- 1,217
- 3,854
- 159
•°UPDATE 59•°
Recap -
Adarsh ke khaatir, Manav kya sharmindgi aur kya apmaan.. sab kuch jhelne ko taiyaar tha. Jaahir hai.., university me Lakshya ke itne laaparwah vyavhaar ka kaaran bas yahi tha ki uske pita sahar ka deputy mayor tha.
Lekin phir bhi, yahan Manav ke naam-maatra ke hi sahi kintu bhaavi sasur, vaastav me Chennai University ke sabse bade shareholder the, aur.. unki company 'the Shaurya Group ' poore Asia ki economic leader thi !!
Iss background se kya kuch nahi ho sakta hai..?
Manav ne phaisla kiya ki wo ye sunishchit karenga university is ghatna ko nishpaksh roop se deal kare. Varna yah uske liye bada sharmnaak hoga..., aakhir woh itni badi shakhsiyat ka damaad jo thehra!
AB AAGE :-
Ant me, jab ve apne hostel ke room me laute to, un chaaron ko thoda nasha chadh chuka tha. Lekin phir bhi, Manav par utna nasha nahi chada aur chaaron ladkon me weh sabse shaant bhi tha.
Aaj hui tanaav bhari ghatnaon ke baad, Manav ko Adarsh ki dekhbhaal karne ke liye uske saath hi rehna chaahiye tha. Parantu, is samay, use apni dadi, jo haal hi me hospital se discharge hui thi, ki bahut yaad aa rahi thi. Saath hi, woh is matter par Uncle (Rajyavardhan) ki advice bhi lena chaahta tha. Isliye, usne study material ikattha kiya aur bus pakad Saanvi ke ghar ke liye ravana ho gaya.
Jab weh Saanvi ke ghar pahuncha to, shaam ke 7 baj chuke the. Avantika ne dinner ke baad kitchen ki saaf safaai bas kuch samay pehle hi khatam ki thi aur ab weh, TV dekh rahi Manav ki dadi ke paas aakar unse gapshap kar rahi thi.
Jaise hi Manav ghar me enter hua, wo apni dadi ke fresh, chamchamate aur behad healthy dikh rahe chehre ko dekh kar hairaan reh gaya.
Bade aaram se couch par baithi dadi, Manav ko dekhkar bahut jyada khush to thodi hairaan bhi hui,
Dadi : "Manu..! hum abhi tumhare baare me hi baatein kar rahe the! mujhe laga aaj tum nahi aaoge. . "
Manav : "Dadi wo.. university me kuch ho gaya tha, to mai wahan se jaldi nahi nikal paaya.. aap batao dadi! ab aap kaisa mehsoos kar rahi ho..?"
Dadi : " Haaha! pehle se bahut behtar! yahan tak ki mera blood pressure bhi normal level par aa gaya hai!"
Dadi ma ki aawaj badi saaf aur spasht thi.
Darasal, iss samay dadi ma ka chehra bada tarotaaja dikh raha tha, unki haalat ek recover ho rahe mareej jaisi to bilkul bhi nahi thi. Iske ulat, ve to apni umr se kuch saal chhoti aur jawan bhi dikh rahi thi.
Dadi ke bagal me khadi Avantika, dadi - pote ki baatcheet sunkar muskura rahi thi.
Avantika ko tareef bhari nigahon se dekhte hue dadi ne aage kaha,
Dadi : "Aur aisa ho bhi kyu na!?
Avantika ne mera bahut achchhe se khyaal rakha. Yein pichhle 2 dinon se daily, mere liye herb soup bana rahi hain, jisse meri body jaldi se recover ho gayi hai aur mai pehle ki tulna me stronger bhi mehsoos kar rahi hoon" 
Manav ko shak hua ki jaroor Aunty, herb soup me kuch elixirs* daal rahi hongi. Jitna jyada wo dadi ki refreshing muskan par gaur karta jaa raha tha, utna hi use apne shak par yakeen ho raha tha.
Iske alawa, Saanvi ke ghar ke sukhad mahool me dadi ka mood bahut achchha rehta tha, isliye bhi ve jaldi se recover ho gayi thi.
Khair.. jo bhi ho, yeh dekhkar ki uski dadi ki sehat bahut behtar thi, Manav ko aakhirkaar thodi raahat mehsoos hui.
Weh Avantika ki or muda aur poochha,
Manav : "Auntie, Sani kahan hai?"
Avantika : "Ve oopar apna homework kar rahi hain, aap unhe join karein. Aur.. tabtak mai aapki dadi ke saath kuch aur baatein kar lungi,"
Manav : "Okay!"
Apna samaan liye, Manav seedhiyan chadhne laga.
Seedhiyan chadhte hue woh, living room me maujood Auntie aur dadi ko dekhne ke liye peeche muda.
Usne dekha ki, ve donon asaadharan roop se ghulmil gayi thi aur.. aisa lag raha tha jaise ki, khud ki bahu (Manav ki maa) ki tulna me dadi, Aunty ke jyada kareeb aa gayi thi. Donon ke beech ek alag hi lagaav se bhara hua, gehra rishta viksit ho gaya tha.
Manav (man me) : ".. Ye duniya bhi kitni ajeeb hai,"
Jald hi, weh Saanvi ke bedroom ke darwaaje par khada tha. Usne chupchaap haule se dhakka dekar darwaaja khola, aur dekhta hai ki Saanvi apni study table par thi aur homework karne me busy thi.
Darwaaje ki awaaz sunkar, Saanvi ghoomi aur Manav ko dekh kar turant bura muh bana liya,
Saanvi : "Humph* !"
Manav uske paas gaya aur uski kuch textbooks, jo usne padhne ke liye li thi, lautate he poocha,
Manav : "..Ab kya hua..? Ab maine aisa kya kar diya jo itna bhadak rahi ho..?"
Apna muh fulaate hue Saanvi ne gusse se jabaab diya,
Saanvi : “Aaj mom ne dinner me tumhari bahut si favorite dishes banayi thi. Lekin tumne, bas ek call karke mom ko bol diya tum dinner karne nahi aa rahe ho! huh! Tumne mom ke itne efforts aur unke good intention ko bilkul waste kar diya! "
Manav : ".. oh.. ?"
Jaise hi use Saanvi se ye sab pata chala, weh aashcharychakit aur Aunty ke prem ke prati bhavuk ho gaya tha.
"Aaj... university me kuch aisa ho gaya tha.. jisse mai nahi aa saka.. ,"
Explanation dete hue Manav Saanvi ke bagal me baith gaya aur apne bag se study material nikaalne laga.
Saanvi ne Manav ke explanation ko unsuna kar diya aur apne gaal phulana jaari rakha. Magar phir bhi, woh badi pyari lag rahi thi.
Manav : "Tumhare midterm exams isi Friday se start ho rahe hai na? "
"Hmm," Saanvi ne halke se apna sar haan me hilaaya.
Usne ek ruffle layered printed top aur ek mid-length khaki pants pehni hui thi, jisme woh badi nikhri hui aur khoobsurat dikh rahi thi. Iss pehnawe ne uski cuteness ko aur bhi jyada badha diya tha.
Uski sunder petite body se shower lene ke baad ki halki bheeni khushboo aa rahi thi, jo Manav ki soonghne ki sensations ko thoda uttejit kar rahi thi.
Uske pehnawe ko dekh kar koi doubt nahi tha ki weh ek famous designer ki beti thi. Yahan tak ki uske casually matched kapde bhi bade shaandaar hote the, jaise ki abhi vartmaan ke!
"Chalo to phir midterms ki hi preparation karte hai,"
Notes kholte hue Manav ne sujhaav diya.
Saanvi dwara di gayi textbooks ko padhne ke baad, Manav ko ab Saanvi ki learning process ki spasht samajh thi aur ab weh exam ke lehaj se unn important topics ko pehchanne me saksham tha jin par Saanvi ko focus karna chahiye.
Isliye, ab woh Saanvi ko is tarah se padha sakte tha jisse use exam preparations me & achhe marks laane me direct help mil sake.
Ek baat jaroor gaur karne wali thi, weh ye ki humesha ki tarah is baar Saanvi ne bahas karne ki koshish nahi ki.. is baar usne chupchaap Manav ki baat maan li aur exam preparation ke liye taiyar ho gayi.
Manav ne mehsoos kiya ki aaj Saanvi vaastav me cheejon ko seekhne ki koshish kar rahi thi. Usko lagan se mehnat karta dekh, Manav asaani se bata sakta tha ki weh is baar ke mid term exams ko lekar serious thi.
Saanvi ko revision karwane ke liye Manav use, har ek subject ke important topics ko samjha raha tha. Aur important topics samjhate samjhate 2 ghante beet chuke the.
Manav ke saath Saanvi ka aaj ka tution session, ab tak ka sabse productive session saabit hua..
Achanak Manav ne revision karwana band kar diya aur Saanvi ki or mudkar kaha,
Manav : "Tumhe ab so jaana chaahiye.. ab mai apni dadi ke saath kuch time spend karunga."
"Okay..,"
Saanvi ne haan me sar hilaya,
Uska sar abhi bhi neeche tha, aur woh aaj ke revision notes ko arrange karne me talleen thi.
Saanvi ki aaj ki harkaton ne Manav ko achambhit kar diya tha. Ek second ke liye to use doubt bhi hua ki, kya uske paas baithi Saanvi vaastav me real Saanvi thi bhi ya nahi?!
Khair.. chupchaap woh uske bedroom se nikal gaya aur apni dadi se milne unke room me chala gaya.
Bistar par laiti hui dadi ma, abhi bhi jaag rahi thi maano ve Manav ke aane ka intjaar kar rahi thi.
Manav ke aate hi,
Dadi : "Ho gaya bete Sani ko padhana?" ☺
"Haan.. sab kuch to nahi padha paaya.. lekin hum agle kuch dinon me syllabus cover kar lenge,"
Manav jabaab dete hue dadi ke bed par baith gaya.
Dadi : "Manu.., mujhe lagta hai ki Sani ki family ke saath tumhara rishta utna bhi simple nahi hai jitna tumne bataya tha. .
Aur jab maine Avantika se is baare me poochha, to weh mujhse sirf yahi kehti rahi ki tum bas Sani ke tutor ho,"
Apna dhyaan Manav ke chehre par kendrit karte hue dadi ne sawal kiya,
Dadi : "Kya.. kuch aisa hai jo tum mujhse chhipa rahe ho Manu ! ??"
"Uh ... nahi..," Manav ne fauran apna sar naa me hilaaya,
Manav : " wo.. dadi mai bas.. iss family ke bahut close ho gaya hun."
"Acha theek hai.. . waise bhi, meri jaan bachane ke liye mai Avantika aur uski family ki bahut karjdaar hoon, isliye.. bete tumhe Sani ko padhane me apni poori koshish karni hogi,"
Dadi ne dheere se Manav ke kandhe par haath rakhte hue kaha.
Avantika ke ghar me bitaaye inn kuch dinon me, dadi ne mehsoos kiya ki Maurya's unke saath aisa vyavhaar kar rahe hai jaise ki weh unki sagi senior family member hon.
Jis tarah se ve sabhi unke prati itne respectful aur vicharasheel the, usse dadi ko vishwas ho chala tha ki Maurya's , vaastav me mahaan gunon (virtues) aur sanskaron wala parivaar tha.
Udaahran ke liye,
Sani har roj subah aur raat me, niyam se dadi ma ko greet kiya karti thi. Itna hi nahi, woh to har subah dadi ko breakfast ke liye jagane aati; aur har shaam school se ghar aane ke baad, dadi ma ko dekhne jaati aur unki jarooraton ke baare me poochti.
Kul milakar dadi ko Sani se bahut lagaav ho gaya tha. Dadi ki najaron me Sani bahut hi shaleen aur samajhdaar bachchi thi.
Natijan, dadi ne man hi man phaisla kar liya tha ki bhale hi ve recover hokar, beach par stith apne ghar laut aaye lekin, phir bhi ve Avantika aur uski family ke saath apne sambandh kabhi nahi todegi.
Iske alawa, ve to apne bete (son) ko Maurya's se milawane ki planning tak kar rahi thi. Dadi ke anusaar koi fark nahi padta ki unke bete aur bahu ki bahut busy life thi, lekin ve donon Maurya's ke sath achchhe sambandh banaye rakhne ki koshish to kar hi sakte the.
Dadi ko ummeed thi ki donon families ke beech ki ye dosti kaayi peedhiyon tak chalegi.
To doosri or, dadi yeh bhi soch rahi thi ki kitne afsos ki baat hai ki Sani Manav se bahut chhoti thi aur isliye unn donon ke beech romantic feelings nahi panap sakti thi. Agar donon hum umr hote to, donon teenagers kitne shaandaar couple ban sakte the...
Dheere-dheere. , jaise-jaise dadi ki imagination aasmaan chhu rahi thi, unke dil aur dimag me purane jamane ke riti rivaaj aane lage jab shadi, 10-15 years ka age difference hone ke baavjood bhi ho jaaya karti thi.
Dadi ki imagination yahi par nahi ruki..
Ve to sochne lagi thi ki agar Avantika unki bahu ban jaati to kitna achha hota
Khair, aisa ho paana ab to sambhav nahi tha, phir bhi dadi ki soch me agar donon families shadi ke bandhan me bandh jaati to kitna acha rehta..
Agar aisa ho jaata to donon families ke beech sambandh aur jyada pukhta aur majboot ho jate...
Dadi (man me) : "Badakismati se Sani.. Manav ki girlfriend banne ke liye bahut chhoti hai.. "
Nishchit roop se Manav ko dadi ki "crazy aur wild" imaginations ka kuch andaaja nahi tha. Uska dhyaan to, "thodi khamoshi aur thodi baatcheet " process me, dadi se apni college life ki baaton ko share karne par tha. Theek usi tarah jaise wo beach wale ghar par kiya karta tha.
Baharhaal, aise hi aadha (1/2) ghanta beet chuka tha, aur ab Manav ke university jaane ka samay ho gaya tha.
Halaanki Manav to apni university lautne ke liye taiyaar tha, lekin pyari dadi apne laadle pote se alag hone ke liye taiyaar nahi thi,
Dadi : "Manu..! Avantika ne kaha tha ki tum yahaan ruk sakte ho. Tum yahi mere saath ya attic me so sakte ho beta.. "
Dadi ka haath apne haathon me thame hue Manav ne uhne dilaasa dene ki koshish ki,
Manav : "It's okay.., dadi. Mujhe university wapas jaana chaahiye. Agar mai aise hi aksar baahar raha to yeh bhi theek nahi rahega..,"
Asal me , woh abhi bhi Adatsh ko lekar chintit tha aur.. uska sath dene, use comfort dene wapas jaana chaahta tha.
Dadi : "Hmm.. sahi baat hai.. aise aksar baahar rahoge to tumhari studies par negative effect pad sakta hai.. theek hai! raat bahut ho gayi hai Manu beta.. ab tumhe jaana chahiye." ☺
Beshak dadi chaahti thi Manav raat, unke saath ruke. Magar ve yeh bhi nahi chaahti thi ki woh college me kharaab marks le aaye. .
Manav : "Haan. Aap bhi ab rest kariye dadi. Mai aapse milne kal aaunga,"
Manav bed se utha aur apni dadi ko bye bolkar, ek sarsari najar unke room ke har kone me daalte hue, room se bahar chala gaya.
Doosri manjil ke corridor (galiyare) se hi, Manav dekh sakta tha ki pehli manjil par, living room ke bagal wale study room ki light abhi bhi jal rahi thi;
Usne andaja lagaya ki Uncle abhi tak sone ke liye nahi gaye the. Apni ummeed ke mutabik seedhiyon se neeche utarte hue, Manav ne study room ka darwaja poora khula hua paaya. Andar, ek badi si shirt pehne hue Rajyavardhan, kuch files padhne me magn tha.
Darwaaje ke paas khade hokar Manav ne dheere se knock kiya.
Rajyavardhan ne sar uthakar oopar dekha. Jab usne Manav ko dekha, to usne haami me thoda sar hilaaya aur kaha, "Aaiye."
Manav : "Umm.. Uncle.. mujhe ek matter par aapki opinion (rai) chaahiye thi..,"
Jaise hi Manav study room ke andar aaya, usne ghadi ki or dekha aur paaya ki.. lagbhag 10 baj chuke the.
Manav ke anusaar Sani ke pita apne kathan aur karni, donon me humesha hi gambheer raha karte the.
Aur..., table par rakhe files ke dher ko dekh kar Manav bata sakta tha ki abhi filhal Uncle ka workload, bahut! bahut !! jyada tha.
Usne man hi man ummed ki, ki college ke itne chhote se matter par apna time waste hota dekh uncle kahi naraaj na ho jaye. .
Rajyavardhan : "Batayein?"
Rajyavardhan ne apne haathon me maujood files ko table par rakh diya aur seedhe Manav ko dekhne laga.
Manav : "Wo.. Uncle.. baat ye hai ki, aaj mere ek classmate ne university ki basketball team ke saath..…”
....
....
....
Manav ne Rajyavardhan ko poori ghatna ke baare me bataya, jismen usne iske sabhi kaaran aur sambhavit effects bhi bataye..
Apni chair par baitha Rajyavardhan, Manav ko dekhte hue, uski baaton ko aise chupchaap aur dhyaan lagaakar sun raha tha maano uske dimaag me khudka koi vichaar hi naa aa raha ho.
Manav ka apni baat khatam karne ke baad, aakhirkaar Rajyavardhan ne apna muh khola,
Rajyavardhan : "Itna hi? Aur fight me aap bhi involve the?”
Manav ne jabaab me apna sar haami me hila diya.
Use, Uncle ko apne pachde me involve karna aur usne help karne ke liye kehna bada awkward lag raha tha.
Waise bhi, Rajyavardhan koi uska pita to tha nahi.
Oopar se, Manav ne unhen pehle hi apni dadi ke liye pareshan kar diya tha, aur to aur, dadi ab unke ghar me reh rahi thi.
Manav humesha se hi maan, maryaada aur laaj rakhne wala ladka tha. Use ab chinta ho rahi thi aise baar baar help maange se kahin uncle use besharam ladka naa samajhne lage..
Rajyavardhan ne Manav ko dekhte hue neerasta se kaha,
Rajyavardhan : "Manu, aapko is tarah ke matters ke liye mere paas aane ki jaroorat nahi hai,"
Manav ka dil dhak reh gaya. Use laga ki jaisa usne socha tha , usne Uncle ke saamne apne good impression ka kachra kar diya tha.
Rajyavardhan : "Elder Vinod se baat kariye. "
Sharmindgi ke kaaran Manav ka chehra tamatar ki tarah laal ho raha tha.
Jaise hi weh uncle ko bye and goodnight kehne ke liye taiyaar hua, Rajyavardhan ne aage kaha,
Rajyavardhan : "Mai jald hi is baare me principal ko call kar dunga. Aapke classmate ka name Adarsh hai, correct?"
Manav ke man me ummeed ki ek kiran jagi. Uncle ko dekhte hue, jinka chehra bhaav viheen tha, lekin ve turant uski help karne ke liye maan gaye the, Manav ka dil aabhaar se bhar gaya,
Manav : "Ji.., Thank you so much, Uncle!"
Rajyavardhan : "It's alright. Jitna kuch aapne bataya uske according, aap logon ka koi serious fault nahi tha. Aur mujhe university se ummeed hai ki wo in matters ko jyada nishpaksh roop se handle kar sakti hai. Anyways, aage aap careful rehna,"
Rajyavardhan ne ghadi ki or dekha aur aage kaha,
"Aap aaj raat yahin ruk rahe hai, right?"
Manav : "Nahi.. uncle.., mujhe ab university wapas jaana chaahiye,"
Rajyavardhan : "Yahan.. mujhe abhi bhi bahut kaam hai, agar aap khud se university chale jaaye to kya ye aapke liye theek rahega ?"
Manav : "Ji Uncle! And thanks once again!”
Manav muda aur utsaahit hote hue Study room se baahar chala gaya.
Jab woh Saanvi ke bedroom se apna samaan lene dubara second floor par gaya , to usne paaya ki Saanvi padhai karte hue apni desk par hi so gayi thi.
Manav bina awaaj kiye apne panjon ke bal desk ki or badha aur desk ke paas pahuchkar chupchaap Saanvi ke chehre aur uske haathon ko dekhne laga, jo desk ke against dabe jaane se laal ho gaye the.
Manav (man me) : "For sure..ye apne midterms ke liye bahut mehnat kar rahi hai"
Manav ne Saanvi ko apni study ke prati itna serious pehle kabhi nahi dekha tha.
Use itne sukoon se sota hua dekhkar, Manav use jagana nahi chaahta tha.
Halaanki, use is baat ki bhi chinta thi ki aise hi sote rehne se Saanvi ko sardi baith sakti thi aur peeth me dard bhi ho sakta tha.
Isliye, ek pal ke vichaar ke baad, Manav neeche jhuka, ek haath usne Saanvi ke ghutno ke neeche lagaya aur doosra haath uski peeth par rakhte hue, dheere se use oopar utha liya
.
Aisa lag raha tha ki Saanvi gehri neend me thi kyunki Manav ke use uthaaye jaane se weh bilkul bhi nahi jaagi. . uski aankhen band thi, aur saansein shaant.
Saanvi ko uthaye hue, jo kisi soft teddy bear ki tarah mulayam thi, Manav uski body se aati meethi khushboo me dooba hua tha. Khair, bed ke paas pahuchte hi turant usne Saanvi ko dhyaan se bed par lita diya aur kambal ouda diya.
Phir, usne bina awaaj kare apni cheejen uthayi aur dabe paav darwaaje ke paas pahuch gaya. Isse pehle ki woh bedroom se baahar nikalta aur room ka darwaja band karta, usne room ki sabhi lights off ki aur ek nightlight on kar di. .
Lekin,
Jaise hi kamre ka darwaaja band hua, Saanvi, joki "gehri neend" me thi, ne dheere se apni aankhen kholi , 👁👁
Laal rang ki ek laali parat ne turant uske chehre ko dhank liya tha. .
"Idiot ..."
Woh dheere se apne dil me phusphusayi.
Aur iske saath hi update yahi par khatam hota hai..
🅁🄴🄰🄳, 🄻🄸🄺🄴
🄰🄽🄳🄲🄾🄼🄼🄴🄽🅃
To be continued.....
Last edited:
