“Main kuchh nahi jaanta! Ye aakhiri baar keh raha hoon tujhe, wo property mujhe chahiye warna…”
Apne shabdon ko adhoora chhod hi palatkar chal pade wo, aur ghar se baahar nikalkar darwaze par zor se laat maarkar mujhpar apna gussa zaahir bhi kar diya. Shayad hi koyi maane ke mujhse iss kadar nafrat karne waala mera saga bhai tha, wahi bhai jisne kabhi mujhe ungli pakad kar chalna sikhaya tha.. wahi bhai jo mere chot lagne par ro diya karta tha aur wahi bhai jo aaj mere marne ki dua karta hai…
Zindagi shayad kabhi bhi mujhpar meharbaan nahi rahi. Haan shayad mere 17 saal ke ho jaane tak meri kismat ki mujhse dosti thi par uske baad.. Wo accident aaj bhi mere zehen mein zinda hai. Wo accident jisne ek masoom se uski masoomiyat chheen li, jisne mujhse mere jeene ki chaah chheen li aur jisne mujhe is duniya mein akela sa kar diya..
Main to duniya se aur apne oopar toote uss qehar se anjaan so raha tha jab mera mobile baja. Mere Aai – Baba ka accident hua tha, aur mujh bad kismat ko unke antim darshan ka sukh bhi naa mila. Police ka kehna tha ke sharaab ke nashe mein Baba gaadi sambhal nahi paaye aur gaadi khaayi mein gir gayi. Par uss gaadi ke saath mere sabhi rishte – naate, mera parivaar aur shayad meri hasi – khushi bhi khaayi mein gir gayi thi..
Aai – Baba ke jaane ke baad Bhaiya – Bhabhi ek dum se badal se gaye. Wo mujhse 7 baras bade the aur hamesha maine unhe Baba se zyada hi izzat di thi. Par wo kehte hain naa kabhi – kabhi ek zameen ka tukda rishton ke tukde kar deta hai. Baba koyi raees aadmi naa the par haan unhone apne jeevan ki jama poonji ek zameen ka tukda khareedne mein laga di thi. Shayad kuchh 3 ya 4 Crore keemat hogi uski aur utni hi keemat thi mere Bhai ke pyaar ki..
Haalanki Bhabhi ka ravaiya hamesha se hi mere liye rukha sa tha par main… main naadan fir bhi unhe Bhabhi Maa – Bhabhi Maa kehta firta tha. Ghar ka kalesh aur bhaiya aur mere rishton mein aayi daraar ka asar jab mujhe unke aur Bhabhi ke rishte par padta dikha, To mere andar ka wo chhota bhai apne Bade bhai ka ghar ujadta naa dekh paaya aur ghar chhodkar ek anjaan si manzil par nikal pada..
8 saal.. 8 saal ho gaye the aaj mujhe apne Aai – Baba ka wo aashiana chhode huye. Aaj main ek kapdon ka chhota sa kaarobaar shuru kar chuka tha jo pankh failaane laga tha par sukoon ki talab meri ab bhi waisi ki waisi hi thi. Kabhi kabhi to main sochta ke uss ooparwaale ne meri taqdeer kya sochkar aur kiss bhaavna se likhi thi. Maine apna poora parivaar ek saath khoya tha, to nischit hi tha mera patthar ban jaana..
Maine apne dil ke darwaze band kar liye the. Jahaan College mein ladke – ladkiyan apne prem Pranay mein khoye rehte the wahin meri premikayein meri kitaaben thi.. main dar gaya tha, bahut zyada dar gaya tha. Asal mein main ab kisi apne ko khone ka gam sehne ke laayak nahi bacha tha. Isiliye main ladkiyon se door hi rehta… kahin mujhe kisi se pyaar ho gaya aur wo mujhe chhod gayi to??
Iss “To” ka jawaab tha aatmahatya.. haan agar aisa hota to shayad main suicide kar leta, aur ek baar Aai ne kaha tha – “Shivu.. Lalla ek baat yaad rakhna Aatmahatya iss duniya ka sabse bada paap hai, iski maafi Shri Hari bhi nahi dete..” Unhone to Pariksha mein fail hone waale bachon ke suicide ki khabar dekh kar mujhe ye kaha tha par main aaj iska kuchh aur hi upyog apni zindagi mein kar raha tha..
Khair, main apni iss neeras si zindagi ko jee raha tha ya behtar hoga kehna ki zindagi kaat raha tha ke ek din.. Ek din mera dil pehli baar mujhe zinda rakhne ke alawa kisi aur wajah se dhadka.. Haath se Coffee ka cup chhitak sa gaya, mobile bhi haath se fisal gaya aur main.. Main ghar ki balcony mein khada uss Jannat ki Hoor ka deedar karne laga.. Mere ghar ke saamne ka ghar khareeda tha shayad usne.. Behad halke gulaabi rang ki salwaar kameez roopi libaaz ko odhe wo meri dhadkan mujhse juda karne mein lagi thi..
“Ae mahjabeen sambhalna kahin teri soorat qatl – e – aam macha naa de...
Khabar naa hogi mujhe to kab mar jaaunga,
Sambhalna kahin teri nazron ka raqs kisi ka maqam chhippa naa de...”
Duniya se beparwah main usse baar baar apne chehre par aa rahi zulfon ko sambhalte taak raha tha.. Par tabhi shayad ek baar fir meri zindagi ne mujhe bata diya ke main iss duniya ka sabse bada badnaseeb hoon.. Uske saath ek chhota sa bacha bhi tha, shayad abhi ek saal ka bhi naa tha wo.. Matlab mere dil ne pehli baar hulchul mehsoos ki aur jiske liye ki wo meri ho hi nahi sakti..
Main ek baar firse toota saa apne daftar ki taraf nikal pada par mujhe jald hi pata chalne waala tha ke meri kismat utni bhi kharaab nahi..
Shaam ko main apne kamre mein adhleta sa hokar aaram farma raha tha ke ghar ki doorbell baji.. Mera bilkul mann naa tha ke main uthun par uss darwaaze par aaye shakhs ko koste huye maine darwaaza khola.. Ghar ka bhi aur mere dil ka bhi..
Darwaze par wahi thi, main to munh faade usse dekh raha tha aur uske chehre par ek ghabrayi si muskaan thi…
“H.. Hi..” usne kaanpti si aawaz mein kaha jispar maine jawaab diya…
“Hi.. Hi”!!
“Maine aaj hi.. yahaan aapke saamne waale ghar mein shift kiya hai.. aap thoda samaan set karne mein help kar denge??”
“Teri ghabrayi si wo tabassum iztiraar iss deewaane ko de gayi…
Behka sa jism hai behki si saansein,
Teri dhadkan ki goonj mere bekarar se dil ko le gayi...”
“Haan, haan kyon nahi… Beshaq..” Yahi mera jawaab tha uski uss iltija par..
Par uske ghar pahunchte hi mere kadam ek baar fir dagmaga gaye, uske bache ko paalne mein sota dekh kar.. “Kya kar raha hai Shivam, Wo shaadi shuda hai!! Kyon khud ka dil khud hi todd raha hai…” Khud se hi jaise ye shikayat ki thi maine..
Lekin chaahe Mohabbat naa thi abhi par Insaaniyat to mujhme kaayam thi.. Maine usse koyi bhi bhaari cheez ko hatane ya lagane naa diya aur laghbhag 2 ghante ki mehnat ke baad uska ghar poora set ho chuka tha.. Khuda kasam 8 saal mein itna to maine khud ke ghar ko naa sajaaya hoga jitna abhi iss ghar ko saja Diya tha..
“Thanks.. Thanks A Lot!! Aapne bahut madad ki meri..” kritagyata ke bhaav uski aawaz mein saaf jhalak rahe the..
“No, It’s completely OK..” uski baat kaatkar beech mein hi kaha maine..
“Waise abhi tak maine aapka naam poochha hi nahi.”
“Shivam.. Shivam Rane! Aur aapka naam” maine kaha..
“Supriya Bhonsle”..
Supriya.. Kitna haseen, kitna pyara naam tha bilkul uske uss haseen rukhsaar ki tarah.. Par ab bhi ek mayoosi si mujhe uske chehre par dikh rahi thi.. Ek khaalipan sa uski unn sharbati aankhon mein jhalak raha tha..
“By the way aapke husband nahi aaye…” Jaane kaise ye sawaal kar gayi thi meri zubaan..
“He’s no more..” kaanpte se swar mein kaha usne jisse sunkar mera dil bhi kaanp gaya..
“I.. I can understand..” haalanki sabhi “I’m Sorry” kehte hain aise maukon par.. lekin achanak hi Aai – Baba ka chehra meri nazron ke saamne ghoom gaya aur apne aap hi wo shabd nikal gaye mere munh se..
Meri aawaz mein chhippe dard ko wo mehsoos kar gayi aur shayad samajh bhi gayi ke khoya to humne bhi tha kuchh apnon ko.. Khair, uss din ke baad kayi baar hamari aankhen mili par baat nahi huyi. Main khud ko uss se halka sa hi sahi par door rakhna chahta tha, pata nahi kyun main uski taraf apne aap hi jhukta chala jaa raha tha. Shayad.. shayad mujhe Ishq ho hi gaya tha, pehli baar main khud ko sambhaal naa paaya tha aur uss mayajaal mein fans chuka tha jise “Ek tarfa Pyaar” kehte hain.
Kuchh hafte beete aur fir ek din mere ghar ka darwaza firse khatkhataya gaya. Pata nahi kaise par main pehchaan gaya ke ye koyi aur nahi Balki Supriya hi thi. Darwaza kholne par mere iss khayal ki pushti bhi ho gayi. Uske chehre par shikan thi aur aankhon mein dar, naa jaane kyon usse yun main dekh nahi paa raha tha..
“Jagmagati rahen wo aankhen teri jinse hume Ishq hua hai...
Mayoosi aur Bebasi naa dekhun kabhi unmein,
Khuda se bas yahi iss deewane ki dua hai...”
“Please aap meri madad kar dijiye”.. Darwaze par hi khade huye usne kaha.
Uski pareshaani sunkar mera dil ruaansa sa ho gaya. Aaj tak sirf suna tha ke Single Mother, arthat Akeli Maa ke liye sab kuchh behad kathin ho jaata hai, aaj maine yahi cheez pratyaksh roop se dekh li thi. Vidambana hi to hai ye hamare samaaj ki, ke jiss naari ki yahaan pooja hoti hai usse pareshaani mein paakar hum uski majboori ka faayeda uthane ki sochtein hain.
Khair, uski pareshaani yahi thi ke usse naukri ki sakht zaroorat thi. Par saath hi abhi uska bacha jo bahut chhota tha uski dekhbhal karni bhi zaroori thi.
“Aap chinta mat kijiye, main kuchh karta hoon!” Maine jawaab diya.
Mere ghar ke nazdeek hi ek puraane se makaan mein Vidya Tai rehti thi. Wo apne jeevan ke 40 basant paar kar chuki thi. Unke Pati ko guzre kayi saal ho chuke the aur unki koyi aulaad bhi naa thi. Par wo mujhe bahut maanti thi, yahaan tak ki har saal mujhe rakshabandhan par raakhi bhi baandha karti thi. Maine unhe ye samasya batayi to unhone bache ko lekar Supriya ko chinta mukt kar diya.
Ab wo aaram se Apni naukri kar sakti thi jo usse maine apne hi Daftar mein dila di thi. Jitna samay wo kaam par jaati Vidya Tai uske bache ka poora khayaal rakhti. Issi tarah waqt aahiste aahiste aage badhne laga aur waqt ke saath uske liye meri Mohabbat bhi badhti jaa rahi thi. Uski aankhen, uska chehra, uske maathe par wo chinta ki lakeerein, yahaan tak ki uski aawaz sab kuchh mere liye bahut khaas ban chuka tha.. bahut khaas..
Iss beech mere aur uske beech bhi ek rishta ban gaya tha, “Dosti” ka.. Meri nazar mein shayad dosti se paak rishta koyi nahi tha.. aaj tak shayad hi koyi aisa meri zindagi mein aaya tha jise main apna dost keh sakun par Supriya alag thi, bahut alag.. Wo apni zindagi mein bahut kuchh anubhav kar chuki thi isliye shayad wo baakiyon se juda thi..
“A.. Aap chinta matt kijiye! Dekhiyega ek din sab achha ho jaayega..” Supriya ne apni Madhur si aawaz mein Mujhse kaha..
Usne mujhse achanak hi ek din poochh liya tha mere dukhi aur akele rehne ki wajah ke baare mein aur main usse naa mana kar paaya aur naa hi jhooth keh paaya. Apne aap hi mere mukh se sab kuchh nikalta chala gaya, aur wo bhi sab sunti chali gayi.
Tabhi, “Bura matt maaniyega Supriya Ji.. Par mujhe pata nahi kyon aisa lagta hai jaise aap bhi koyi bahut bada dukh apne andar samete hain. Agar.. agar aapko sahi lage to aap mujhse keh sakti hain..”
Kuchh palon tak wo ek tak mujhe dekhti rahi aur fir uske lab hile aur jo kuchh usne kaha usne mujhe hila kar rakh diya. Kahaan to main samajhta tha ke Kismat mere saath hi ye khel khelti aa rahi thi par.. par Supriya ke saath to Kismat ne...
“Main shuru se aisi nahi thi Shivam Ji.. kabhi main bhi baakiyon ki tarah khush raha karti thi.. zindagi ko jiya karti thi par fir main College pahunchi aur meri Zindagi poori tarah badal gayi. Main wahaan ek ladke se mili, Rajat naam tha uska. Pata nahi kyun par apne aap hi main uski taraf aakarshit hone lagi. Wo hamare College ka sabse popular ladka tha. Dheere dheere uski aur meri dosti ho gayi. Fir.. fir ek din usne mujhse pyaar ka izhaar kar diya. Main to pehle hi usse dil de baithi thi aur jaane anjaane uske Pyaar mein behkar usse apni Asmat bhi de baithi… Wo meri zindagi ka sabse khubsurat din tha jab main apne pyaar ke utne kareeb thi par.. par fir ek din mujhe pata chala ke main akeli nahi rahi.. mere andar ek aur Zindagi panap rahi thi.. Jab iss baare mein maine Rajat se baat ki to.. ” Beech mein hi uski aankhon ka dariya beh gaya aur wo foot foot kar rone lagi.. kaafi derr baad khud par kaaboo kar usne kehna shuru kiya..
“Usne mujhe pehchan ne se hi inkaar kar diya.. Uske, uske liye main bas ek cheez thi, jo uski hawas ko poora karne ka zariya ban baithi.. Main toot gayi thi, poori tarah toot gayi thi.. Agar mujhe kuchh zinda rakhe hua tha to mera bacha jo mere andar pal raha tha. Jab mere Maa – Baap ko pata chala to samaaj ke darr se unhone mujhe abortion ka hukm suna Diya… Par ek Maa kaise apni hi aulaad ka gala ghont de. Mere Inkaar ka nateeja mujhe ghar chhodkar bhugatna pada aur.. aur ab main..” Yahi thi uski wo kahani jisne mujhe himmat aur sehen sheelta ki ek nayi paribhasha bata di..
Kitna kuchh saha tha usne.. kitni bardaasht thi usmein.. Sachmein Iss sansaar mein agar koyi sarv Shaktimaan hai to wo Sirf aur sirf “Maa” hai..
“Iss sabmein kiski galti thi, mujhe nahi pata.. Meri taqdeer ki jismein ye sab likha tha ya mere dil ki jo uss se pyaar kar baitha ya fir uss Rajat ki jisne ek Masoom dil ke saath khel khela.. Nahi galti thi to sirf meri thi.. Sirf aur sirf meri thi..” Kahin khoye huye andaaz mein usne kaha..
Swayam hi maine uske haath par apna haath rakh diya aur usse dekh kar kaha,
“Aap mein bahut himmat hai Supriya Ji ke itna sehne ke baad bhi aap nahi tooti.. Aap meri dost hain ye meri khush naseebi hai… I.. I just can’t believe how can someone withstand such things..”
Wo muskurayi aur bass itna hi kaha.. “Main ek Maa hoon naa!!”
“Ek naya sansaar jo bana de, Jo registaan mein phool khila de…
Ek naya aayam de zindagi ko, Jo sab takleefein mita de…
Mila de jo zindagi ke siron ko aur khud mit jaaye…
Ae khuda har yateem ko wo amulya tohfa, wo “Maa” de...”
Uss din shayad hum dono ke beech dosti se alag bhi ek bandhan bandh gaya tha.. ek dooje ke Raazdar hone ka. Naa usne apni takleef kabhi kisi se kahi naa maine kabhi kisi se apna dukh baanta tha. Par ab hum dono hi kuchh behtar mehsoos karne lage the.. aakhir seene se ek bhaar jo kam ho gaya tha.
Ek din Main Supriya ke ghar kuchh kaam se gaya tha aur wahaan maine ek Hospital ki report dekhi. Jigyasa vash maine usse padha to mere pairon tale zameen khisak gayi. Nahi.. Bhagwaan ek baar firse nahi!! Ab kya kya chheenega tu mujhse.. Yahi sab mere dil – o – dimaag mein chal raha tha. Tabhi,
“Sh.. Shivam Ji..” Mere pichhe khadi Supriya ne kaha..
“Ye, Ye sab kya hai.. Aap” ladkhadati si aawaz mein mere munh se ye shabd foote..
“Shivam Ji, Main sach kehti hoon maine apni zindagi mein aapke jaisa insaan kabhi nahi dekha. Jab mera insaaniyat par se bharosa uth gaya tha tab aapne meri har tarah se madad ki.. Bas ek baar aur kar dijiye.. Mere jaane ke baad mere bache ka khayaal rakhiyega..” Laghbhag subakte huye usne kaha..
Uske shabd mere kaanon mein hathode ki tarah bajne lage. Maine wo file wahin chhod di aur apne ghar laut aaya. Raat ko jaane kab tak main baitha sochta raha aur sochta hi raha aur aakhir kaar ek faisla kar liya maine. Wo faisla jo mujhe hamesha ke liye Supriya ke kareeb rakhne waala tha.. Behad kareeb..
“Bhaiya main kaagaz sign karne ko taiyaar hoon par meri ek shart hai!”
Subah – subah maine sabse pehle Bade Bhaiya ko phone lagaya aur unse kaha..
‘“Kaisi shart”? Unhone poochha..
“Mujhe 20 Lakh rupay chahiye..” maine jawaab diya
Bas fir kya tha, uss zameen ke masle ko maine sada sada ke liye khatam kar diya aur badle mein jaisa ke maine kaha tha bhaiya ne mujhe wo 20 Lakh rupay bhi de diye.
“Bhaiya agar aapse kuchh maangoo to aap denge..” Maine unse poochha..
“20 Lakh lene ke baad bhi mann nahi bhara!!” Ek tanj sa kasa bhabhi ne mujhpar..
“Paise nahi chahiye bhabhi. Bas ek iltija hai ke mere marne ke baad mera antim sanskar kar dena, main nahi chahta ke meri laash lavaris ho jaaye meri tarah..” Pehli baar maine Bhabhi ki aankhon mein nafrat ke alawa kuchh dekha mere liye..
Wahin shayad Bhaiya bhi meri baat se kaanp se gaye the. Ek aakhiri baar maine apne Aai – Baba ke uss aashiaane ko nihara aur wahaan se nikal pada..
“Lekin ye sahi nahi hai Shivam!!” mere saamne doctor ke libaaz mein baithe ek shakhs ne mujhse kaha..
“Dekh Raghav, maine bahut soch samajhkar ye faisla liya hai jo main kisi keemat par nahi badalne waala..” Maine dridhta se jawaab diya..
“Par tu to kaha karta tha ke Aatmahatya Paap hai, kaayaron ki nishaani hai..” usne muskurakar mujhse kaha..
“Nahi Raghav, Main Aatmahatya nahi kar raha!! Main wo paane jaa raha hoon jiski mujhe talab hai, jo mujhe marne ke baad bhi zinda rakhega!!” maine muskurakar hi jawaab diya..
“Supriya Ji, main kuchh dinon ke liye shehar se baahar jaa raha hoon aur shayad mera mobile bhi kaam naa kare!!” maine Supriya se kaha jo apne ghar ke saamne lage phoolon mein paani daal rahi thi..
“OK. Par Mobile kyon kaam nahi karega?”
“Wo area thoda kharaab network waala hai so.. Aap apna dhyaan rakhiyega..” Maine jawaab diya.
Maine ek baar use jee bharke nihaara aur fir bina mude wahaan se nikal gaya. Wahin Supriya ussi jagah khadi mujhe jaata dekhti rahi. Aaj meri aawaz aur meri nazren dono hi usse thodi badli badli si dikhayi di thi.
“Hello, Miss Supriya Bhonsle??”
Wo apne ghar mein baithi apne bache ke saath khel rahi thi ke tabhi uska phone baja. Usne pick kiya to doosri taraf se yahi aawaz aayi..
“Ji Main hi Supriya hoon” Usne kaha..
“Aapke heart muscles mein infection ke chalte aapko heart transplant recommend kiya gaya tha.. Am I right?”…
“Ji, par aap kaun hain” Supriya ne hichkichate huye poochha..
“Main Healthcare Hospital se baat kar raha hoon!!” udhar se jawaab aaya..
“But mera treatment to doosre hospital mein chal raha hai”..
“That’s right. Par ab aap meri baat dhyan se suniyega. Aapko financial problems thi aur aapne ye baat apne doctor ko batayi hogi so ek nayi policy ke tehat aapke jaise patients ka naam ek NGO ko diya jaata hai. And then wo unmein se kuchh ko select karke Treatment ka poora kharcha uthate hain & you’ll be Happy to know ke aapka naam aise hi ek NGO ki taraf se hamare paas aaya hai!!”
Supriya ki aankhen chhalak gayi. Usne to umeed hi chhod di thi ke wo bach paayegi. Doctors ne yahi kaha tha ke agar Transplant naa hua to problems badh jaayengi aur Supriya ki jaan bhi jaa sakti hai. Par ek nayi aasha ki kiran mil gayi thi ab usse..
“Hello!! Aap sun rahi hain naa?” Supriya ki taraf se koyi jawaab naa paakar udhar se aawaz aayi..
“J.. Ji” usne apne jazbaaton ko kaaboo karte huye kaha..
“Par ek important baat ye ki hume ye transplant 24 ghante mein karna hoga!”
“Matlab?”.. Supriya ne poochha..
“Wo kya hai naa ke aapke liye donor bhi mil gaya hai so, 24 ghante mein hi transplant karna hoga warna complications ho sakti hain”..
Supriya ke to kadam jaise aasman par the.. Usne seedhe “Shivam” ko phone kiya ye baat batane ke liye par uska mobile switched off aa raha tha..
Khair, wo pal bhi aa gaya jab Supriya ka successful operation ho gaya. Vidya Tai uske paas hi baithi thi aur unki god mein Supriya ka beta tha.
“Ab main nahi marungi Tai.. Ab mera bacha anaath nahi hoga.. main iske saath khoob khelungi Tai..” khushi ke maare uski aankhon mein nami utar gayi..
“Haan Supriya, ab tum dono hamesha khush rehna..” Unhone uski haalat samajhte huye kaha..
Jab Supriya hospital se discharge hone waali thi tab ek Doctor uske paas aaya. Supriya ka operation inhone hi kiya tha. Uske chehre par dard saaf dikh raha tha..
“Thanks Doctor.. Aapki wajah se hi main theek hoon!!” Supriya ne kritagya bhaav se kaha..
“No.. No It was my duty!! By the way ye aapke liye hai. Par aap isse ghar jaakar hi padhiyega..” Ek envelope Supriya ko thamate huye unhone kaha..
Abhi Supriya koyi sawaal karti ke ek ward boy wahaan aaya aur bola.. “Raghav Sir aapko Dr. Sanjay bula rahe hain..”
Uss doctor arthat Doctor Raghav ne Supriya ki taraf ek baar dekha aur bas kuchh shabd bolkar nikal gaya aur wo shabd the.. “ You’re very Lucky that he came into your Life!!”..
Wo bas sawaalon se ghiri huyi apne ghar pahunch gayi..
Jaise hi Supriya ne wo Envelope khola uski aankhen badi ho gayi. Ye Shivam ki handwriting thi, Supriya bhali bhaanti isse pehchaanti thi par abhi asli hairaangi baaki thi..
“Hi Supriya Ji...
Meri kahani to aap jaanti hi hain. Naa jaane kyon maine aapko wo sab bataya tha. Haalanki main bahut hi introvert sa hoon, social hona mere nature mein nahi par aapse sab keh dene ko mann karta tha.. Jab aap ye letter padh rahi hongi main aapse bahut door jaa chuka hoonga par believe me main fir bhi aapke sabse kareeb rahunga..
Nahi samjhi naa aap… Supriya Ji.. I LOVE YOU.. Mujhe aapse Mohabbat ho gayi hai Supriya Ji.. ”
Ye padhkar Supriya ki aankhen hairaangi se bhar chuki thi. Ab usse yaad aa raha tha Shivam ka usse ek tak dekhte rehna, uski care karna, uski problems solve karna.. Usne aage padhna shuru kiya..
“Maine socha tha kabhi kisi se Pyaar nahi karunga aur hamesha akela rahunga kyonki main firse kisi apne ko, kisi behad khaas ko khone laayak nahi bacha tha.. Par aapko dekha to pata chala ke main kitna Bewakoof tha.. Ishq kisi ke roke kahaan rukta hai aur aapko dekhte hi main bhi aapse Pyaar kar baitha.. jab pata chala ke aap ek bache ki Maa hain to khud ko samjhane laga ke ye galat hai, ye sab sochna sahi nahi hai… Lekin fir aapne bataya ke Aapke husband ki death ho chuki hai.. Haalanki aapne uss waqt jhooth kaha tha par Meri Ishq ki Patang iss baat se fir aasaman mein lehraane lagi..
Main aapse har din.. har pal aur bhi zyada Pyaar karne laga par kehne ki naa mujhmein himmat thi naa taaqat.. kahin aap sochti ke Main aapki madad karne ke badle aapka faayeda uthana chahta hoon.. Isi darr se maine khud ke Ishq ko khudmein hi kaid kar liya.. Par aapki kahani sun ne ke baad, Maine jaana ke aap naa sirf soorat se haseen hain balki aapka mann.. aapki aatma uss se bhi zyada ruhani hai..”
Supriya ki aankhen chhalakne lagi thi ye sab padhkar.. Usse samajh nahi aa raha tha wo kya mehsoos kar rahi hai.. Shivam ke shabd ye to usse saaf zaahir kar rahe the ke wo Supriya se sacha pyaar karta hai.. Par uss bechaari ko yaqeen hi nahi ho raha tha iss baat par..
“Lekin firse meri kismat ne mujhe bata diya ke main kitna badnaseeb hoon.. Aapki Medical Report padhkar mujhpar kya guzri thi main nahi bata sakta.. Par aapko ek baat bataun, aapko dekh kar maine Kismat se ladne ki taakat aur hunar dono hi juta liye the aur iss baar.. Iss baar maine kismat ko hara diya Supriya Ji.. Maine apni taqdeer ko harakar uss se aapki zindagi waapis chheen li..
Aapke seene mein jo dil iss waqt dhadak raha hai wo Mera hai Supriya Ji.. aapke aur sirf aapke Shivam ka hai!!”
Wo letter Supriya ke haath se chhitak gaya. Uske dono haath hairaani ke maare uske munh par pahunch gaye aur wo pathrayi aankhon se ye sach sweekar karne ki koshish mein lag gayi. Par ye sach bahut bada tha, Iss sach ka matlab tha ke Shivam ab iss duniya mein..
“Aap soch rahi hongi ke main Iss duniya mein nahi raha.. Nahi aap galat soch rahi hain, mera dil abhi bhi dhadak raha hai, kya hua agar wo aapke seene mein hain to, main abhi zinda hoon Supriya Ji.. aapke andar zinda hoon.. Please ek baar apne ya kahun ke mere dil par haath rakh kar mera naam pukaar lijiye.. Please!!”
“Shivam”.. Rote huye swayam hi uska haath apne dil par pahunch gaya aur uske mukh se ye ek hi naam nikla.. Ek dum se uski dhadkane badh gayi maano Shivam tak uski ye baat pahunch gayi ho.. Ek bebas si muskaan uske mukhde par aa gayi..
“Meri zindagi ne kayi khel khele mere saath par iss baar maine apni zindagi ko hara diya iss shatranj ki chaal mein.. Main aapse bahut Mohabbat karta hoon.. Bahut zyada.. Itni jitni maine kabhi kisise nahi ki aur sadaiv karta rahunga.. Mera dil, uski har dhadkan aapko ehsas karati rahegi ke aapka Shivam aapko kitna chahta hai..
Waise mujhe achha nahi lagta ke aap kiraaye ke makaan mein rahen.. Isiliye maine apna ya kahun ke hamara ghar aapke naam kar diya hai Supriya Ji aur saath hi aapke bank account mein kuchh paise bhi transfer kar diye hain.. aap apne bache ko achhi se achhi suvidha dena.. har khushi dena!! Mujhe achha lagega agar main aapki aur uski khushi ka zariya ban paaya!!”…
Itna nischal Prem.. Itni sachayi, Itna saaf dil.. kaise ho sakta hai kisika.. Bas yahi sawaal Supriya ki paani bahaati huyi aankhon mein tair raha tha.. Kyon wo Shivam ka pyaar nahi jaan paayi.. Kaash wo abhi yahaan zinda hota.. kash wo uss se apne pyaar ka izhaar karta.. shayad wo pehle naaraz ho jaati par mushkilon aur Zindagi ne usse insaan ki parakh karna sikha diya tha.. Wo Shivam ki sachayi bhi parakh hi leti!!
“Ab main thak sa gaya hoon Supriya Ji aur ek lambi neend mein jaa raha hoon.. Bas meri do khwahishen thi jinmein se ek poori ho gayi hai aur doosri sirf aap poori kar sakti hain.. Please naa matt kahiyega. Aapne kaha tha ke aapke bete ka naamkaran abhi baaki hai, Please uska naam Shivam rakhiyega, issi bahane din mein kayi baar aap mera naam pukaarengi aur mere dil.. mera matlab ke aapke dil ko sukoon milega..
Aur jaan na chahengi ke meri jo khwahish poori ho gayi hai wo kya thi.. Bas yahi ke Tujhmein Rehkar Main..
JEE LOON TUJHE...”
Han sahi pakda hai apne vo loop nahi tod paya.. great to see you like this story 
