Update-51
Chacha--mai aakhiri baar tujhse bol raha hoon, apne kamre me jaa aur school ke liye taiyaar ho jaa. Mai aaj tere saath tere school chalunga, tere principal se baat karni hai mujhe.
Mai--aapko kya baat karni hai unse?
Chacha--tune jo ye bakheda khada kiya hai na, uska 1 solution hai mere paas. Usi baare me baat karni hai mujhe tere principal se.
Mai--koi faayeda nahi hai baat karne ka chacha, mai nahi jaana chahta school. Arre school kya, mai is ghar me bhi rehna nahi chahta.
Chacha--mai bhi nahi chahta ki tu is ghar me rahe, par mai ye bhi nahi chahta ki tu apni aage ki zindagi dar-2 bhatakte huye nikaal de. Tu aage jaa ke kuch ban paaye isliye mai jo karna chaahta hoon, uska success hona bahot zaroori hai.
Sujata--to kya karna chahta hai tu Hari?
Hum dono baat kar rahe the, itne me pata nahi Sujata kahaan se aa gayi. Maine 1 baar use dekha aur fir mujhe uski kal waali baat yaad aa gayi, mera paara fir se garam hone laga.
Chacha--acha hua aap aa gayi bhabhi, 1 kaam kijiye, bhaiya aur maa ko hall me bula ke le aaiye. Samar, tab tak tu jaa aur fatafat school ke liye taiyaar ho jaa.
Mai--mujhe koi baat nahi sunani kisi ki, mai abhi ghar chhod ke jaa raha hoon(ye bolke mai waapis gate ki taraf badh gaya)
Chacha--teri maa kabhi nahi chaahti ki unka beta apni zindagi barbaad kar le, apne liye aur humaare liye naa sahi, apni maa ke liye ruk jaa. Kam se kam meri baat hi sun le.
Chacha ki baat sunke mai wahin ruk gaya, maine mudkar chacha ki taraf dekha aur fir mann hi mann kuch faisla karne laga. Jab maine faisla kar liya to chacha ki taraf dekh ke bol pada.
Mai--theek hai, sirf aapki baat sunane ke liye mai ruk raha hoon. Ab jaldi se bulaao sabhi gharwaalon ko.
Chacha--bhabhi bula lo bhaiya aur maa ko.
Uske baad Sujata papa aur dadi ko bulaane chali gayi aur chacha chachi ko bulaane chale gaye, thodi der me ghar ke sabhi bade hall me maujood the. Papa to jab bhi mujhe dekh rahe the, unki aankho me khoon utar aa raha tha. Chacha ne 1 baar sabhi ko dekha aur fir Sujata ki taraf dekh ke bolne lage.
Chacha--bhabhi, sabse pehle aapse puchta hoon mai, kya chahti ho aap?
Sujata--mai sirf itna chahti hoon ki ise ghar se nikaal diya jaaye, ab mai iske saath 1 chhat ke neeche nahi rehna chahti. Darr lagne laga hai mujhe isse ki kab ye mujhe aur mere bete ko nuksaan pahocha de.
Chacha--aap kya chahte ho bhaiya?
Papa--jo Sujata chahti hai, mai bhi wahi chahta hoon. Mujhe bhi ab iski shakal dekhne ki koi ichha nahi hai.
Chacha--to theek hai, Samar is ghar me nahi rahega....
Mai--arre yahi bolna tha to mujhe roka kyon, acha-khaasa jaa raha tha mai yahaan se.
Chacha--meri baat poori hone de, Samar agle hafte se is ghar me nahi rahega. Mai Samar ko rishikesh bhej raha hoon, iske chhote mama Madan wahi rehte hain. Ye unhi ke saath rahega aur apni aage ki padhaai Rishikesh me hi karega. Rahi baat school se nikaale jaane ki to mai iske Principal se baat karunga, iska transfer mai iske school ki rishikesh waali branch me karwa doonga. Is tarah se kam se kam iska saal to barbaad nahi hoga.
Sujata--iski padhaai ke liye paise kon dega, agar tu ab bhi ye umeed kar raha hai Hari ke iske rehne ka, khaane ka, padhaai ka kharcha mere pati uthaayenge to tu galat soch raha hai. Anil ke papa ki footi kodi bhi ise nahi milegi.
Mai--to mujhe bhi koi shauk nahi hai inki footi kodiyon ka, inse leke maala banaake apne gale me taang lena aur jo bach jaaye, vo apne oopar kharch kar lena tu.
Sujata--dekh kaise baat kar raha hai yeh mujhse.
Chacha--Samar, chupchaap baitha reh. Mai baat kar raha hoon na abhi, meri baat khatam ho jaane de. Haan to bhabhi, aap ko paise ki chinta karne ki koi zaroorat nahi hai. Bhaiya ka 1 bhi paisa nahi lagega kyonki Samar ka saara kharcha ab mai uthaaunga.
Sujata--kya.....
Chacha ki baat sunke Sujata ka mooh hairaani me khul gaya, Sujata ka kya, sabhi ka mooh hairaani me khul gaya tha. Sabse zyada hairaan koi tha to vo mai tha, meri samajh me hi nahi aa raha tha ki aakhir chacha ko aaj kya ho gaya hai, inhe aakhir aaj meri itni chinta kyon ho rahi hai. Sab log chacha ko hairaani se dekh rahe the ki tabhi Sujata bol padi.
Sujata--theek hai, agar tu paisa laga raha hai to mujhe kya dikkat hai. Mujhe kya, kisi ko bhi tere faisle se dikkat nahi hogi.
Mai--mujhe dikkat hai, mujhe nahi chahiye kisi ka bhi paisa. Mai kahin bhi chala jaaunga aur apne balboote par jee loonga, kisi ke ehsaano ki koi zaroorat nahi hai mujhe.
Chachi--Samar, 1 baar apne chacha ki baat ke baare me soch to le.
Mai--maine soch liya hai, mujhe kisi ka paisa nahi chahiye. Mai nahi chahta ki koi aur bhi mujhe sunaaye ki maine uski zindagi bhar ki kamaai par aag laga di. Thanx for the help, ab mai chalta hoon.
Itna bolte hi mai apni jagah se khada hua aur ghar se baahar nikal gaya, mai bus stand ki taraf jaa raha tha ki tabhi peeche se mujhe chacha ne aawaz lagaayi. Unki aawaz sunke mai ruka to chacha mere paas aake khade ho gaye.
Mai--ab aapko kya chahiye, dekhiye maine kaha tha ki aapki baat sunane ke liye mai rukunga. Vo maine kar diya, ab mujhe jaane dijiye.
Chacha--paagal ho gaya hai kya, chupchaap ghar waapis chal.
Mai--mai nahi jaana waala us ghar me ab, wahaan ab mera dum ghutata hai.
Chacha--3 din ki to baat hai, fir uske baad tu rishikesh chala jaaiyo. Wahin se apni padhaai continue kariyo....
Mai--aur aapke paiso ke ehsaan ke neeche dab ke rahun, mujhe nahi chahiye aapka 1 bhi paisa chacha. Mujhe is ghar se ab 1 bhi ehsaan nahi chahiye, isliye aap mera peecha chhodo aur mujhe jaane do.
Chacha--Samar, tu 19 ka ho chuka hai aur abhi bhi 10th class me hai. 2 saal barbaad ho chuke hain tere, ye saal to barbaad mat kar....
Mai--arre barbaad hota hai to ho jaaye, zindagi barbaad ho gayi hai meri aur aap saal ki baat kar rahe ho.
Chacha--kaisi baatein kar raha hai tu, ho kya gaya hai tujhe?
Mai--arre aapko kya ho gaya hai, 1 baat bataao, pichle 19 saal se mai aapke saath hoon. Tab to aapko 1 baar bhi mujh pe pyaar nahi aaya to aaj achaanak kya ho gaya hai aapko. Aaj aapko achanak meri itni chinta kyo hone lagi, kyon kar rahe ho aap mere liye ye sab. Bataao chacha, aakhir kyon....
Maine chacha se ye pucha hi tha ki pata nahi kaise apne aap meri power activate ho gayi aur mujhe chacha ki memories dikhne lagi. Pata nahi pichle kitne saalon ki yaadein thi chacha ki jo 1-1 karke mai saaf dekh paa raha tha. Vo sab yaadein jaise-2 mai dekh raha tha, mere dimaag ke parkache udte jaa rahe the. Jaise hi maine chacha ki saari memories dekh li to mai samajh gaya ki chacha me aaye aaj ke badlaaw ka kya kaaran tha.
Maine 1 baar chacha ki taraf dekha to vo bhi mujhe dekh rahe the, mai thodi der raaste me khada sochta raha aur uske baad ghar ki taraf mudke chalne laga. Chacha apni jagah khade mujhe dekh rahe the.
Mai--dekh kya rahe ho, chalo, ghar nahi chalna kya?
Chacha ne meri baat suni aur uske baad unke chehre par 1 halki si muskurahat aa gayi, vo bhi mere saath-2 ghar ki taraf chalne lage.
Chacha--sun Samar, bhabhi ya koi aur tujhe kuch bole ab to thoda jhel liyo. 2-3 din ki baat hai, mai nahi chahta ki ghar ka maahol ab aur kharaab ho.
Mai--theek hai, par aap bhi unhe bol dena ki mujhe zyada ungali na kare.
Chacha ne haa me gardan hila di, thodi der me hum dono ghar pahoch gaye. Jaise hi mai ghar me ghusa to Sujata mujhe dekhte hi apni zeharili zubaan me mere liye kadwe shabd bakne lagi.
Sujata--abhi to ye ghar se jaa raha tha, ab kya ho gaya.
Mai--aap tension mat lo, zyada din aapko mera chehra nahi dekhna padega.
Ye bolte hi mai fatafat apne kamre me chala gaya, wahaan se maine towel liya aur bathroom me ghus gaya nahaane ke liye.
Aap log zaroor ye soch ke pareshaan ho rahe honge ki maine aisa kya dekh liya chacha ki memories me jo maine chacha ki baat maanana sahi samjha. Uske liye mujhe aapko thoda flashback me le jaana hoga, maine jo dekha vo aapko flashback se pata chal jaayega.
Flashback:-
Baat hai aaj se 20 saal pehle ki jab chacha 1 mast maula college jaane waale student the, chacha ke us waqt bas 3 hi shauk hua karte the- sona, khaana aur cricket. 12th class to jaise-taise pass kar li thi par college ki padhaai thoda mushkil thi. Padhaai me to unka mann zara sa bhi nahi lagta tha, vo to college jaana hi nahi chahte the par 1 wajah thi jo unhe har baar college kheech ke le aati thi. Us wajah ka naam tha Nirmala, haa meri maa ki hi baat kar raha hoon. Chacha aur maa 1 hi college me the, jahaan chacha first year me the wahin maa apne final year me thi. Maa gaaon se aayi thi aur unka mann sirf padhaai me lagta tha. Dono ek dusre se bilkul alag the aur maa chacha ki senior bhi thi lekin fir bhi dono ke beech senior-junior ka nahi dosti ka rishta tha, dheere-2 chacha ke dil me dosti ki jagah pyaar ne le li par maa ke dil me aisa kuch nahi tha. Vo chacha ko sirf apna dost maanti thi, haalaki jab chacha college aate the to dil ki dhadkane unki bhi badh jaati thi par chacha ko dekh ke nahi, balki unke bade bhai ko dekh ke jo roz apne chhote bhai ko khud college chhodne aate the. Chacha ke through kabhi-2 papa ki mulaakat maa se ho jaati thi aur dheere-2 papa ke dil me bhi maa ke liye feelings umad rahi thi par ye baat chacha pe kabhi zaahir nahi huyi. Chacha bhi bade sharmeele kism ke ladke the jo college ke 1 saal me 1 baar bhi maa ko apne dil ki baat nahi bata paaye. Jab maa ka college me aakhiri din tha to chacha ne thaan liya ki us din vo maa ko apne dil ki baat bata ke hi maanenge par kismat ko us din kuch aur hi manzoor tha, chacha aur maa jab us din mile to chacha ne apni baat kehni chahi lekin unke bolne se pehle hi maa ne unhe bata diya ki papa ne maa ko shaadi ke liye propose kiya tha aur maa ne haa kar di thi. Chacha ke dil ko to bahot dukh pahocha tha par apne bade bhai aur apni mohabbat ki khushi me unhone bhi apni jhoothi khushi zaahir kar di. Uske baad papa aur maa ki shaadi ho gayi aur 1.5 saal baad mai bhi paida ho gaya tha. Chacha ko to khush hona chahiye tha ki unka bhateeja hua hai par jab bhi vo mujhe dekhte to unhe hamesha apna haara hua pyaar nazar aata, shaayad isliye hi vo kabhi seedhe-2 mujhse baat nahi karte the. Jab bhi chacha maa aur papa ko 1 saath dekhte to unke dil me dard hota par unhone maa ki khushi me hi apni khushi samjhi, unhe mauke milte the par unhone kabhi bhi maa aur papa ko alag karne ki koshish nahi ki. Yahi to sacha pyaar hota hai jisme paane se zyada saamne waale ki khushi maayne rakhti hai, 5 saal baad maa bimaar ho gayi aur jab unki tabiyat zyada kharaab hui to unhe hospital me admit karna pada tha. Unki tabiyat ke liye chacha ko bhi bahot tension ho rahi thi, jab dr ne keh diya tha ki vo maa ko nahi bacha paayenge to chacha ka to dil hi toot gaya tha. Maa apni aakhiri saanse le rahi thi, tab papa wahaan nahi the. Chacha maa ke paas baithe huye ro rahe the.
Maa--Hari, chup ho jaa. Ye to duniya ki reet hai, jo aaya hai, use jaana to padega hi. Mere bhi jaane ka waqt aa gaya hai.
Chacha--aap ye sab mat bolo, aap theek ho jaaogi. Kuch nahi hoga aapko, mai kuch nahi hone doonga aapko.
Maa--mujhe ab apni chinta nahi hai Hari, chinta hai to bas apne bete ki. Uski har zaroorat ko mai hi samajh paati thi, mai chali jaaungi to uski saari zarooratein kon poori karega.
Chacha--aap tension mat lo, aapki tabiyat kharaab ho jaayegi.
Maa--Hari, mai kuch maagu to tu dega mujhe.
Chacha--aap ko jo maangana hai maango, mai aapki har ichha poori karunga.
Maa--mai chali jaaun to mere bete ka khayaal rakhna, use kisi bhi cheez ki zaroorat ho to use dena. Agar kabhi vo pareshaani me ho aur sab uska saath chhod de to tu uske saath khada hona aur use himmat dena. Ise meri aakhiri ichha maan le, bol Hari poora karega na meri aakhiri ichha.
Chacha--mai aapse waada karta hoon ki mai aapki ichha zaroor poori karunga.
Jaise hi chacha ne maa se waada kiya, usi waqt maa ne apni aakhiri saans li aur fir is duniya se wida leke chali gayi. Chacha unki laash par bahot roye the, agar unke bas me hota to vo apni jaan dekar meri maa ko zindagi de dete par ye sab to sirf oopar waala hi kar sakta hai to unhone wahi kiya jiska unhone waada kiya tha. Maa ke jaane ke baad jab mai bimaar pada tha to wahi the jo raat bhar jaagkar mere paas baithe rahe aur meri sar ki pattiyan badalte rahe the. Papa kayi baar Sujata ko meri fees ke paise de dete the jo Sujata mujhe dene ke bajaaye apne paas rakh leti thi, us waqt chacha bina kisi ko pata chale dadi ko paise thama dete the mujhe dene ke liye. Itne saalo se meri pocket money ke paise bhi dadi ko chacha hi de rahe the. Jab maine papa se naye running shoes maange the to papa ne mana kar diya tha, tab bhi chacha ne hi dadi ko paise diye the mujhe dene ke liye. Mai 2 baar fail hua tha to mujhe school se nikaala jaa raha tha, chacha ne, bina kisi ko pata chale, khud jaakar principal se baat ki thi aur use thode bahot paise dekar mujhe school se naa nikaalne ko kaha tha. Jis raat Aanchal mujhe chhod ke jaa rahi thi aur maine papa se kaha tha ki vo mere saath chale Aanchal ke papa se baat karne to papa nahi maane the aur mai chala gaya tha Aanchal se milne, mere jaane ke baad chacha ne papa ko manaane ki koshish ki thi ki papa Aanchal ke papa se baat kare. Papa fir bhi nahi maane the to chacha ne kisi tarah jugaad karke khud Aanchal ke papa ka number nikalwaaya tha aur unhe call bhi ki thi par unhone phone nahi uthaaya tha. Aisi hi kayi saari cheezein thi jo vo pichle 13 saalon se mere liye karte aa rahe the bina kisi ko pata chale, chachi se bhale hi chacha ki shaadi ho gayi thi lekin aaj bhi vo maa se utna hi pyaar karte the jitna 20 saal pehle karte the. Unhe diye 1 waade ko wo aaj tak nibha rahe hain.
Present:-
Nahaane ke baad mai fatafat school ke liye taiyaar hua aur chacha ke saath school ke liye nikal gaya, jab school pahocha to mai late ho gaya tha. Assembly start ho gayi thi aur principal assembly attend karne gaya hua tha, mai aur chacha principal ke office ke baahar baith gaye. Thodi der me assembly khatam ho gayi aur principal waapis apne office ki taraf aaya, jab usne mujhe aur chacha ko dekha to usne hum dono ko cabin ke andar aane ko kaha. Hum dono cabin me chale gaye aur kursiyon par baith gaye.
Principal--aap iske chacha hai na, 1 baar pehle bhi aaye the aap.
Chacha--jee sahi pehchana aapne.
Principal--boliye, ab kaise aana hua? Agar aap is baar bhi mujhse ye kehne aaye hain ki mai ise na nikaalun to is baar mai aapki koi madad nahi kar sakta, mera decision final hai. Pareshaan aa gaya hoon mai isse, naak me dum kar diya hai isne. Arre itne kaand koi apni poori zindagi me na kare jitne isne 1 saal me kar diye hain...
Chacha--mai samajh raha hoon aapki baat par aap bhi to meri baat sun lijiye. Ab aap ise school se nikaal denge to iska 1 saal barbaad ho jaayega, padhaai me dikkat aayegi fir. Ye sab na ho, uske liye 1 raasta hai mere paas.
Principal--acha, zara hume bhi to bataaiye.
Chacha--aaj thursday hai, sunday se iski dusshere ki chhuttiyan pad rahi hain. Saturday tak ise school aane dijiye, aapke school ki 1 branch rishikesh me bhi hai, aap iska transfer wahaan kar dijiyega. Chhutiyon ke baad ye wahaan join kar lega, fir ye wahin se apni padhaai poori kar lega, isse dono problem solve ho jaayengi. Na hi iska saal barbaad hoga aur aap to bas ye chahte hain ki ye is school se chala jaaye, vo bhi solve ho jaayegi.
Chacha ki baat sunke principal kuch sochne laga, kabhi vo mujhe dekhta to kabhi chacha ko. Usne apni table par rakhe glass se paani piya aur uske baad bolne laga.
Principal--hmmm......idea to acha hai aapka par kya hai na, aisa karne ki meri ichha nahi hai.
Chacha--aisa karne ke liye mai aapko 50000 doon to bhi aapki ichha nahi hogi.
Paise ka naam sunte hi principal ke mooh se laar tapakne lagi, ye jhaant bhar ke kaam ke liye chacha use itne saare paise de rahe the to uske mann me laalach aana aam baat thi.
Chacha--soch lijiye, ise school se nikaal denge to yeh to chala jaayega lekin usme aapka kya faayeda. Usse badiya to yahi hoga ki aap iska transfer kar de, 50000 rupaye chhoti rakam nahi hoti. Ab aapke haathon me hai sab kuch, aapki ichha abhi bhi nahi ho rahi to theek hai, chal Samar.
Principal--arre kya kar rahe hain aap, mujhe bolne to dijiye. Aap itna keh rahe hain to mai maan jaata hoon, bache ka saal kharaab nahi hona chahiye. Samar beta, tum 1 kaam karo, abhi class me jaao aur haan, kal aana mere paas aur apna transfer certificate le jaana mujhse. Baaki koi formality hogi to vo mai karwa dunga, aapko chinta karne ki koi zaroorat nahi hai sir.
Chacha--mujhe pata tha ki aap meri baat nahi taalenge.
Ye bolte hi chacha ne apni jeb se paise nikaale aur principal ki taraf badha diye, principal ne paisa lekar apni table me rakh diye. Uske baad mai chacha ke saath office se baahar aa gaya, chacha ko office jaana tha to vo mujhe class me jaane ka bolke office ke liye nikal gaye. Mai bhi class me aa gaya, pehla period start ho chuka tha. Mai class ke baahar pahocha aur andar aane ke liye permission maangi to sabki nazar mujhpe gayi, mujhe dekhte hi saale aise ghoorne lage jaise alien aa gaya ho class me unki. Mam ne mujhe andar aane diya aur mai seedha jaake Varun ke paas baith gaya.
Varun--abbe lodu, tu to bol raha tha ki tu aaj jaa raha hai delhi chhodkar, fir yahaan kyo aa gaya?
Mai--baad me bataaunga, abhi aage dekh le. Mam hum dono ko hi ghoor rahi hai.
Uske baad mai boring teachers ki boring classes attend karne laga, lunch me sab ne mujhse mere naa jaane ka reason pucha to maine unhe apne rishikesh jaane ke baare me bata diya. Uske baad us din school me kuch khaas nahi hua, chhutti ke baad mai ghar aaya aur seedha apne room me chala gaya. Thodi der me chachi mere liye khana lekar room me aa gayi to is baar maine khaana khaa liya, chachi wahin mere paas baithi hui thi.
Chachi--to tu sach me rishikesh chala jaayega hamesha ke liye?
Mai--haan...
Chachi--aur 1 baar bhi tune nahi socha ki mera kya hoga.
Mai--socha tha chachi, lekin aaj jo chacha ne mere liye kiya hai, uske baad mujhe apne aap par bahot sharam aa rahi hai. Vo mere liye itna sab kuch kar rahe hain aur mai kya kar raha tha, unki peeth peeche unki patni ke saath..... maine unke saath dhokha kiya hai chachi par aage nahi karunga. Chachi, aapke aur mere beech jo dusra rishta ban gaya tha, aaj se vo khatam. Aaj se aap sirf meri chachi ho aur mai aapka bhateeja, usse zyada humaare beech ab koi rishta nahi hoga. Aasha karta hoon ki aap bhi meri baat ko samjhogi.
Chachi--par...
Mai--par-var kuch nahi chachi, ye mera aakhiri faisla hai.
Meri baat sunke chachi dukhi hui aur unki aankhon me halke-2 aansoo bhi aa gaye, uske baad chachi room se chali gayi. Mai bhi bed par let gaya aur kuch hi der me meri aankh lag gayi, thodi der baad mujhe 1 sapna aane laga. Mai sapne me Aanchal ki laash dekh paa raha tha, mujhse vo sab nahi dekha gaya to meri aankh khul gayi. Maine 1 baar ghadi ki taraf dekha to shaam ke 7 baj chuke the, aaj mai kaafi der so gaya tha. Mai bhale hi neend se jaag gaya tha lekin Aanchal ki laash abhi bhi mere zehan me ghoom rahi thi, mai koshish karta raha ki uske baare me na sochun lekin dimaag to wahin par fix ho gaya tha. Thodi der pareshaan hone ke baad maine socha ki chacha office se ghar aa gaye honge, unse chal ke baat karta hoon. Mai chacha ke room me chala gaya, chacha bed par baithkar TV dekh rahe the. Is waqt vo room me akele the, mai unke bagal me jaake baith gaya. Mai is waqt unke paas isliye aaya tha kyonki jis phase se mai guzar raha hoon, usse chacha bhi guzar chuke the. Agar is waqt koi meri madad kar sakta tha to vo chacha hi the.
Mai--chacha, kuch baat karni thi aapse.
Chacha--haa bol na....
Mai--chacha, aapko pata hoga ki Aanchal marr chuki hai.
Chacha--haa pata hai mujhe, uski maut ke baare me jab pata chala tha to bahot dukh hua tha mujhe.
Mai--chacha, jisse hum pyaar karte hain, agar vo hume chhod ke chala jaaye to uske bina hum kaise jiye?
Meri baat sunke chacha 1 soch me doob gaye, unke chehre ke bhaaw bhi badalne lage the. Unke chehre par udaasi aa gayi thi, vo jawaab nahi dena chahte the lekin fir bhi bol pade.
Chacha--nahi jee sakte, unke bina jeena duniya ka sabse mushkil kaam hota hai. 1-1 pal jeena hazaaron maut marne ke baraabar hota hai lekin fir bhi hume jeena padta hai. Pata hai kyon, taaki hum unhe yaad kar sake. Unki yaadein hi unke jaane ke baad humaare jeene ka sahaara hoti hain, tu bhi uski yaadon ke liye jee Samar.
Mai--mai use yaad karna chahta hoon par hamesha mujhe uski laash dikhaai deti hai. Mai use aise yaad nahi karna chahta chacha, mai use aise apne khayaalon me nahi dekh sakta.
Chacha--to use aise mat dekh, tere paas sirf uski yahi 1 memory to nahi hai na. Tune uske saath pata nahi kitne ache pal bitaaye hain Samar, vo sab yahaan hai(mere dil ki taraf ishaara karte huye)...uske saath bitaayi hui saari achi-buri yaadein tere dil me hai. Tu vo saari memories dekh sakta hai, ab ye teri ichha hai ki tu achi memories dekhna chahta hai ya buri. Apni aankhe band kar Samar, yaad kar un palon ko jinme vo tere saath khush thi. Un palon ko yaad kar jinme tum dono sirf ek dusre ke the, yaad kar Samar.
Chacha ki baat sunke maine apni aankhe band ki to thodi der mujhe Aanchal ki laash dikhti rahi lekin jab maine koshish ki to mujhe vo pal bhi dikhne lage jo humne saath me guzaare the, bhale hi vo pal kam the lekin unme hum ek dusre ke saath khush the. Un palon ko yaad karte hi mai muskuraane laga aur apne aap meri aankho se aansoo bhi aa gaye, maine apni aankhe kholi. Chacha mujhe hi dekh rahe the, mere chehre par khushi dekhkar chacha ne mere kandhe par haath rakh diya. Mai unke gale lag gaya, aaj pehli baar chacha ne mujhe gale lagaaya tha. Unke gale lagke mann ko bahot sukoon mil raha tha, aaj chacha par mujhe bahot garv tha. Un jaisa aadmi maine apni zindagi me nahi dekha tha, vo jinse pyaar karte the vo marr chuki thi lekin vo aaj bhi unse pyaar karte the aur aaj tak unhe diya hua waada nibha rahe the. Chachi se bhale hi unhone gharwaalon ke kehne par shaadi ki thi lekin fir bhi chachi ko unhone vo pyaar diya tha jo chachi deserve karti thi. Mujhe dekh ke unhe bhale hi apni haari hui mohabbat yaad aati thi lekin fir bhi pichle 13 saalon se chacha mere liye vo sab kuch kar rahe the jo mere papa ko karna chahiye tha. He is really the greatest man I've ever seen, kaash mere papa ki jagah vo mere baap hote.
