Lajwaab hai aapke abhi tak ki is kahani ke nichod se prabhu
404
Jitni samajh har kirdaar ki aapne dikhai hai Firefox bhai shayad he koyi aisa kar sake. Har insaan kisi ek kirdaar ko apna rukh deta hai lekin aapke jawaab me sabhi shamil the wo bhi apne sakratmak-nakratamak paksh ke sath. Main charitra vishleshan par jyada kuch nahi kahunga kyonki mere liye bhi wo sabhi khaas kirdaar hai aur lekhak ke najariye se main pakshpaat karunga toh kahani se wo nyaye nahi kar paunga jo hona chahiye. Yaha bahut baar jikar hota hai 'Hero' ya villain ka lekin mere liye toh Avdhesh Mishra bhi bas ek jaruri kirdaar hai aur kahi nahi kahi kuch ghatnakramo me baaki sabhi bhi samjhenge ki vyakti ki paristhiti, mahol, majburi aur chahat kya kuch karwa jaati hai.
Manjile yu sakaar nahi hoti ye jara ehtiyaatan fir samajh lije
Safar me mom tapakta hai, resha jalta hai bas ek mand lau ke liye
Baat karte hai sabse pehle toh is kahani ke shuruwaati 16 updates ki jaha par main mool kahani me phir se kaam kar raha hu kyonki waha sirf Lalita ji, Arjun ki umar ya kuch charitro ka sahi vishleshan he nahi, nirantarta me bhi sudhaar hona hai. Jaisa ki wo samay aisa tha jab maine pehli baar he kuch likhne ki cheshtha ki thi wo bhi udhedbun me. Khayaal, kahani ka saar, jitna maine bhaag banane aur vistaar karne ka anumaan lagaya wo sab bas pehli he baar ho raha tha. Kalam kabhi chalai thi toh kavitaaye, hasya-ras, laghu-kahaniya ya samajik vyang tak wo simit raha jisme saamne wala aapko kuch keh nahi sakta, jariya kaha hota hai aise lekhan me.
Yaha likhna shuru kiya toh vichar mile, sujhaav aaye, protsahan aur margdarshan bhi mila. 60 updates lage tab samajh aaya ke pyaare ab tum likhna seekh rahe ho, is se pehle toh bas bata rahe the aur mastraam ki chhaya bhar the. Haan ab thoda is cheej ko barkaraar rakho namak ka pata chal gaya hai toh ab masaledani ke sabhi swaad bhi chakho aur anusaar prayog karo. Toh apni he kahani phiri se padhi lekin tab tak jiwan me bahut kuch ghat chuka tha.
Khair wapis aaye toh rooprekha pehle se behtar thi aur ab likhne me jo maja aane laga wo majburi jaisa nahi tha ke jaruri hai bhai, log kya kahenge. Kahani poori karni hai ek target hai. Sab bhool kar khud he kirdaaro se juddna shuru kar diya. Lekin khaamiya abhi bhi bahot hai jo samay milne par he sudhar sakengi.
Ab kuch jaruri tatvo par baat karte hai jinme se sabse pehle hai Rupali ko kya pata hai aur wo uske sath kitna nyaye kiya gaya. Toh filhal wo pariwar me dhal chuki hai aur ab wo behtar hai. Usko parde ke peeche rakhne ka maksad wahi hai ke inka role sahi samay par aayega lekin inhe jaankari bahut hai kyonki baap-beti he toh the bas waha gaanv me.
Umed ka kirdaar manmauji tha lekin 2 bhai marne ke baad aur pita ke sab logo se kinara kar lene par ye bas apne pariwar ko he bachane me lag gaya. Insaan khojbin tab karta hai uske pas wo samay ho aur wo sahuliyat ho. Yaha toh pariwar bikhra so bikhra apni zindagi bhi dusro ke naam ho gayi. Mehnat aur lagan se bas yahi sapna poora karne me lage hai ke wo Swargiya Raghubir Singh ke bete ke taur par khud ko sarthak kar sake. 2 pariwar jo ek hai woh ek rahe, surakshit rahe aur agar mitne ki bhi baari aaye toh sabse pehle goli inhe lage. Umed Singh ka filhal kirdaar aata-jata rahega lekin Bhaag 3 ke 20-22 updates me wo pramukh rehne wale hai, Shankar aur Inder ke sath.
Abhi itihaas bahut baaki hai aur waha ki vistaar se batane laayak kisse bhi toh kahni se us samay ye wala Arjun thoda thoda he dikhai dega. Mera pasandida bhaag wahi hai aur sabhi jade wahi dafan hai. Waha mahol bhi kahi behtar aur rochak rehne wala hai aur jo log 50-60-70 wale dashak se parichit nahi hai unhe jarur kuch naya jaan ne ko milega.
Annu walia ke kisse main jyada nahi khol kar kehta kyonki har baat ya toh kehni nahi chahiye ya fir bacha kar rakh lo baad me kaam aayegi. Waise bhi itna vistaar hua toh main agle 5 saal pyaar 100 bar he likhta milunga aur update honge koyi 1500
Filhaal toh yaha bhasad si machi hui hai aur ye aise he chalne wali bhi hai kuch samay tak lekin Narinder ke aate he yahi Bhole wale Shankar ji apni form me dikhenge, tabhi inke pita ji samjhate rehte hai. Shaadi byaah tak update kahi ek pehar bhi poora le lega toh kahi 4 din ka jiwan ek update me bhi dekhne ko milne wala hai.
Tahe dil se shukriya mere bhai
404 , aap pehle he update se sath ho jaise apne tintin bhaiya, 2-2 iron man, virat kohli bhai aur ye judaav mujhe hamesha prerit bhi kartta hai ki main nirbhik prastut kar saku jo main likhna chahta hu. Visham samay me mujhe toh kuch kehna he nahi pada kyonki aap he logo ne sab sambhala aur mahol barkaraar bhi rakha.
Title ke baare me main bhi ek baat kahunga ki pyaar jo hai wo 100 logo se ek ek baar karke 100 bar nahi ho sakta. haan 100 log pyaar kar sakte hai aur unke jiwan me us pyaar ka kya asar hota hai wo is shirshak ke peeche ka ek chhota sa rehasya hai. Aakhiri update me he iska khulasa karunga aur wo update sabse pehle likha ja chuka