- 9,545
- 9,308
- 189
Speechless.... Kya hi bolun iss kahani ki tareef mein...
Meera... Jo kuchh bhi abhi tak ke dono parts mein iske saath hua... Chaahe wo Kabir ki maut ho ya fir Naina ke saath jo hua uski smritiyan waapis lautna... Majboori mein apne jism ko bechna ho ya fir jo mental torture usne saha wo ho... Uske saath jo kuchh bhi hua aur jin logon ki wajah se hua wo maafi ke kaabil katayi nahi ho sakte... Sazaa ya kahun saza e maut un sabke liye... yahi insaaf ho sakta tha Meera ka jiss se shayad uske zakhmon par marham bhi lagta... Poori tarah se to aese zakhm kabhi nahi bharte bas insaaf milne se lagne waala marham unhe nasoor ban ne se rok deta hai....
Main Meera ke kirdaar ka, uske patience aur sahan shakti ka kaayal ban gaya tha pehle dono parts ko padhne ke baad... Haalanki “The Girl Next Door" mein jo ghatna Aditi ke saath huyi uss se mein ittefaq nahi rakhta par fir bhi shayad Meera ke saath huyi darindagi aur Naina ke shoshan ke baad uski samajh mein wahi sahi raasta ho badla lene ka ...
Par iss part mein jo kuchh bhi Meera ne kiya... Pankhuri ke saath wo naa kaabile bardaasht hai.... Mujhe agar aag mein haath daalne se jalan hogi to main doosre ko to wo karne se rokunga hi ya zabardasti uska haath pakad kar usse bhi aag mein jhonk doonga... Meera ne jo kuchh saha uske baad usse shaareerik shoshan ya kahun ke rape ke baad aatma aur shareer par lagne waale zakhmon ka sahi andaza ho hi gaya tha... Par fir bhi usne Pankhuri ke saath wahi sab kiya jo uske saath hua tha ya shayad uss se bhi bura... Ek ladki jo pregnant hai ... Maa ban ne waali hai uske saath lagataar balatkaar hona usse kiss manosthiti mein pahuncha deta hoga iski sirf kalpana matra hi ki ja sakti hai...
Meera abhi tak to iss kahani ki naayika thi par shayad ab wo bhi ussi katghare mein ya kahun ussi jagah par aa chuki hai jahaan Neil aur uske saathi hain... Neil ne to shayad ab sab kuchh kho hi diya hai... Aditi ki maut aur ab wo jail mein hai... Waise to Mithila ne uske begunaah hone ke suboot Armaan ko de diye hain par main dua karoonga ke wo jail mein hi rahe... Baahar aane par usse nark hi bhogna padega... Uski betiyan usse kabhi bhi maaf nahi karengi naa hi wo uski baat sunengi ke kyon Neil ne unke sar se Maa ka saya utha diya... Aur wo situation bardaasht se baahar hone waali hai Neil ke...
Pankhuri ki baat kiye bina ye revo kaise mukammal ho sakta hai... Maine kaafi samay pehle jab main ek silent reader tha aapke dwara English mein likhi gayi Dark Seduction padhi thi aur Pankhudi ke kirdaar ko ussi kahani mein jaana tha... Uske saath jo bhi hua wo hamesha dil mein ek tees paida karta hai... Par fir Armaan ke saath usne apni ek nayi zindagi shuru ki lekin... Meera ne jo kuchh bhi uske saath kiya uske baad bhi wo nahi tooti shayad isiliye kyonki wo akeli nahi thi balki uske andar ek aur zindagi pal rahi thi... Lekin iss sabse uske dimaag par ek Bahut gehra prabhav padna nischit hai aur wo ghaav sirf Armaan ke pyaar se hi bhar sakta hai... Har kisi ki prem kahani hoti hi hai... Armaan ka dark past jaante huye bhi Pankhuri ne usse nischal prem kiya aur badle mein Armaan ne bhi usse waisa hi pyaar diya joki wo deserve karti thi ... Armaan ek dark character raha hai par for a change iss part mein uska ek naya roop dekhne ko mila... Pankhuri ki salaamati ke liye wo Meera ka slave ban gaya aur M akshar ki Branding bhi apne gale par karwa li...
Amairah ki khoj shuru hone waali hai par kya Meera usse dhoond paayegi aur kya Armaan, Pankhuri ke saath huyi nirdayita ka badla lega... Agar haan to kaise... Kya wo Amairah ko bhi iss khooni khel mein ghaseet lega??? In sab sawalon ke jawaab bahot hi dilchasp hone waale hain... Bas abhi bina samay barbaad kiye seedhe The Search For Amairah hi padhunga....
Aesi kahaniyan kaafi kam matraa mein hai iss forum par joki dil par apni ek amit chhaap chhod deti hon aur ye Meera Series unhi mein shumaar hai... Emotions se labrez ye kahani sach mein ab meri favourite kahaniyon mein se ek ban chuki hai...
Again an outstanding story IP Mam... Jitni bhi tareef ki jaaye utni hi kam hai... Awesome just awesome...
Thanks so much for your awesome review
Amairah waali story pe aapke review ka intezaar
