aunty ko unki devraani apne sath thumka lagwa rahi thi. Ghar ke kuch purush sadasya aur ladke bhi wahi baithe naach-gaana dekh rahe the aur
halka fulka kha rahe the. Ek waiter se juice ka gilas lekar wo wahi side me khada bas udhar he dekhta raha.
"Bhaiya ye wala gana hai aapke paas?" Ritu didi ne deck ke piche khade yuvak se kaha aur gana bataya. Kuch 2-3 minute baad gana chala dil toh pagal hai
film ka aur ab jyadatar ladkiyon ne naachne ke jagah khaali kar di thi. Agle 5 minute koi kuch nahi bola jab Alka didi ne apna hunar dikhaya. Unka dance
dekh kar toh sabhi ki najre unhi par lagi thi. Arjun ke paas me seedhiyon par 2-3 ladke baithe the. Rajan bhi wahi tha jo dance dekh raha tha. Jaise he
gana khatam hua toh sab taaliyan bajane lage. Unka dance bhi jordar tha. Fir badi mahilaye waha se uthkar khaana khane jaane lagi. Ab waha jyadatar hum
umar jawan ladkiya, bhabhi log aur kuch yuvak jo sirf baithe the reh gaya. Ritu didi ne jaa kar Preeti ka haath kheencha jo kab se kabhi naach toh kabi
Arjun ko dekh rahi thi. "Chal uth ab teri baari hai. Tune promise kia tha na. Sab hato yaha se ab Preeti ka number hai aur yahi hai Alka ki takkar ki.
Baaki toh bas kamar hila ke chal dete hai." Unhone itna bola toh pehle toh Preeti nahi nahi karti rahi fir kuch der baad aa gai wha jaha pehle Alka didi
thi."AB bol konsa gana sunkar tu apna jalwa dikhayegi?" Ritu didi toh thi he maahir. Preeti ne unke kaan me kaha toh unhone wapis gaana chalane wale ladke
ko gaane ke bol bataye. Kuch he der me gaane ki dhun shuru hui. Ye bilkul he naya gana tha jo jyadatar logo ne nahi suna tha. Uske bol the "Sapne me milti
hai kudi mujhe sapne me milti hai." Sangeet bhi bada tej aur dhol ki milawat wala tha. Fir jab Preeti ke kadam thirakne lage toh woh bas kamar me dupatta
baandh aise naachi ki ek 2 ladko ke mooh se seeti nikal gai. Unme se ek Rajan bhi tha. Arjun ko uska ye vyahvahar jancha nahi lekin wo bas shant rahat.
"Tum yaha ki nahi lagti." Rajan uthakar ab Preeti ke paas ja raha tha aur uski taraf dekhte hue usne ye baat kahi.
"Tumse matlab. Chalo apna kaam karo. Yaha par ladko ka aana mana hai. Upar se tumne pee rakhi hai." Ritu didi diler thi aur unhone Rajan ko piche kar dia.
Woh bhi jyada behas kiye waha se chal dia. Lekin tha wo bhi thoda tedha. Aise he halke fulke naachne gaane ke baad sab khana khane chale gaye. Sanjeev
bhaiya ne bhi Arjun ko bulwa lia tha. Khaane ki taraf atchi khasi bheed thi toh Alka, Ritu, Preeti aur unke sath wahi ladki jisne Arjun ko pehli najar me
he dil de diya tha, charon khaane ki plate lekar upar chat par chal di. Kamro me bhi log bhare the toh unka jana kuch alag nahi laga. Sanjeev bhaiya ko wo
batakar gai thi. Sabne khana khaya aur baatein bhi ki. Bade bujurg ghar nikal liye the tab tak. Rameshar ji bhi Puri sahab ke saht he chale gaye the. Is
beech Arjun ki aankhen Preeti ko dhund rahi thi. "Chote chal sab ko ek baar bol de fir ghar chalte hai." Arjun ne sahi taraf dekha toh Kaamini aunty ne
bataya ke Maa, Daadiji aur Taaiji ja chuke hai. Tabhi Ritu aur Alka didi ke sath Komal didi aur Maadhuri didi bhi aa gaye. Sabhi nikalne he lage the ki
Alka didi ne bola, "Bhai jaldi se upar se mera purse le aa. Wo mai wahi khaane ke time bhool gai shayad."
Unki baat sunkar Arjun seedhiya chad upar chal dia. Dusri manjil bilkul shant thi aur piche halka andhera tha. Lekin jab woh waha se niche gaya tha tab
toh bulb jal raha tha waha. Arjun ne ye socha aur thoda teji se teesri manjil par chadne laga.
"Mera hath chodd dijiye. Mai aapse koi baat nahi karna chahti." Preeti ki itni baat he Arjun ke kaano pe padi aur agli 5 seedhiya wo ek jhatke me paar
kar upar aa khada hua. Beech chatt par 3 saaye khade the. Paas jaate he dekha toh wo ladki, Raajan aur Preeti the waha. Preeti Arjun ko waha dekhte he
uski aur lapki, Rajan ne abhi bhi uska hath pakada hua tha.
"Haath chodiye iska." Raajan ko jara kadi awaaj me usne ye baat kahi. "Tu ja yaha se. Mujhe baat karni hai is se." Thodi hekadi se itna he bola tha Rajan
ne ki uski cheekh nikal gai. Wo sath me khadi ladki bhi dono ki taraf dekh kar boli, "Chodo mere bhai ko aur dafa ho jao yaha se." Arjun ne Rajan ka jo
hath Preeti ki kalaai ko pakde tha woh pakad kar lagbhag poora he marod dia tha aur ab Rajan ka sharir aadha jhuk chuka tha aur aankhon me paani aa tha.
"Apne bhai ko kaho ki ladki ki ijjat karna seekhe. Koi jagir nahi hai Preeti uski. Aur tum ek ladki hokar apne bhai ke galat kaam me sath de rahi ho. Itna
bhi mat giro ke fir uth he naa pao khud ki najar me." Preeti buri tarah chipak chuki thi Arjun ki chati se. Aisa nahi tha ke wo koi kamjor ladki thi lekin
kisi shaadi wale ghar me wo bhi akeli ek sharaab piye ladke ke saamne wo dar gai thi. Nahi toh kisi aur jagah toh Rajan jaisa ladka usko hath bhi na laga
sakta tha. Arjun ne usko apne se alag kiye bina he waha padi chaarpai se purse uthaya aur chalne laga. Preeti ka hath thoda geela sa laga toh bas une usko
apni najro ke saamne he kia aur fir Rajan ki taraf wapis ghoom kar uske gaal par poore jor se tamacha jadd dia. ek ke baad ek lagatar 4-5 jhapad khane ke
baad Rajan bhi ghutno pe gir gaya tha. Naak se khoon aa chuka tha uske. Preeti ne Arjun ko apni taraf kia aur bheekh maangti si boli, "Please yaha se chalo
Arjun. Ab aur koi tamasha nahi karna. Please." Arjun uska sar sehlata sard awaaj me Rajan ko bola, "Meri Preeti ka ek katra khoon bhi itna keemti hai ki
iske badle me teri jaan bhi le lu mai. Aur tune toh uska hath he jakhmi kar dia. Agar fir tu najar aaya toh mai bhool jaunga sabkuch." Aur itna bolkar wo
Preeti ko sath liye niche chal dia. Aangan me aane par dekha toh woh safed kaali chudiyan jo uske seedhe hath ki kalaai me thi unme se 4-5 toot kar upar
he reh gai thi. Kalaai par abhi bhi halka khoon tha. "Mujhe rok kar atcha nahi kia tumne." Arjun abhi bhi gusse me tha aur Preeti usko is tarah dekh kar
bas muskura di. "Oye tu purse lene gaya tha ya banane. Aru Preeti tum kaha thi.?" Alka didi unki taraf aati hui boli.
"Aap ke sath gai thi na ye? Toh lekar bhi sath aana chahiye tha aapko." Arjun bina koi jawaab sune waha se nikal lia. Gate par he Sanjeev bhaiya aur baaki
didi bhi khade the. sabko saamne dekh kar thoda shaant pad gaya Arjun aur unke pas ruk gaya.
"Chalo bhi ab. Sab aise kyu khade ho."Alka didi ne hanste hue kaha aur sab chalne lage. Apne ghar ke bahar pahuchte he Maadhuri didi ne Arjun ko roka.
"Pehle Preeti ko ghar tak chodkar aa."
"Preeti aaj tum hamare yaha ruk jao na." Ritu didi ne uske karib jaa kar kaha.
"Nahi didi. Aaj toh nahi lekin jaldi he aaungi. Aaj waise bhi thakaan hai thodi aur fir dadaji ko nahi bataya hai."
"Chal thik hai. Kal aa jana sath me tayaar honge. Goodnight." sab aapas me mile. Sanjeev bhaiya ne bhi shishtachar dikhate hue "Goodnight gudiya kaha"
aur saamne se bhi Preeti ne jawaab dia.
"Aap sab aise mil rahe ho jaise ye agle shehar ja rahi hai. 2 ghar dur he inka ghar hai." Arjun ki baat sunkar sab hans diye aur Preeti Arjun ko choddkar
sab andar chale gaye.
"Waise mujhe laga tha ki ab tumhe gussa aana band ho gaya hoga. Bade shaant se toh dikhte ho." Preeti ne chalne se phele ghar se bahar aati roshni me
ek baar uske chehre ko dhyan se dekh kar kaha
"Band ho gaya hoga se matlab.? Tumhe kya pata hai mere baare me.?"
"Tumhari didi ne bataya tha ke bachpan me tumhe bada gussa aata tha. Lekin fir tum hostel me rehne ke baad se he bilkul shaant ho gaye the." Safaai se
Preeti ne jawaab dia.
"Atcha tumhara ghar aa gaya hai." Arjun aur Preeti dono baatein karte hue ghar toh pahuch gaye the lein sath chalne par unke sath wale hatho ki unglaiya
ek dusre se khel rahi thi. Uski baat sunte he Preeti ne ek baar Arjun ka poora haath pakad wapis chod dia.
"Meri Preeti ko hath bhi lagaya toh teri jaan le lunga." gate ki taraf jaati Preeti ne Arjun ki nakal karte hue uski he baat dohraai toh wo sharma kar
apne ghar ki aur wapis chal dia aur Preeti khud ke ghar ke andar.