RECAP :- AB TAK AAPNE PADHA KI AV NISHANT JI KI FAMILY SANG JAIPUR LAUT AATA HAI. WAHIN DEVA KO DR. AMRITA KA PATA CHAL GAYA HAI AUR USNE AV KO BHI YE BAAT BATA DI HAI.
AB AAGE :-
LOCATION :- DR. AMRITA’s CLINIC (UDAIPUR)
Iss waqt AV aur DEVA khade hain iss jagah ke baahar. To kal jab DEVA Ne AV ko yahaan ka pata bataya, tabhi AV ne usse keh diya tha ke wo dono agle din hi yahaan aayenge. Subah hi AV NISHANT JI ko iss baare mein batakar ghar se nikal gaya. Ab JAIPUR se UDAIPUR pahunchne mein 6 – 7 ghante to lagte hi hain. Isiliye in dono ki shaam ho gayi thi yahaan pahunchne mein.
AV ne DEVA ko andar chalne ka ishara kiya aur dono clinic ke andar pravesh kar gaye. Bas kuchh ginti ke hi patients the andar iss waqt. Ye dono bhi wahin sitting area mein baith gaye. Jab inka no. Aaya to ye dono andar doctor ke cabin mein pahunche. Dr. AMRITA ne jab AV ko dekha to wo unhe jaana pehchaana laga par unhe yaad nahi aa raha tha.
Kuchh bhi kehne ki bajaaye AV ne SANJANA Ji ki wo 5 saal puraani report nikaalkar table par rakh di. Jab Dr. Ne wo report dekhi to unke haath kaanpne lag gaye aur unke haath se wo file chhoot kar gir gayi. Ab AV ko confirm ho chuka tha ki zaroor isne hi kuchh gadbad ki hai. Idhar DR. Madam ko yaad aa gaya tha ki AV kaun hai.
AV – Haan to madam aap batayengi ki uss din kya hua tha?
DR. ( Haklaate huye ) – Ttum kkya baat karr rrahe ho mujhe kkuch samajh nahi aa raha.
AV – Ab aap sach baatayengi ya main koyi aur tareeka apnaun?
DR. – Jaao yahaan se warna main police ko bulaungi.
AV ne DEVA ko ishara kiya aur usne apni kamar se bandook nikalkar table par rakh di. Gun dekh kar Dr. Ki bachi kuchi himmat bhi jawaab de gayi. Ab shayad wo samajh gayi thi ki sach batane ke alawa uske paas koyi raasta nahi hai. Par unhe samajh nahi aa raha tha ki wo kaise batayen. Dr. AMRITA ko kuchh na kehta dekh kar AV ne apna haath Gun ki taraf badhaya aur usse utha liya.
Usne gun DR. Ki taraf ki hi thi ke itne mein,
DR. – Main batati hoon please mujhe mat maarna.
............
............
Iske baad unhone saari ghatna ka bakhaan karna shuru kiya joki main aapko baad mein Bataunga. Aur unki kahi gayi saari baatein AV ne mobile mein record kar li. Unke chup hone ke baad.
AV – Kaun tha wo aadmi?
DR. – ACP NARESH PANDEY.
(Uss samay wo ACP hi tha abhi kuchh waqt pehle hi unka promotion hua tha).
DR. – I'm sorry par main majboor thi.
AV – Aap ek doctor hain aur doctor ka kaam wo to katayi nahi hota jo aapne uss waqt kiya tha. Mana ki aapko majboor kiya gaya tha par fir bhi aapko aisa nahi karna chahiye tha.
Ab AV ko pata tha ki usse NARESH ko kaise dhoondna hai. Wo DEVA ke saath wahaan se chalta bana.
Baahar aakar usne kisi ko phone lagaya,
AV – Hello, AKRAM Sir.
(Ji haan ye ACP AKRAM SHEIKH hi hain).
ACP – Haan bolo ab kya kaand kar diya tumne?
AV – Arre kaisi baat karte ho Sir, main kya aapko aisa lagta hoon.
ACP – Haan wo dekha tha maine ki tum kaise ho. Waise phone kyun kiya?
AV – Mujhe ek police officer ke baare mein information chahiye thi.
ACP – Kiske baare mein aur kyon?
AV – ACP NARESH PANDEY, 5 saal pehle JAIPUR mein the wo. Air kyun ka jawaab main nahi de paaunga. Sorry. Aur ye kaam agar thoda jaldi ho jaaye to.
ACP – Thik hai main pata to kar doonga. Par ab usse mat tapka dena.
AV – Sir, aapko to pata hain na main kitna masoom hoon. Main thodi naa kisiko ko maar sakta hoon.
ACP – Haan haan pata hai. Main phone karunga jab pata chal jaayega.
Iske baad usne phone rakh diya. Ab raat ka samay hone hi waala tha aur ab itne ghante ki driving karna sahi nahi tha isiliye unhone wahin ek hotel mein do kamre book kiye aur aaram se so gaye.
Idhar JAIPUR mein AV ke school mein next class ke liye admission shuru ho chuke the. Aur SUYASH ne apne dost se SHRUTI ke admission ke baare mein baat bhi kar li thi. Wahin MAHI aur SHRUTI ki ek din mein hi kaafi acchhi bonding ho gayi thi. Aur dono saheliyan bhi ban gayi thi.
NEXT DAY :-
LOCATION :- AV ‘s HOUSE
Dopahar ka waqt hai aur AV UDAIPUR se waapis bhi aa chuka hai. Aur aaj ke din kuchh khaas hai par AV ko iss baat ki koyi bhanak tak nahi hai. Wahin SHRUTI & MAHI aaj ke liye bahut excited hain. Jab AV ghar pahuncha to sabhi ko taiyaar baitha dekh kar AV ne swaal kiya,
NISHANT – Beta ham sab thoda ghumne jaa rahen hain. Shaam tak waapis aa jaayenge.
AV – Chalie Mamaji main bhi chalta hun.
NISHANT – Nahi beta tum rehne do, thak gaye hoge. Tum aaram kar lo.
AV – Thik hai , jaisa aap kahen.
Fir wo chaaron jan wahaan se nikal gaye aur apna hero rest karne ke liye apne kamre ki taraf chal diya.
Shaam ke samay ek phone ki ring se AV ki aankh khuli. Usne dekha to phone ARYAN ka tha.
AV – Haan bol kya hua.
ARYAN – Ye mari huyi aawaz mein kyun bol raha hai. Kutte ne kaat liya kya?
AV – Nahi yaar tujhse to main mila hi nahi itne din se to tu kaatega kaise?
ARYAN – Bakwaas mat kar aur taiyaar ho jaa main tujhe lene aa raha hoon.
AV – Kyun tu suicide karne waala hai kya? Agar aisa hai to jaldi aa main wait nahi kar sakta.
ARYAN – Bhonk mat aur jaldi ready hojaa. Kahaan jaana hai pata chal jaayega.
Aur itna kehkar usne phone rakh diya. AV bhi bemann se utha aur ready ho gaya. Itne mein hi usse baahar Car ki awaaz aayi. Jab usne baahar aakar dekha to wahaan Car mein ARYAN aur uska bada bhai RAGHAV maujood the. Wo bhi andar baith gaya. Saare raaste usne un dono se bahut poochha par dono mein se kisine usse na bataya ki wo kahaan jaa rahen hain.
Wahin AV ne NISHANT Ji ko message kar diya tha ke wo kahin baahar jaa raha hai. Jab gaadi ruki to AV ne notice kiya ke wo ek hotel ke baahar hai, ARYAN ne usse andar chalne ko kaha aur wo uske peechhe peechhe chal diya. Wo teeno chalte huye hall ke andar pahunche jahaan chaaron taraf andhera tha.
Abhi AV soch hi raha tha ke achanak lights on hui aur usse kayi logon ki milijuli awaaz aayi joki thi,
HAPPY BIRTHDAY….....
Ji haan aaj AV ka birthday hai par wo kabhi celebrate to karta nahi tha. Par NISHANT Ji ko uska birthday yaad tha, ab uska aur SHRUTI ka birthday same day hi to hota hai. Idhar MAHI ko bhi ye din yaad tha. MAHI aur SHRUTI ne milkar poori planning ki thi. Aur ussi ke mutaabik sabko yahaan bulaya gaya tha aur ant mein ARYAN ke zariye AV ko bhi.
Ye saari taiyaari dekh kar AV ki khushi ka thikaana nahi raha, aakhir uske Mom Dad ke jaane ke baad pehli baar uska birthday celebrate kiya jaa raha tha. Sab logon ne baari baari se usse aur saath hi SHRUTI ko bhi wish kiya. Fir wahi cake cutting ceremony huyi aur sabse pehle in dono ne ek doosre ko hi cake khilaaya.
Fir thodi der sabne wahaan enjoy kiya, aur mauka dekh kar AV ne MAHI ko baahar aane ka ishara kiya. Jab wo hall se baahar nikli to ek haath ne MAHI ko ek taraf kheench liya. Iss se pehle wo cheenkhti ek aur haath ne uska muh bhi band kar diya. Par tab tak wo normal ho gayi thi kyonki wo samajh gayi thi ki ye AV hi hai. AV ne uske kaan mein kaha,
AV – Aaj mera birthday hai lekin tumne to mujhe koyi gift hi nahi diya.
MAHI – Ye poori party ke arrangements maine hi kiye hain , ye kya kam hai jo tumhe aur kuchh bhi chahiye.
AV – Mujhe to chahiye.
MAHI – Acchha bolo kya?
AV – Ek kiss.
Aur ye kehkar AV ne apne honth aage ki taraf badha diye par MAHI uske gaal par kiss karke haste hue wahaan se bhaag gayi. Aur Idhar AV ke chehre par bhi ek muskaan aa gayi.
Abhi wo wahaan khada hi tha ke tabhi uska phone bajne laga, Call ACP AKRAM ka tha aur unhone AV ko kal milne bulaya tha kyonki unhone NARESH PANDEY ke baare mein poori information nikalwa li thi.
Kuchh der tak inki party yahaan chali fir sabhi log apne apne ghar chale gaye.
Idhar DELHI mein DCP NARESH ne ek aadmi ko DR. AMRITA ko dhoondne ka kaam diya tha aur usne bakhoobi wo kaam poora bhi kar liya. DCP Saahab ek baar DR. Se milkar confirm karna chahte the ki kahin AV ko sachayi pata to nahi chal gayi. Aur isike liye ab unhone UDAIPUR nikalne ka faisla kiya. Par filhaal kuchh din wo ek case ke silsile mein kuchh zyada hi vyast the isiliye unhone chaar paanch din baad jaane ka tay kiya.
NEXT DAY :-
LOCATION :- POLICE STATION (JAIPUR)
“Bataiye Sir kya pata chala uss baare mein?”
Ye sawaal poochha AV ne ACP AKRAM se. Aaj unhone AV ko yahaan bulaya tha aur theek samay par wo yahaan pahunch bhi gaya.
ACP – Kaafi kuchh. 5 saal pehle wo yahaan JAIPUR ke ACP the. Yahaan posting huye unhe kuchh hi din huye the aur unka transfer DELHI mein ho gaya. Maine pata kiya hai unhone khud hi transfer ki request ki thi kuchh personal reasons batakar. Filhaal wo DELHI mein DCP ki post par hain. Kuchh waqt pehle hi unka promotion hua hai. Suna hai bahut imaandar aur desh bhakt police officer hain.
AV – Haan sach mein. Bahut hi zyada imaandar.
Ye baat AV ne ek tanj dete huye kahi thi. Aur uske lehze ko maddenazar rakhte huye,
ACP – Aisa kyun kaha tumne. Aur bataaoge mujhe ki tumhe unse kya kaam pad gaya?
Waise to AV batana nahi chahta tha par fir usne socha ki chalo bata hi deta hoon. Aur fir usne poori kahani joki Dr. AMRITA ne usse batayi thi ACP Saahab ko suna di. Poori baat sunkar wo bhi shock ho gayae.
ACP – Ab samjha ki tumhe itni jaldi kyun thi. Waise jitna unke baare mein suna tha, aisi umeed to nahi thi. Par fir bhi tumhe yahi kahunga ki ye masla shaanti se suljhaane ki koshish karna. Ab unki biwi ki thodi naa ismein koyi galti hai. Shayad unhe to iss sabke baare mein maloom bhi nahi hoga.
AV – Hmm, baat to aapki sahi hai. Main bhi aisa hi soch raha tha. Acchha theek hai. Ab main chalta hoon.
Bas fir apna hero wahaan se nikal gaya.
Jab usne saari baat ghar aakar batayi to ye faisla hua ke wo kal hi DELHI ke liye niklenge. Aur AV ke saath NISHANT JI bhi wahaan jaayenge. DELHI jaane se pehle AV ne ek baar MAHI se milne ka socha aur usse phone karke ek jagah bula bhi liya. AV ne sabse pehle apne ghar ke paas ke hi dost se bike ka jugaad kiya aur fir pahunch gaya jahaan usne MAHI ko bulaaya tha.
Wahaan MAHI pehle se hi khadi thi. Aur aaj usse dekh kar AV ke dil mein alag hi tarange si paida hone lagi. MAHI khubsoorat to thi hi par aaj usne jeans ya wo kapde jo wo usually pehna karti thi uski jagah ek baby pink colour ka bada hi pyaara suit pehna hua tha jo uski khubsurti par chaar chaand laga raha tha.
AV ne aaj se pehle usse suit mein kabhi nahi dekha tha. Wo to bas wahaan bike rok kar usse ek tak ghoor raha tha. Usse ese nishabd sa dekh kar MAHI ke gaalon par halki laali aa gayi. Usne bhi aaj specially ye paridhaan pehna tha dekhne ke liye ke AV ko ye Pasand aata hai ya nahi. Aur wo andar se khush bhi ho rahi thi ke AV ko uska ye roop pasand aaya.
Usse koyi harkat naa karta dekha MAHI apne aap hi sharmati huyi bike apr baith gayi aur uske kaan mein kaha,
“AV CHALO”.
Ye do hi shabd the, par aaj AV ko kuchh alag hi ehsaas ho raha tha. MAHI se aati khushbu uske dil – o – dimag mein chadh rahi thi. Aaj pehli baar wo MAHI ki awaaz se andar tak kaanp gaya tha. Usne ek lambi saans chhodi aur bike dauda di.
Poore din ke liye usne pehle hi planning kar li thi. Sabse pehle wo usse ek restaurant mein lunch karwaane lekar gaya. Usne poora khaana MAHI ki pasand ka hi mangwaaya tha. Aur uske baad dono ek movie dekhne chal diye. Ye ek romantic movie the aur dono hi theatre mein ek doosre ka haath thaame baithe the. Kuchh der baad MAHI ne AV ke kandhe par apna sar tika diya.
Wahaan se nikalne ke baad dono ek mall mein shopping karne chal diye. Aaj poore din jiss tarah AV ne usse treat kiya tha, ye cheez MAHI ko bahut hi achhi lag rahi thi. Kahin na kahin uske dil mein AV ke liye pyaar aur bhi badh gaya tha. Sab kaam khatam karke dono ek park mein baithe the.
Yahaan iss samay zyada log nahi the. Dono hi ek doosre ke alingan mein ek ped ke neeche baithe the. Tabhi,
MAHI – AV tum mujhse hamesha aise hi pyaar karte rahoge naa?
AV ne ek pal ko MAHI ki aankhon mein jhaanka , jahaan usse apne liye sirf aur sirf ataah prem nazar aaya,
AV – Tumhe kya lagta hai?
Waise to sawaal ke jawaab mein sawaal nahi daaga jaata. Par iss waqt ye sawaal kisi bhi jawaab se sau guna behtar tha. Aur isse sunkar MAHI ke chehre par bhi ek khubsurat si muskaan aa gayi. Aur usne apna sar AV ke seene mein chhupa liya.
AV – Waise tumhe aaj ye suit pehan ne ki kahaan se soojhi?
MAHI – Aise hi. Main dekhna chahti thi ke tumhe ye Pasand aata hai ya nahi.
AV – To kya dekha tumne.
MAHI – Maine dekha ke tumne aaj poore din mere alawa kuchh bhi nahi dekha.
Aur ye kehkar MAHI hasne lagi. Tabhi AV usse gudgudi karne laga. Aur achanak dono ke chehre ek dam kareeb aa gaye. MAHI ko apne chehre par padti AV ki saanse kuchh alag hi ehsaas de rahi thi. Aur tabhi wo AV ke kareeb hone lagi.
AV – M.. MAHI..
MAHI – Shhhhh…...
Aur tabhi MAHI ne apne hontho ko AV ke hontho se jod diya. Ye in dono ka pehla chumban tha joki in dono ki hi swargiya ehsaas de raha tha. MAHI ke haath AV ke baalon mein ghumne lage aur AV ne bhi usse apne se aur adhik sataa liya.
NA LOBH , NA PYAAS AUR NA HI VAASNA,
YE THI TO SIRF SACHE PYAAR KI BHAAVNA.
EK DOOJE MEIN KHO JAANE KI ANUBHUTI THI YE,
PREM TO THA, PAR USS SE ZYADA,
DONO KI AATMA KO MILNE WAALI TRIPTI THI YE.
Kuchh palon baad dono alag huye. Aur lagatar ek doosre ki aankhon mein dekhne. MAHI ke gaal gulaabi huye pade the aur usne apni nazar jhuka li. Haalanki wo sharam se gadhi jaa rahi thi par iss samay uske chehre par uski roohani muskurahat uski aseem khushi dikha rahi thi.
AV ne MAHI ko aage hokar apni baahon mein bhar liya aur MAHI ne bhi apna sar uske kandhe par gira diya. Kuchh der baad kuchh bachhon ki awaaz se inki chetna lauti. Ab shaam dhalne lagi thi. Isiliye in dono ne der karna sahi nahi samjha. Dono bike par sawaar ho gaye. MAHI uss se lipti huyi bike par baithi thi. AV ne MAHI ke ghar se kuchh door bike rok di. Aur wo bhi utar kar jaane lagi.
Par tabhi wo palti aur daudkar AV ke honthon par ek chhota sa kiss kar diya. Aur chehekti huyi ghar ki taraf bhaag gayi. Idhar AV ke chehre par ek muskaan aa gayi. Aur wo bhi muskurata hua apne ghar ki taraf chal diya.
Bas aur kuchh khaas nahi hua aaj ke din. Sab shaanti se apne apne ghar mein so gaye ek naye din, ek naye ujaale ki aas mein. Par wo naya din kisi ki zindagi mein andhkaar laane waala tha aur kisi ko uski khushiyan lautaane waala tha.
NEXT DAY :-
LOCATION :- PANDEY NIWAS (DELHI)
To, filhaal yahaan par maujood hain AV aur saath hi NISHANT JI bhi. Subah hi dono DELHI ke liye nikal gaye the. Tickets to kal hi inhone book karwa li thi. Aur ab wo ACP AKRAM SHEIKH dwaara bataye gaye address ke baahar khade the. AV ne aage badhkar doorbell bajayi aur kuchh hi palon baad ek mahila joki VEDIKA PANDEY thi unhone darwaaza khola.
Par tabhi unke peeche hi daudti huyi ek bachi baahar aayi jisse AV dekhte hi pehchaan gaya aur anayaas hi uske muh se nikal gaya,
ANKITA…..
Aaj ke liye itna hi.
YOUR’S RD.
(2894 WORDS). |
